"အရင် ကုမ္ပဏီ တွေတုန်းကတော့ ထုတ်ရောင်းပြီးသား ရှယ်ယာတွေကိုပဲ ပြန်ပြီး အရောင်းအဝယ် လုပ်တာပေါ့။ အခုကုမ္ပဏီက ကနဦးရှယ်ယာ တွေ ပထမဆုံးရောင်းတာဆိုတော့ စိတ်ဝင်စားဖို့ကောင်းတယ်။ ဒါပေမယ့် အခု သိရသလောက်တော့ ကနဦးရှယ်ယာ ရောင်း တယ်ဆိုပေမယ့် မူရင်းစျေးအတိုင်းရောင်းပေးတာမဟုတ်ဘူး။ သူရဲ့ မူရင်းစျေးက တစ်ထောင်တဲ့ အဲဒါကို ၃၀၀၀ နဲ့ ၃၃၀၀ အတွင်းမှာ ရောင်းမှာဆိုတော့ အရင်ကုမ္ပဏီတွေလိုပဲ သပ်မကွာဘူး" ဟု ရန်ကုန်စတော့စျေးကွက်ကို လေ့လာနေသူ တစ်ဦးဖြစ်သည့် ဦးစောက ဆိုသည်။
ရန်ကုန်စတော့အိတ်ချိန်း-YSX ၏ ငါးခုမြောက် စားရင်တင်ကုမ္ပဏီဖြစ်လာပြီး ပထမဦးဆုံးအများပြည်သူသို့ ရှယ်ယာများ ကမ်းလှမ်းခြင်း - IPO လုပ်ကိုင်မည့် TMH ဆက်သွယ်ရေးအများပိုင်ကုမ္ပဏီလီမိတက်က ရှယ်ယာတစ်စောင်ကို ကျပ် ၃၀၀၀ ကနေ ၃၃၀၀ အတွင်း သတ်မှတ်ရောင်းချသွားမည်ဟုTMH ဆက်သွယ်ရေးအများပိုင်ကုမ္ပဏီလီမိတက်၏ အုပ်ချုပ်မှုဒါရိုက်တာ ဦးသီဟလွင်က ပြောသည်။
ဒီဇင်ဘာလ ၁၃ တွင် ရန်ကုန်စတော့အိတ်ချိန်း၌ ပြုလုပ်သော TMH ဆက်သွယ်ရေးအများပိုင်ကုမ္ပဏီလီမိတက်၏ အစုရှယ်ယာ ကမ်းလှမ်းခြင်းဆိုင်ရာ ကုမ္ပဏီမိတ်ဆက်ပွဲမှာ ဦးသီဟလွင်က ပြောဆိုခဲ့တာဖြစ်ပြီး အများပြည်သူကို အခုရှယ်ယာစုစုပေါင်း ၄ သိန်းကနေ ၅ သိန်းအကြား ရောင်းချပေးသွားမှာဖြစ်သည်ဟု သိရသည်။
IPO ကနေ ရရှိနိုင်မယ့် ရင်းနှီးငွေပမာဏကို ကျပ် ၁ ဒသမ ၅၉ ဘီလီယံကနေ ၁ ဒသမ ၆၃ ဘီလီယံအကြား ဖြစ်မည်ဟု ကုမ္ပဏီကခန့်မှန်းထားပြီး ICT Service ၊ Broadband နဲ့ Metro Fiber Operation လုပ်ငန်းများတွင် တိုးချဲ့ဆောင်ရွက် သွားမယ်လို့ သိရသည်။
အဆိုပါ လုပ်ငန်းများနှင့် ပတ်သက်၍ ဦးသီဟလွင်က "နှစ်တိုင်းမှာဆိုရင် အမေရိကန်ဒေါ်လာ ဘီလီယံနဲ့ချီပြီး ရင်းနှီး ဘထားရတဲ့ကဏ္ဍမှာဆိုရင် မြန်မာနိုင်ငံရဲ့ အနေအထားနဲ့ ထိတွေ့တာ များနေပြီး သမိုင်းတလျှောက်လည်း ပါ၀င်နေတဲ့ ကုမ္ပဏီဖြစ်တဲ့အတွက် ရှေ့လျှောက်မှာလည်း အောင်မြင်အောင်လုပ်နိုင်မယ်လို့ ယုံကြည်ပါတယ်" ဟု ဆိုသည်။
ရှယ်ယာကမ်းလှမ်းရောင်းချခြင်းကို မြန်မာနိုင်ငံငွေကြေးသက်သေခံလက်မှတ်များလဲလှယ်ရောင်းဝယ်ရေးကုမ္ပဏီလီမိတက်-MSEC က ဦးဆောင်တာဝန်ယူသွားမှာဖြစ်ပြီး ပူူးပေါင်းကုမ္ပဏီများအဖြစ် KBZ SC ၊ CBSC ၊ AYA Trust ၊ KTZrh နဲ့ AIS တို့က တာဝန်ယူဆောင်ရွက်သွားမှာဖြစ်သည်ဟု သိရသည်။
အများပြည်သူများအနေဖြင့် ရှယ်ယာများကို အကန့်အသတ်မရှိ ၀ယ်ယူနိုင်ပြီး ၀ယ်ယူလိုသူများက ဒီဇင်ဘာ ၁၅ ရက်နေ့မှ ဇန်နဝါရီ ၃ ရက်နေ့ အထိ ရှယ်ယာတာဝန်ယူရောင်းချမယ့် Securities Company (၆) ခု တစ်ဆင့် လျှောက်လွှာတင်သွင်းကာ လျှောက်ထားရမည်ဖြစ်သည်။
ရှယ်ယာဝယ်ယူခွင့်ရရှိသူများကို ဇန်နဝါရီလ ၂၃ ရက်နေ့တွင် ကြေငြာပေးသွားမှာဖြစ်ပြီး ရန်ကုန်စတော့အိတ်ချိန်းတွင် စာရင်းဝင်မည့်ရက်ကို ဇန်နဝါရီ ၂၄ ရက်နေ့တွင် ခန့်မှန်းထားသည်ဟု ကုမ္ပဏီက ထုတ်ပြန်ထားသည်။
TMH ၏ IPO ရောင်းချမှုနဲ့ပတ်သက်ပြီး ရန်ကုန်စတော့စျေးကွက်ကို လေ့လာနေသူတစ်ဦးဖြစ်သည့် ဦးစောက "အရင် ကုမ္ပဏီ တွေတုန်းကတော့ ထုတ်ရောင်းပြီးသား ရှယ်ယာတွေကိုပဲ ပြန်ပြီး အရောင်းအဝယ် လုပ်တာပေါ့။ အခုကုမ္ပဏီက ကနဦးရှယ်ယာ တွေ ပထမဆုံးရောင်းတာဆိုတော့ စိတ်ဝင်စားဖို့ကောင်းတယ်။ ဒါပေမယ့် အခု သိရသလောက်တော့ ကနဦးရှယ်ယာ ရောင်း တယ်ဆိုပေမယ့် မူရင်းစျေးအတိုင်းရောင်းပေးတာမဟုတ်ဘူး။ သူရဲ့ မူရင်းစျေးက တစ်ထောင်တဲ့ အဲဒါကို ၃၀၀၀ နဲ့ ၃၃၀၀ အတွင်းမှာ ရောင်းမှာဆိုတော့ အရင်ကုမ္ပဏီတွေလိုပဲ သပ်မကွာဘူး" ဟု သူ၏ အမြင်ကို ပြောပါတယ်။
ရန်ကုန်စတော့အိတ်ချိန်းတွင် မူလစာရင်းဝင်ကုမ္ပဏီများဖြစ်သည့် FMI ၊ MTSH ၊ မြန်မာနိုင်ငံသားများဘဏ်နှင့် ပထမပုဂ္ဂလိက ဘဏ် စသည်တို့၏ ရှယ်ယာများကို လွန်ခဲ့သည့် ၂ နှစ်အတွင်း ရောင်းချနေသော်လည်း ကနဦး IPO ရှယ်ယာများအဖြစ် ရောင်းချ ခြင်းမျိုးမဟုတ်ဘဲ ယခင်ထုတ်ဝေပြီးသား ရှယ်ယာတွေကိုသာ အရောင်းအဝယ်ပြုလုပ်နေခြင်းဖြစ်သည်။
TMH Telecom Public သည် Installation & Maintenance of Telecom Services ၊ ISP (Internet Service Provider) ၊ Prepaid Top Up Cards ထုတ်လုပ်ဖြန့်ဖြူးရောင်းချခြင်းလုပ်ငန်းများကို အကောင်အထည်ဖော်ဆောင်ရွက်ရန်အတွက် ၂၀၀၇ ခုနှစ် သြဂုတ်လ ၂၁ ရက်က စတင်တည်ထောင်ခဲ့ပြီး ၂၀၁၆ မေလ ၂၀ တွင် အများပိုင်ကုမ္ပဏီအဖြစ်ပြောင်းလဲကာ ဆက်သွယ် ရေးဆိုင်ရာလုပ်ငန်းများကို ဆက်လက်လုပ်ကိုင်လျက်ရှိသည်။
