ဇန်နဝါရီ ၈၊ ပြင်သစ် ။ ။ ချန်ပီယံဆုဖလားများရရှိလိုပါက စည်းကမ်းသေဝပ်ပြီး စည်းလုံးညီညွတ်ရန် လိုအပ်ကြောင်း ပီအက်စ်ဂျီအသင်းသားများအား နည်းပြအမ်မရီက သတိပေးပြောဆိုလိုက်သည်။
ပီအက်စ်ဂျီအသင်း၏အဓိကတိုက်စစ်မှူး ကာဗာနီနှင့်ပက်စ်တိုရီတို့သည် နှစ်သစ်ကူးအားလပ်ရက်အပြီးတွင် အသင်းသို့ပြန်လာရန် နောက်ကျခဲ့ကြသည့်အတွက် ရင်းနက်စ်နှင့်ပြင်သစ် ရှုံးထွက်ဖလားပြိုင်ပွဲတွင် ချန်လှပ်ခံခဲ့ရသည်။
ထိုပွဲ၌ ကာဗာနီမပါ၀င်နိုင်သော်လည်း နေမာ၊ အမ်ဘတ်ပီနှင့်ဒီမာရီယာတို့က ၂ ဂိုးစီသွင်းခဲ့ကြပြီး ပီအက်စ်ဂျီအသင်းက ၆-၁ ဂိုးဖြင့် အနိုင်ရခဲ့သည်။
“ကာဗာနီက သောကြာနေ့ကမှ လေ့ကျင့်ခန်းပြန်ဆင်းပါတယ်။ ဒါကြောင့် သူ့ကို ချန်လှပ်ထားဖို့ ဆုံးဖြတ်ခဲ့တာပါ။ အခုသူ့ကို ကိုယ်ပိုင်လေ့ကျင့်ခန်းလုပ်ဖို့ပြောထားပါတယ်။ အသင်းနဲ့ တဖြည်းဖြည်းချင်းပြန်ပူးပေါင်းခွင့်ပေးသွားမှာပါ။
ပက်စ်တိုရီကိုလည်း အသင်းနဲ့ပြန်ပူးပေါင်းခွင့်ပေးသင့်တယ်လို့ တာဝန်ရှိသူတွေက ပြောပါတယ်။ ဒါပေမဲ့ အရေးအကြီးဆုံးက တစ်သင်းလုံးစည်းလုံးညီညွတ်မှုရရှိနေဖို့ပါပဲ။ ဆုဖလားတွေရချင်တယ်ဆိုရင် တစ်သင်းလုံးစည်းကမ်းလိုက်နာပြီး ညီညွတ်နေဖို့ လိုပါတယ်” ဟု နည်းပြအမ်မရီက ဆိုသည်။
ရည်ညွှန်း ဆော်ကာဝေး
