မကွေးတိုင်းဒေသကြီးအစိုးရအဖွဲ့မှ ဝန်ကြီးနှစ်ဦး ဝန်ကြီးတာဝန်မှ နှုတ်ထွက်စာတင်ထားကြောင်း တိုင်းဒေသကြီးဝန်ကြီးချုပ်ဒေါက်တာအောင်မိုးညိုထံက သိရသည်။  

မကွေးတိုင်းဒေသကြီးအစိုးရအဖွဲ့၊ အလုပ်သမား၊လူဝန်မှုကြီးကြပ်ရေးနှင့်ပြည်သူ့အင်အား ဝန်ကြီးဌာန ဝန်ကြီး ဦးနေမျိုးကျော်နှင့် လယ်ယာစိုက်ပျိုးရေး၊မွေးမြူရေးနှင့် ဆည်မြောင်းဝန်ကြီးဌာန ဝန်ကြီး ဦးစိုးမြင့် တို့နှစ်ဦးတို့သည် ဇန်နဝါရီ ၅ရက်နေ့က မကွေးတိုင်းဒေသကြီးဝန်ကြီးချုပ်ထံ နှုတ်ထွက်စာ တင်ထားကြောင်း ဝန်ကြီးချုပ်ဒေါက်တာအောင်မိုးညိုထံမှ သိရသည်။

ယင်းနှုတ်ထွက်စာတင်ထားမှုနှင့် ပါတ်သက်၍ မကွေးတိုင်းဒေသကြီးအစိုးရအဖွဲ့အလုပ်သမား၊လူဝန်မှုကြီးကြပ် ရေးနှင့်ပြည်သူ့အင်အားဝန်ကြီးဌာန ဝန်ကြီး ဦးနေမျိုးကျော်က မကွေးမြို့တော်ခန်းမတွင် ဇန်နဝါရီလ ၆ရက်နေ့ ကပြုလုပ်သည် ့ ရသပြည်ထောင်စုသစ် စာပေဆွေးနွေးပွဲ အဖွင့်အမှာစကားပြောရာတွင် အတည်ပြု ပြောကြားခဲ့သည်။မကွေးတိုင်းဒေသကြီးအစိုးရအဖွဲ့ လယ်ယာစိုက်ပျိုးရေး   မွေးမြူရေးနှင့်ဆည်မြောင်းဝန်ကြီးဌာန ဝန်ကြီး ဦးစိုးမြင့်ကလည်း အစိုးရအဖွဲ့ဝန်ကြီးအဖြစ်မှနှုတ်ထွက်စာ တင်ထားကြောင်း ဇန်နဝါရီလ(၈)ရက်နေ့က သတင်းမီဒီယာများကို အတည်ပြုပြောကြားခဲ့သည်။

ဝန်ကြီး ဦးစိုးမြင့်က “ ဇန်နဝါရီလ (၅)ရက်နေ့က နှုတ်ထွက်စာတင်ထားတာပါ၊ ကျန်းမာရေးအခြေအနေက ကောင်းလာမလိုလိုနဲ့ အခုလိုအေးတဲ့အချိန်တွေမှာ ဂရုစိုက်ရမှာဖြစ်တဲ့အတွက်၊ အရင်ကလည်း လေဖြန်းတာနှစ် ခါဖြစ်ဖူးတဲ့အတွက် လေဖြတ်သွားရင် မလွယ်ဘူးလေ၊ ကျန်းမာရေးအခြေအနေအရ နှုတ်ထွက်စာတင်ထားတာပါ ”ဟုပြောသည်။

အစိုးရအဖွဲ့ဝန်ကြီးအဖြစ်မှနှုတ်ထွက်စာတင်ထားမှုကို မကွေးတိုင်းဒေသကြီးအစိုးရအဖွဲ့ဝန်ကြီးချုပ်ထံတင်ထား သော်လည်း အကြောင်းပြန်ကြားမှုမရှိသေးဟု ၎င်းကပြောသည်။

မကွေးတိုင်းဒေသကြီးအတွင်း ဝန်ကြီးနှစ်ဦး တိုင်းအစိုးရအဖွဲ့ထံနှုတ်ထွက်စာ တင်ထားသော်လည်း တိုင်းဒေသကြီးလွှတ်တော်ထံနှုတ်ထွက်စာတင်ပြမှုမရှိသေးဟု မကွေးတိုင်းဒေသကြီးလွှတ်တော် ဥက္ကဌဦးတာက မဇ္ဈိမသို့ ပြောသည်။