ဒီဇင်ဘာ ၁၅ ။ ။ ဂျာမနီအစိုးရသည် ကချင်ပြည်နယ်၊ ရခိုင်ပြည်နယ်၊ ရှမ်းပြည်နယ်တို့ရှိ ပဋိပက္ခ ဒဏ်ခံရသော ပြည်သူများသို့ အခြေခံစားနပ်ရိက္ခာများဖြစ်သော ဆန်၊ ပဲ အမျိုးမျိုးနှင့် ဆားတို့ကို လစဉ်ထောက်ပံ့ပေးသွားမည်ဟု ဂျာမနီသံရုံးမှ ယနေ့ ဒီဇင်ဘာလ ၁၅ ရက်တွင် ထုတ်ပြန်သည်။
အဆိုပါ ကူညီထောက်ပံ့မှုအတွက် ဂျာမနီအစိုးရမှ ယူရို ၁ သန်းကို မြန်မာနိုင်ငံရှိ လူမှုကယ်ဆယ်ရေး လုပ်ငန်းများ ဆောင်ရွက်ရန် World Food Program သို့ လှူဒါန်းခဲ့ခြင်း ဖြစ်သည်။
Myanmar Country Strategic Plan စီမံကိန်းအတွက် ထောက်ပံ့ငွေ ကူညီခြင်း ဖြစ်ပြီး လူသားအကျိုးပြု လုပ်ငန်းစဉ်များ ဆောင်ရွက်ရန် ယူရို ၁ သန်း ( ခန့်မှန်းခြေ အမေရိကန်ဒေါ်လာ ၁.၁၇ သန်း) ကို လှူဒါန်းခဲ့ခြင်း ဖြစ်သည်။
ထောက်ပံ့မှုများအား မည်သည့်ကာလတွင် စတင်ပေးဝေသွားမည်ကို အတိအကျမသိရသေးသော်လည်း လက်ရှိတွင် ကချင်ပြည်နယ်၌ တပ်မတော်နှင့် KIA အကြား တိုက်ပွဲများ ဖြစ်ပွားနေပြီး ရှမ်းပြည်နယ်တွင်လည်း TNLA နှင့် တိုက်ပွဲများ ဖြစ်ပွားနေသည်။ ရခိုင်ပြည်နယ်တွင်မူ ပြန်လည်ထူထောင်ရေးနှင့် နေရပ်ပြန်ဒုက္ခသည် များအား နေရာချထားပေးနိုင်ရန် အစိုးရမှ လုပ်ဆောင်လျှက်ရှိသည်။
