ကြားဖြတ်ရွေးကောက်ပွဲတွင် ကျပ်သန်း ၁၆၀၀ကျော် သုံးစွဲရန် UEC တင်ပြတောင်းခံထား

.

 

နေပြည်တော်(ဇန်နဝါရီ ၁၆ရက်၊ ၂၀၁၈ခုနှစ်)။      ။ ယခုနှစ်အတွင်း ကျင်းပရန်ရှိနေသည့် ကြားဖြတ်ရွေးကောက်ပွဲအတွက် ကျပ်သန်း ၁၆၀၀ကျော် သုံးစွဲရန် ပြည်ထောင်စုရွေးကောက်ပွဲကော်မရှင်က လွှတ်တော်သို့ တင်ပြတောင်းခံထားသည်။

ဘဏ္ဍာရေးနှစ် အပြောင်းအလဲကာလဖြစ်သည့် လာမည့် ဧပြီလမှ စက်တင်ဘာအထိ ၆လတာကာလ ဘတ်ဂျက်အတွက် ပြည်ထောင်စုရွေးကောက်ပွဲကော်မရှင်က သုံးစွဲရန် လျာထားသည့် ကျပ်သန်းပေါင်း ၄၄၉၅ဒဿမ ၆၇၂ အနက် ကြားဖြတ်ရွေးကောက်ပွဲအတွက် ကျပ်သန်း ၁၆၆၁ဒဿမ ၆၁၆သုံးစွဲရန် တင်ပြတောင်းခံထားခြင်း ဖြစ်သည်။

“ပြည်ထောင်စုရွေးကောက်ပွဲကော်မရှင်ရုံးနဲ့ တိုင်းဒေသကြီး၊ ပြည်နယ်၊ ကိုယ်ပိုင်အုပ်ချုပ်ခွင့်ရတိုင်းများ၊ ဒေသ၊ ခရိုင်၊ မြို့နယ်ရွေးကောက်ပွဲကော်မရှင်အဖွဲ့ခွဲရုံးများအတွက် ကျပ်သန်း ၂၃၈၄ဒဿမ ၀၅၆နဲ့ ကြားဖြတ်ရွေးကောက်ပွဲအတွက် ကျပ်သန်း ၁၆၆၁ဒဿမ ၆၁၆ စုစုပေါင်း သာမန်အသုံးစရိတ် ကျပ်သန်း ၄၄၉၅ဒဿမ ၆၇၂ကို အဆိုပြုတင်ပြထားပါကြောင်း” ကော်မရှင်အဖွဲ့ဝင် ဦးစိုးရယ်က ဇန်နဝါရီ ၁၆ရက် ပြည်ထောင်စုလွှတ်တော်အစည်းအဝေးတွင် ပြောသည်။

ကော်မရှင်အနေဖြင့် ငွေလုံးငွေရင်းအသုံးစရိတ် တင်ပြတောင်းခံထားခြင်းမရှိသလို သာမန်ရငွေ၊ ငွေလုံးငွေရင်း ရငွေများလည်း ရရန် မရှိသဖြင့် ခန့်မှန်းရငွေ တင်ပြထားခြင်း မရှိပေ။

ကော်မရှင်အနေဖြင့် လက်ရှိအနေအထားအရ ယခုနှစ်အတွင်း လစ်လပ်မဲဆန္ဒနယ်(၉)နေရာတွင် ကြားဖြတ်ရွေးကောက်ပွဲကျင်းပသွားမည် ဖြစ်သည်။

“ဘယ်တော့လောက်လဲတော့ မပြောနိုင်သေးဘူး။ ကြေငြာပါ့မယ်။ ဘာလို့လည်းဆိုတော့ မဲစာရင်းကောက်ဖို့တွေ ကျန်တဲ့အဖွဲ့အစည်းတွေနဲ့ ညှိရဦးမယ်။ ၂၀၁၈ထဲတော့ ဖြစ်မယ်” ဟု ကော်မရှင်အဖွဲ့ဝင်  ဦးအောင်မြင့်က ဇန်နဝါရီ ၁၅ရက် အမျိုးသားလွှတ်တော်အစည်းအဝေးအပြီးတွင် သတင်းထောက်များကို ပြောသည်။

ချင်းပြည်နယ်၊ မတူပီမြို့နယ်မဲဆန္ဒနယ်အမှတ်(၁)၊ မန္တလေးတိုင်း၊ သပိတ်ကျင်းမြို့နယ်မဲဆန္ဒနယ်အမှတ်(၁)၊ ပဲခူးတိုင်း၊ မဲဆန္ဒနယ်အမှတ်(၁)၊ ရခိုင်ပြည်နယ်၊ ရသေ့တောင်မဲဆန္ဒနယ်အမှတ်(၂)၊ မကွေးတိုင်း၊ မင်းဘူးမြို့နယ်မဲဆန္ဒနယ်အမှတ်(၂)နှင့် စစ်ကိုင်းတိုင်း၊ တမူးမဲဆန္ဒနယ်အမှတ်(၂)တို့တွင် တိုင်းနှင့်ပြည်နယ်လွှတ်တော်များအတွက် မဲဆန္ဒနယ်(၆)ခု လစ်လပ်နေသည်။

ထို့ပြင် ကန်ပက်လက်မြို့နယ်နှင့် လဲချားမြို့နယ်များအတွက် လစ်လပ်လျက်ရှိသော ပြည်သူ့လွှတ်တော်နှစ်နေရာအတွက်လည်း ကြားဖြတ်ရွေးကောက်ပွဲကျင်းပမည် ဖြစ်သည်။

အလားတူ ယမန့်နေ့က ကွယ်လွန်သွားသည့် မန္တလေးတိုင်းမှ ရှမ်းတိုင်းရင်းသားရေးရာဝန်ကြီး ဦးစိုင်းကျော်ဇော်၏ မဲဆန္ဒနယ်တွင်လည်း ကြားဖြတ်ရွေးကောက်ပွဲကျင်းပနိုင်ခြေရှိသည်။