စစ်တွေ၊ ဒီဇင်ဘာလ ၈ ရက်။ ။ စစ်တွေမြို့ ရဲတပ်ရင်း အမှတ် (၁၂) ရှေ့တွင်ရှိသည့် ဓါတ်ဆီဆိုင်တန်းတွင် ယနေ့ ဒီဇင်ဘာလ ၈ ရက်နေ့ ညနေ ၄ နာရီမိနစ် ၂၀ ခန့်က ဓါတ်ဆီများသိုလှောင်ထားသည့် ဂိုဒေါင်တစ်လုံး မီးလောင်မှုဖြစ်ပွားခဲ့သည်။
ယင်းဓါတ်ဆီဂိုဒေါင်တွင် လုပ်ကိုင်သူ ဦးမောင်သန်းက သိုလှောင်ထားသည့် ဆီဘုံးအဖုံးကို ချွတ်ရာကနေ အပူလွန်ကဲပြီး လျှော့ဖြစ်ရာကနေ မီးလောင်မှုဖြစ်ပွားခဲ့ခြင်းဖြစ်ပြီး ဘေးအိမ်များကို ကူးစက်လောင်ကျွမ်းခဲ့ခြင်း မရှိကြောင်း စစ်တွေမြို့ အမှတ် (၁) မြို့မ ရဲစခန်း တာဝန်ကျ ရဲအရာရှိက ပြောသည်။
“မီးလောင်တုန်းမှာ ဂိုဒေါင်အတွင်းမှာ အလုပ်သမားတစ်ဦးရှိတယ်။ အဲဒီအလုပ်သမားကနေပြီး ဆီဂိုဒေါင်မှာ သိုလှောင်ထားတဲ့ ဆီတိုင်ဂီရဲ့ အဖုံးကိုပြုပြင်တဲ့အခါမှာ အဖုံးကနေပြီး အပူလွန်ပြီး လျှော့ဖြစ်ပြီးတော့ မီးလောင်သွားတာပါ။ အလုပ်သမားဦးမောင်သန်းကိုတော့ ဖမ်းဆီးပြီးတော့ စစ်ဆေးနေပါတယ်။” ဟု စစ်တွေမြို့ အမှတ် (၁) မြို့မ ရဲစခန်း တာဝန်ကျ ရဲအရာရှိက ပြောသည်။
အဆိုပါမီးလောင်သွားသည့် ဓါတ်ဆီဂိုဒေါင်မှာ စစ်တွေမြို့ မိဇံရပ်ကွက်နေ ဒေါ်မသန်းရွှေ၏ ဂိုဒေါင်ဖြစ်ပြီး လက်ရှိမှာ ၎င်းဂိုဒေါင်ပိုင်ရှင်နှင့် တာဝန်ရှိသူများကို ဥပဒေအရ အရေးယူဆောင်ရွက်နိုင်ရေးအတွက် သက်ဆိုင်ရာက ဖမ်းဆီးပြီး စုံစမ်းစစ်ဆေးနေကြောင်းလည်း သိရသည်။ ယင်းမီးလောင်မှုမှာ Level 2 အဆင့် ရှိပြီး မီးသတ်ကား ၈ စီးခန့်ဖြင့် မီးငြိမ်းသတ်ခဲ့ရာ ညနေ ၆ နာရီခွဲ အချိန်ခန့်တွင် မီးငြိမ်းသွားခဲ့ပြီး မီးငြိမ်းသတ််နေစဉ်အတွင်း မီးသတ်တပ်ဖွဲ့ဝင် အရာရှိတစ်ဦး ထိခိုက်ဒဏ်ရာရရှိသွားခဲ့ကာ မီးလောင်ဆုံးရှုံးမှုတန်ဖိုးကို တွက်ချက်နေဆဲဖြစ်သည်ဟု စစ်တွေမြို့နယ် မီးသတ်တပ်ဖွဲ့က ဆိုသည်။
