ရန်ကုန်၊ ဒီဇင်ဘာ ၁၃ ။ ။ မြန်မာဂျာနယ်လစ်များဖြစ်သည့် ရိုက်တာသတင်းဌာနမှ ကိုသက်ဦးမောင် (ခေါ်) ကို၀လုံးနှင့် ကိုကျော်စိုးဦး တို့နှစ်ဦးကို ထောက်ကြန့်ရဲစခန်းမှ အစိုးရလျှို့ဝှက်ချက်ဥပဒေဖြင့် ဖမ်းဆီးထိန်းသိမ်းထားကြောင်းသိရသည်။
“ ကျွန်တော်သိတာတော့ မြန်မာနိုင်ငံအစိုးရလျှို့ဝှက်ချက်များ အက်ဥပဒေ ပုဒ်မ ၃နဲ့ ရဲမှူးတစ်ယောက်ကနေ တရားလိုလုပ်ပြီးတိုင်တယ်။ မနေ့ ညက ၁၁ ခွဲမှာ အဲ့လိုတော့သိထားတယ် “ ဟု မြန်မာဂျာနယ်လစ်ကွန်ယက်မှ ဦးဇေယျာလှိုင်က ဆိုသည်။
မောင်တောမြို့နယ် လုံခြံုရေးရဲတပ်ဖွဲ့ အစီရင်ခံစာမိတ္တူတချို့တွေ့ရှိခဲ့တာကြောင့် ယခုလို အစိုးရလျှို့ဝှက်ချက် များ အက်ဥပဒေ ပုဒ်မ ၃ဖြင့် တရားဆိုရခြင်းဖြစ်သည်ဟု ဘီဘီစီမြန်မာပိုင်းတွင် ရေးသားထားသည်။
အဆိုပါကိစ္စနှင့် ပက်သက်ပြီး ထောက်ကြန့်ရဲစခန်းနှင့် ရန်ကုန်တိုင်းရဲရုံး ပြောခွင့်ရပုဂ္ဂိုလ်တို့ထံ ဆက်သွယ်သော်လည်း ဖုန်းပြန်လည်ဖြေကြားခြင်းမရှိပေ။
အစိုးရလျှို့ဝှက်ချက်ဥပဒေနှင့် ပတ်သက်၍ “ ဒီဥပဒေဟာ ၁၄ နှစ်လောက်အထိသွားနိုင်တယ်။ ဒါ သတင်းမီဒီယာ လွတ်လပ်ခွင့်ရော လူ့အခွင့်အရေး အပုဒ် ၁၉ နဲ့ပတ်သက်တာရော မကိုက်ညီတဲ့အတွက် ဒါဟာမဖြစ်သင့်ပါဘူး။ ပြန်ဖျက်သင့်ပါလို့ပြောချင်ပါတယ်” ဟု တရားလွှတ်တော်ရှေ့နေ ဦးရောဘတ်စန်းအောင်က ပြောသည်။
လက်ရှိတွင် မြန်မာဂျာနယ်လစ်ကွန်ယက်မှ ဖမ်းဆီးခံသတင်းသမားများ၏ မိသားစုဝင်များနှင့် အဆက်အသွယ်ရရှိရန်ကြိုးပမ်းနေပြီး ထုတ်ပြန်စာတစ်စောင် ကိုလည်း ထုတ်ပြန်သွားမည်ဟုသိရသည်။
