အဆီချပြီးတဲ့နောက် သင်ဟာ ဘာတွေကို စားပေးသင့်သလဲ

အဆီချပြီးတဲ့နောက် သင်ဟာ ဘာတွေကို စားပေးသင့်သလဲ

ရေးသားသူ Dr. Khin Yin Kyay
ဆေးပညာပိုင်းဆိုင်ရာတည်းဖြတ်သူ Dr. K Zin Thwe

 

အဆီကျသွားခြင်းအားဖြင့် သင်အမြဲတမ်း အိမ်မက်မက်ခဲ့တဲ့ ခန္ဓာကိုယ်ပုံစံကို ရစေနိုင်ပါတယ်။ သို့သော် အဆီချပြီးတဲ့နောက် ၎င်းကိုဆက်လက် ထိန်းသိမ်းထားဖို့ရာ နည်းလမ်း စနစ်တကျ မရှိခဲ့ဘူးဆိုရင် အလွယ်တကူ ပြန်ဝလာနိုင်ပါတယ်။ အစားအသောက်နှင့် လေ့ကျင့်ခန်းစတဲ့ အဓိက ၂ချက်ကို သုံးပြီးသင့်ရဲ့ အိမ်မက်မက်ခဲ့ရတဲ့ ခန္ဓာကိုယ်ကို ထိန်းသိမ်းထားပါ။ သင်ဟာ အဆီချပြီးတဲ့နောက်မှာ ဘာတွေစားသင့်တယ် ဆိုတာကို ကြည့်ကြပါစို့။

အသီးအနှံနှင့် အသီးအရွက်များကို ပိုမို စားသောက်ပါ။

အသီးအနှံ နှင့် အသီးအရွက်များဟာ ခန္ဓာကိုယ်မဝအောင် ဆက်လက်ထိန်းသိမ်းလိုသူများအတွက် အမှန်တကယ်ကို တန်ဖိုးရှိတဲ့ အစားအသောက်တွေပဲ ဖြစ်ပါတယ်။ သင်စားတဲ့ အစားအသောက်တွေထဲမှာ ရောင်ခြယ် ဓာတု ပစ္စည်းတွေ၊ အသီးအနှံတွေနှင့် အသီးအရွက် စတဲ့ အာဟာရဓာတ်တွေပါဝင်ခြင်းဟာ သင့်ရဲ့ ခန္ဓာကိုယ်ကို လှပစေရုံသာမကပဲ ကျန်းမာရေးကောင်းတဲ့ ဘဝကိုလည်း ပိုင်ဆိုင်ရရှိမှာဖြစ်ပါတယ်။ အသီးအနှံ နှင့် အသီးအရွက်တွေထဲမှာ ပါတဲ့ ဓာတ်တိုးဆန့်ကျင် ပစ္စည်းတွေနှင့် ဗီတာမင်ဓာတ် တွေဟာ သင့်ရဲ့ အရေပြားအောက်က အဆီပိုတွေကို ထိထိရောက်ရောက် လောင််ကျွမ်းစေပြီး ကျစ်လျစ် သွယ်လျ တဲ့ ခန္ဓာကိုယ်ကို ရရှိပိုင်ဆိုင်စေမှာ ဖြစ်ပါတယ်။ အသီးအနှံ နှင့် အသီးအရွက်တွေကို စားပေးခြင်း ဟာ ဆာလောင်မှုကို လျော့ကျစေပြီး နေ့စဉ်စားသုံးတဲ့ ကယ်လိုရီ ပမာဏကိုလည်း လျော့ကျစေနိုင်ပါတယ်။ USDA လို့ခေါ်တဲ့ အမေရိကန် စိုက်ပျိုးရေး အဖွဲ့အစည်းမှ အကြံပေးထားတာကတော့ အမျိုးမျိုးသော အရောင်အသွေးရှိတဲ့ အသီးအရွက်အမျိုးအစားတွေကို အစားအသောက်စားတိုင်း စားတိုင်း နေ့စဉ် ဖြည့်သွင်းစားသောက်သင့်တယ်လို့ ဆိုပါတယ်။ ဘာကြောင့်လဲဆိုတော့ အမျိုးမျိုးသော အသီးအရွက်တွေမှာ ဗီတာမင်နှင့် အာဟာရဓာတ်များစွာ ပါဝင်တဲ့အတွက်ကြောင့် ဖြစ်ပါတယ်။

အသားဓာတ် ပမာဏ မြင့်မားစွာပါဝင်သည့် အစားအသောက်များ

အသားဓာတ်ဟာဆိုရင် ကော်လဂျင်လို့ ခေါ်တဲ့ အသားအရေ တင်းရင်းမှုကို ဖြစ်စေပြီး အသားအရေကို တောင့်တင်းကြံ့ခိုင်စေပါတယ်။ ဒါ့အပြင် အသားဓာတ် ပါဝင်တဲ့ အစားအသောက်တွေဟာ သင့်ရဲ့ အစာစားချင်စိတ်ကို ထိန်းချုပ်ပေးနိုင်ပြီး ဇီဝကမ္မ ဖြစ်ပျက်မှုကို ပုံမှန်ဖြစ်စေကာ အဆီပိုတွေ သိုလှောင်မှု ကို လျော့ကျစေပါတယ်။ ဒီလိုအကြောင်းပြချက်တွေကြောင့် သင်စားတဲ့ အစားအသောက်တွေထဲမှာ အသားဓာတ်ပါဝင်တဲ့ အစားအသောက်တွေကို မဖြတ်တောက်သင့်ဘူးဆိုတာ သိနိုင်ပါတယ်။ သင့်ရဲ့ ကိုယ်အလေးချိန်ကို ၎င်းအသားဓာတ်တွေက ပိုတိုးလာနိုင်သလား ဆိုတာကို စိုးရိမ်ဖို့ မလိုပါဘူး။ အသားဓာတ်တွေကို အဆီမပါသော အသား၊ ငါး ၊ဥများနှင့် ပဲအမျိုးမျိုးစတာတွေကနေ အလွယ်တကူ ရရှိနိုင်ပါတယ်။

ကယ်လိုရီ နည်းသော အစားအသောက်များ

ကယ်လိုရီ ပမာဏများသော အစားအသောက်တွေကို စားမိခဲ့ရင် အဆီ ပိုစုခြင်းကို များစွာ ဖြစ်စေနိုင်ပါတယ်။ ဒီလိုကယ်လိုရီများတဲ့ အစားအသောက်တွေကို လျှော့ချဖို့ရာအတွက် သင်ဟာ မလိုအပ်ပဲ မုန့်ပဲသရေစာ၊ အချိုပွဲ စတာတွေ စားခြင်းကို မပြုလုပ်ခြင်း သို့မဟုတ် စားတဲ့ပမာဏကို လျော့ချခြင်း ပြုလုပ်သင့်ပါတယ်။ အဆီနည်းသော သို့မဟုတ် အဆီထုတ်ထားသော နို့နှင့် နို့ထွက်ပစ္စည်းတွေဟာ သင့်အတွက် ကောင်းပါတယ်။ ဘာကြောင့်လဲဆိုတော့ ၎င်းတို့ဟာ အခြားနို့ထွက် ပစ္စည်းများ၊ အဆီဓာတ်ပမာဏများတဲ့ နို့ခဲ၊့ အကြော်အလှော်များနဲ့ အနီရောင်အသားအများစု စတာတွေထက်စာရင် ကယ်လိုရီရော အဆီရော နည်းတဲ့အတွက်ကြောင့် ဖြစ်ပါတယ်။

အစေ့အဆန်များ

ကစီဓာတ်ဟာသင့်ကို ဝစေပါတယ်။ သို့သော် သင့်ရဲ့ ခန္ဓာကိုယ်အတွက် နေ့စဉ်လုပ်ငန်းဆောင်တာတွေ လုပ်ဆောင်မှုနှင့် ကြွက်သားများ ကြီးထွားဖို့ရာ ကစီဓာတ်ကို လိုအပ်နေပါသေးတယ်။ ဒါကြောင့် လိုအပ်သလောက်ပဲ မှန်ကန်တဲ့ ကစီဓာတ် ပမာဏကို စားသုံးဖို့ရာအပြင် ပိုလျှံသောအဆီများ ဖြစ်မလာဖို့ရာ အတွက်နှင့် သွေးတွင်း သကြားဓာတ် ပမာဏကို ထိန်းသိမ်းဖို့ရာအတွက် မှန်ကန်သော နည်းလမ်းဟာ ဘာလဲ။ သကြားနှင့် အခြားအချိုဓာတ်ဆိုင်ရာ အရောအနှောတွေထက်စာရင် သင်ဟာ ကောက်ပဲသီးနှံ၊ အီတလီခေါက်ဆွဲခြောက်နှင့် ပေါင်မုန့် စတဲ့ အစေ့အဆန်တွေကရတဲ့ ထွက်ကုန်တွေကို စားပေးသင့်ပါတယ်။ ၎င်းတို့မှာဆိုရင် သင့်ရဲ့ခန္ဓာကိုယ်ကို အဆီပို မဖြစ်စေပဲ လိုအပ်တဲ့ ကစီဓာတ်ပမာဏ ကိုသာရရှိစေတဲ့ အကောင်းဆုံးသော အရင်းအမြစ်တွေပါဝင်ပါတယ်။ အစေ့အဆန်တွေဟာဆိုရင် အမျှင်ဓာတ်၊ ဗီတာမင် နှင့် သတ္တုဓာတ် စတဲ့ ကျန်းမာရေးနှင့် ညီညွတ်တဲ့ ဓာတ်တွေ သင့်ခန္ဓာကိုယ် ကိုပေးနိုင်ပါတယ်။ ကစီဓာတ်ပါဝင်တဲ့ အစားအသောက်တွေ စားသောက်တဲ့အခါ အခြားသတိပြုသင့်တဲ့ အချက်တွေကတော့ တစ်နေ့တာရဲ့ အစောဆုံးအချိန်မှာသာ ၎င်းတို့ကို သင်ဟာ စားပေးသင့်ပါတယ်။ ဒီလိုလုပ်ခြင်းအားဖြင့် နေ့လည်စာ စားပြီးတဲ့နောက်မှာ သင့်ခန္ဓာကိုယ်ဟာ ကယ်လိုရီ တွေကို ထိထိရောက်ရောက် အသုံးချနိုင်တဲ့အတွက်ကြောင့် ဖြစ်ပါတယ်။ ဒီလိုလုပ်ခြင်းအားဖြင့် အဆီတွေကို မစုစေနိုင်တော့ပါဘူး။

ရေလုံလုံလောက်လောက် သောက်သုံးပါ

သင့်ကြွက်သားတွေရဲ့ ရ၀ ရာခိုင်နှုနး်ဟာ ရေဓာတ်နဲ့ ဖွဲ့စည်းထားတယ်ဆိုတာ သင်သိပါသလား။ ဒါ့အပြင် သင့်ခန္ဓာကိုယ်ထဲမှ ဇီဝကမ္မ ဆိုင်ရာ လုပ်ဆောင်မှုများ အားလုံးမှာရေဟာလည်း ပါဝင်ပတ်သက်နေပါတယ်။ ရေမှာနောက်ထပ် ကောင်းကျိုး ရှိနေပါသေးတယ်။ ဒါကတော့ သင့်ကို အစာပိုမစားစေတာပဲ ဖြစ်ပါတယ်။ လေ့ကျင့်ခန်း ပြင်းပြင်းထန်ထန် လုပ်ပြီးတဲ့ အခါ သင့်ရဲ့ ခန္ဓာကိုယ်ဟာ ဆုံးရှုံးသွားတဲ့ ရေဓာတ်တွေကို ပြန်လည် ဖြည့်ပေးဖို့အတွက် ရေကို လုံလုံလောက်လောက် သောက်ပေးသင့်ပါတယ်။ သင့်ရဲ့နေ့စဉ် သောက်သုံးဖို့ရာ လိုအပ်တဲ့ ရေပမာဏဟာ သင့်ရဲ့ ကိုယ်အလေးချိန်၊ အရပ် နှင့် သင့်နေထိုင်တဲ့ ရာသီဥတုပေါ် မူတည်ပါတယ်။ လူကြီးတစ်ယောက် အတွက်လိုအပ်တဲ့ ပုံမှန်ရေပမာဏ ကတော့ တစ်နေ့မှာ ၂လီတာ ဖြစ်ပါတယ်။

ကောင်းမွန်တဲ့ အစားအသောက်တွေနှင့် လေ့ကျင့်ခန်း ပုံမှန်ပြုလုပ်ပေးခြင်းဟာဆိုရင် သင့်ရဲ့ အဆီတွေကို သိသိသာသာ လောင်ကျွမ်းစေတဲ့ အပြင် သင့်ခန္ဓာကိုယ်ကို ဝိတ်မတက်အောင် ထိန်းသိမ်းပေးထားနိုင်ပါတယ်။ သင့်ရဲ့နေ့စဉ်စားသောက်တဲ့ အစားအစာတွေကို ကောင်းမွန်စွာ စီမံခန့်ခွဲသင့်ပါတယ်။ တကယ်လို့ သင်စားသောက်ရမယ့် အစားအသောက်တွေ အကြောင်းကို သေချာမသိဘူးဆိုရင်တော့ အာဟာရဆိုင်ရာ ကျွမ်းကျင်ပညာရှင်တွေဆီကနေ အချို့သောတန်ဖိုးရှိတဲ့ အကြံဉာဏ်တွေကို တောင်းခံနိုင်ပါတယ်။

ဤဆောင်းပါးကို Mizzima ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ကူးယူဖော်ပြပါသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly