မြေအောက်ရေ စုပ်ယူခိုးသုံးနေခြင်း ရှိမရှိ ဘန်ကောက်က ဆောင်ကြာမြိုင် ဒါဇင်များစွာကို ရဲစစ်ဆေး

By AFP
25 January 2018
မြေအောက်ရေ စုပ်ယူခိုးသုံးနေခြင်း ရှိမရှိ ဘန်ကောက်က ဆောင်ကြာမြိုင် ဒါဇင်များစွာကို ရဲစစ်ဆေး

ဘန်ကောက်၊ ဇန်နဝါရီ ၂၅ ။           ။ ထိုင်းနိုင်ငံ၏ ဘန်ကောက်မြို့တော် မြေအောက်တစ်ဖြည်းဖြည်း နိမ့်ကျွံနေမှုကို ဖြစ်စေသော အကြောင်းချင်းရာများမှ တစ်ချက်ဖြစ်နိုင်ဖွယ်ရှိသည့်   မြေအောက်ရေစုပ်ယူသုံးခြင်းနှင့် ပတ်သက်ပြီး မြို့တော်တွင်းက ဆောင်ကြာမြိုင်ကြီးများကို ထိုင်းရဲတပ်ဖွဲ့က စစ်ဆေးမှုများ ဝင်ရောက်လုပ်ဆောင်သည်။

ဖောက်သည်များအား “ဆပ်ပြာရည်ဖြင့် နှိပ်နယ်ပေးခြင်း soapy massages” ဝန်ဆောင်မှုပေးရာတွင် မြေအောက်ရေအား ခိုးသွယ်စုပ်ယူကာ သုံးစွဲနေခြင်း ရှိမရှိ စစ်ဆေးခြင်းဖြစ်သည်။

မကြာသေးမီက Victoria Secret အနှိပ်ခန်းကြီးအား လူမှောင်ခိုကုန်ကူးမှု နှိမ်နင်းဖြိုခွင်းမှုတစ်ရပ်အတွင်း ဝင်ရောက်စီးနင်းရာတွင် အသက်မပြည့်သေးသော လိင်အလုပ်သမများ၊ တာဝန်ရှိအာဏာပိုင်များထံ လာဘ်ငွေပေးထားသော လယ်ဂျာစာအုပ်နှင့်အတူ ရေခွန်မြေခွန်စသည်တို့ မပေးဆောင်ရအောင် မြေအောက်ရေ စုပ်ယူခိုးသုံးနေသည့် သက်သေအထောက်အထားများကို တွေ့ရှိခဲ့ရာမှ ယခုစစ်ဆင်မှုကို ဆောင်ရွက်ခြင်း ဖြစ်သည်။

မြစ်ကမ်းပါး မြေနိမ့်ပိုင်းတွင် မြို့တည်ထားသော ဘန်ကောက်မြို့တော်၏ တစ်ဖြည်းဖြည်း နိမ့်ဆင်းလာနေခြင်းတွင် မြေအောက်ရေ တရားမဝင်စုပ်ယူသုံးစွဲခြင်းများကြောင့်လည်း ပါဝင်ကြောင်း သဘာဝပတ်ဝန်းကျင်ထိန်းသိမ်းရေးတာဝန်ရှိသူများက ပြောသည်။

လာရောက်သူများကို လိင်ဝန်ဆောင်မှုပေးသော အခန်းများ ဒါဇင်ကျော်ဖြင့် ဖွဲ့စည်းထားသော ဆောင်ကြာမြိုင်ကြီးများသည် ဆပ်ပြာရည်ဖြင့် နှိပ်နယ်ပေးခြင်း အနှိပ်ခန်းများကိုပါ တွဲထားဖွင့်လှစ်ထားကြရာ ယခုရဲစစ်ဆင်မှုတွင် ထိုအနှိပ်ခန်းပေါင်း ၄၀ ကျော်ထက်မနည်းကို ရေခိုးသုံးမသုံး စစ်ဆေးလျက်ရှိနေခြင်း ဖြစ်သည်။

“ဒီကနေ့ကတော့ ကျွန်တော်တို့ အဲဒီက အခန်းတွေမှာ သုံးစွဲနေတဲ့ ရေကို စစ်ဆေးကြမှာဖြစ်ပါတယ်။ အခန်းတိုင်း စစ်မှာပါ။”ဟု Emabassy Entertain ဆောင်ကြာမြိုင်အနှိပ်ခန်းသို့ ဝင်ရောက်မစစ်ခင် သတင်းထောက်များအား သဘာဝပတ်ဝန်းကျင်သယံဇတရာဇဝတ်မှုဆိုင်ရာ ကြီးကြပ်ရေးဌာနမှ လက်ထောက်ရဲမှူး ဆူဝတ်အင်သာဆစ်က ပြောခဲ့သည်။

"ဒီနေရာတွေမှာ မြေအောက်ရေ ခိုးသုံးနေကြတယ်လို့ ကျွန်တော်တို့က သံသယရှိထားတယ်။”ဟု ၎င်းက ပြောသည်။

သဘာဝပတ်ဝန်းကျင်အရာရှိများအနေဖြင့် ယင်းအခန်းများတွင် သုံးစွဲနေသော ရေကို တရားဝင်ပို့လွှတ်ပိုက်များမှ ရေ သို့မဟုတ် မြေအောက်မှ စုပ်ယူသော ရေ ဟုတ်မဟုတ်ကို စစ်ဆေးသွားကြမည်ဖြစ်သည်။