မြန်မာ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်၏ တရုတ်ပြည် ခရီးစဉ်သည် အောင်မြင်မှုရှိကြောင်း တရုတ်သမ္မတ ရှီကျင့်ဖျင်က နိုဝင်ဘာ ၂၄ ရက်တွင် ပြောသည်။
ပေကျင်းရှိ ပြည်သူ့ခန်းမဆောင်တွင် ဗိုလ်ချုပ်မှူးကြီး မင်းအောင်လှိုင်နှင့် လက်ခံတွေ့ဆုံစဉ် ရှီကျင့်ဖျင်က ယင်းသို့ မှတ်ချက်ချ ပြောဆိုခြင်း ဖြစ်သည်။
တရုတ်-မြန်မာနှစ်နိုင်ငံသည် နက်ရှိုင်းသည့် အမြင်သဘောထားခြင်း ဖလှယ်မှုရှိကာ အရေးကိစ္စများစွာတွင် ဆန္ဒသဘောထား တူညီမှုသို့ တက်လှမ်းရောက်ရှိပြီဖြစ်ကြောင်း ၎င်းတို့နှစ်ဦး၏ ပြောဆိုဆွေးနွေးမှုအစတွင် ရှီကျင့်ဖျင်က အဖွင့်မှတ်ချက်စကားအဖြစ် ပြောဆိုသည်။
နိုဝင်ဘာ ၂၃ ရက်တွင် ဗိုလ်ချုပ်မှူးကြီး မင်းအောင်လှိုင်သည် ပေကျင်း၌ တရုတ် ဗဟိုစစ်ကော်မရှင် အဖွဲ့ဝင်နှင့် ဗဟိုစစ်ကော်မရှင် စစ်ဦးစီးချုပ်အဖွဲ့၏ ကာကွယ်ရေးဦးစီးချုပ် ဗိုလ်ချုပ်ကြီး Li Zuocheng နှင့်လည်း တွေ့ဆုံခဲ့သည်။
