မန္တလေး၊ ဇန်နဝါရီ ၁၆ ။ ။ ရှမ်းတိုင်းရင်းသားရေးရာဝန်ကြီး ဦးစိုင်းကျော်ဇော ကွယ်လွန်သွားခြင်းသည် မန္တလေးတိုင်းဒေသကြီးအစိုးရအဖွဲ့နှင့်တိုင်းဒေသကြီးလွှတ်တော်အတွက် ကြီးမားသော ဆုံးရှုံးတစ်ခုဖြစ်သည်ဟု တိုင်းဒေသကြီးလွှတ်တော် ဥက္ကဋ္ဌ ဦးအောင်ကျော်ဦးကပြောသည်။
"တိုင်းအစိုးရအဖွဲ့ ဝန်ကြီးချုပ် အားကိုးအားထားရတဲ့ ဝန်ကြီးတစ်ဦးပါ။ လူမှုရေး၊သာသနာရေး၊အားကစား ကိစ္စတွေမှာ အများကြီး လုပ်ဆောင်ပေးခဲ့ပါတယ်။ ဝန်ကြီးချုပ်အတွက် လက်မောင်းတစ်ဖက် ပြုတ်သလို ကျွန်တော်တို့အတွက်လည်း လက်မောင်းတစ်ဖက်ပြုတ်တာပါပဲ။ အစိုးရအတွက်ရော ကျွန်တော်တို့လွှတ်တော်အတွက်ပါ ဆုံးရှုံးမှုကြီးတစ်ခုပါ။"ဟု ဦးအောင်ကျော်ဦးကပြောသည်။
သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ဝန်ကြီး ဦးမျိုးသစ်က"ဦးစိုင်းကျော်ဇောကို ဆုံးရှုံးလိုက်ရတာဟာ အားကစားအတွက်တော့ အားနည်းသွားတာပေါ့။ သူကိုယ်တိုင်ကလည်း ဝိတ်မ မြန်မာ့လက်ရွေးစင် အားကစားသမားဖြစ်ဘူးတော့ အားကစားဘက်မှာ သူကအတော်သိတယ်။ကျွန်တော်တို့ဆို မသိဘူး။ပြီးတော့ သာသနာရေးလုပ်ငန်းတွေလုပ်တယ်။ အခုဖြစ်တာ စိတ်မကောင်းဖြစ်ရတယ်။"ဟုပြောသည်။
မန္တလေးမြို့ ရှမ်းတိုင်းရင်းသား သာရေး၊နာရေးအသင်းတွင် ရှမ်းတိုင်းရင်းသားရေးရာဝန်ကြီး ဦးစိုင်းကျော်ဇောအား ပြင်ဆင်ထားခြင်းနှင့်လာရောက်မေးမြန်းသူများကိုတွေ့ရစဉ်။
ရှမ်းတိုင်းရင်းသားရေးရာ ဝန်ကြီး ဦးစိုင်းကျော်ဇော အသက်(၆၈)နှစ်သည် ယနေ့ ဇန်နဝါရီလ ၁၆ ရက်၊နံနက် ၁၂ နာရီ၊၂၅မိနစ်တွင် မန္တလေးမြို့အထွေထွေကုဆေးရုံကြီး၌ ကွယ်လွန်ခဲ့ခြင်း ဖြစ်ပြီး ယနေ့ မွန်းလွဲ ၃ နာရီတွင် မန္တလေးမြို့ ရှမ်းတိုင်းရင်းသား သာရေး၊နာရေးအသင်းမှ တောင်အင်း၊မြောက်အင်းသုဿန်သို့ ပို့ဆောင်သဂြိုလ်သွားမည်ဖြစ်ကြောင်း သိရသည်။
