သြစတျေးလျ-မြန်မာကုန်သည် စီးပွားရေးအသင်း၏ အမှုဆောင်အရာရှိချုပ်ဖြစ်သူ Jodi Weedon နှင့် တွေ့ဆုံခြင်း

သြစတျေးလျ-မြန်မာကုန်သည် စီးပွားရေးအသင်း၏ အမှုဆောင်အရာရှိချုပ်ဖြစ်သူ Jodi Weedon နှင့် တွေ့ဆုံခြင်း

“ သြစတျေးလျကုမ္ပဏီတွေအနေနဲ့လည်း မြန်မာပြည်လိုစျေးကွက်အသစ်ကို ၀င်ရောက်တဲ့အခါ စီးပွားရေးအရလိုက်နာမှုမျိုးတွေအတွက် လိုအပ်နေပြီးတော့ သူတို့ဆီမှာ မြန်မာပြည်စျေးကွက်အတွက် လုပ်ငန်းစဉ်တွေလည်းထားရှိလျက်ရှိပါတယ်။ ကျွန်မအနေနဲ့ကလည်းအသင်းရဲ့ အဖွဲ့ဝင် တွေရော..နောက်ထပ် အလားအလာရှိတဲ့ အဖွဲ့ဝင်အသစ်တွေရော မြန်မာပြည်မှာ ၀င်ရောက်ရင်းနှီးမြှုပ်နှံဖို့ ကြည့်ရှုတဲ့အခါ လိုအပ်တဲ့ လုပ်ငန်းစဉ်တွေအပေါ်မှာကောင်းကောင်းသိမြင်နားလည်ထားပါ တယ်”

မစ္စ ဂျိုဒီ ၀ီဒန်သည် ၂၀၁၃ ခုနှစ်ကတည်းက မြန်မာပြည်၌ ဖွဲ့စည်းထားသော သြစတျေးလျ-မြန်မာကုန်သည်စီးပွားအသင်း- AustCham Myanmar ၏ အမှုဆောင်အရာရှိချုပ် တစ်ဦးဖြစ်ပြီးသူမ၏   နောက်ခံကျွမ်းကျင်မှုသည် ရှေ့နေတစ်ဦးဖြစ်သည်။ ဂျိုဒီသည် အင်ဒိုနီးရှား၊ United Arab Emirates နှင့် အပြည်အပြည်ဆိုင်ရာ စီးပွားရေးလုပ်ငန်းကြီးများတွင် အတွေ့အကြံုရှိသော   ရှေ့နေတစ်ဦးလည်း ဖြစ်ရာသူမ၏ ကျွမ်းကျင်မှုများမှ တဆင့် မြန်မာနိုင်ငံ၏ စီးပွားရေးကဏ္ဍ ဖွံ့ဖြိုးတိုးတက်ရန်နှင့် သြစတျေးလျကုမ္ပဏီများ မြန်မာနိုင်ငံတွင် ၀င်ရောက်ရင်းနှီးမြှုပ်နှံနိုင်ရန် ဥပဒေပြုရေးအပိုင်း၊ ယင်းတို့ကိုစည်းရုံးလှုံ့ဆော်ရေးအပိုင်းစသည်တို့ကို နှစ်မြှုပ်လုပ်ကိုင်လျက်ရှိသည်။

ထို့အပြင် သြစတျေးလျ-မြန်မာကုန်သည် စီးပွားရေးအသင်းသည် မြန်မာအမျိုးသမီးများ စီးပွားရေးကဏ္ဍအတွင်း ဦးဆောင်မှုမြှင့်တင်ရေးခြေလှမ်းများကိုလည်း လှုံ့ဆော်၊ ပံ့ပိုးပေးလျက်ရှိသည်။

မဇ္စျိမ။    ။ ခင်ဗျားဟာရှေ့နေတစ်ယောက်ဖြစ်သလိုဘဏ္ဍာရေးလုပ်ငန်းနယ်ပယ်မှာလည်းအတွေ့အကြံုရှိတယ်၊ ဒီအတွေ့အကြံုတွေကနေ သြစတျေးလျ စီးပွားရေးလုပ်ငန်းတွေကို မြန်မာပြည်မှာ ဘယ်လို မြှင့်တင်သွားမလဲ?

ဂျိုဒီ။     ။ ကျွန်မကရှေ့နေတစ်ယောက်အဖြစ် အာရှတစ်ခွင်မှာအခုထိ နှစ်ပေါင်းများစွာအလုပ်လုပ်ကိုင်လျက်ရှိပါတယ်။ ပြီးတော့ သြစတျေးလျ-မြန်မာကုန်သည်လုပ်ငန်းရှင်အသင်းမှာ အမှုဆောင်အရာရှိချုပ်အဖြစ် အကျိုးပြုကဏ္ဍကနေ အလုပ်လုပ်နေပါတယ်။ ဒီအတွက်ကို ကျွန်မဆီမှာအားကောင်းတဲ့ အမြင်ရှိပါတယ်။ သြစတျေးလျ ကုမ္ပဏီတွေအနေနဲ့လည်း မြန်မာပြည်လိုစျေးကွက် အသစ်ကို ၀င်ရောက်တဲ့အခါ စီးပွားရေးအရလိုက်နာမှုမျိုးတွေအတွက် လိုအပ်နေပြီးတော့ သူတို့ဆီမှာ မြန်မာပြည်စျေးကွက်အတွက် လုပ်ငန်းစဉ်တွေလည်းထားရှိလျက်ရှိပါတယ်။ ကျွန်မအနေနဲ့ကလည်းအသင်းရဲ့ အဖွဲ့ဝင်တွေရော..နောက်ထပ် အလားအလာရှိတဲ့ အဖွဲ့ဝင်အသစ်တွေရော မြန်မာပြည်မှာ ၀င်ရောက်ရင်းနှီးမြှုပ်နှံဖို့ ကြည့်ရှုတဲ့အခါ လိုအပ်တဲ့ လုပ်ငန်းစဉ်တွေအပေါ်မှာကောင်းကောင်းသိမြင်နားလည်ထားပါတယ်။

အသင်းရဲ့ အခန်းကဏ္ဍအနေနဲ့ တရားဥပဒေပြုရေးအပိုင်းကိုလည်း အဖွဲ့ဝင်တွေကိုယ်စား စည်းရုံးလှုံဆော်ပေးရပါတယ်။ လွန်ခဲ့တဲ့ အချိန် တစ်နှစ်ခွွဲမှာလွှတ်တော်ကိုပေးပို့ထားတဲ့ ဥပဒေတွေရော၊ တစ်နှစ်ခွဲအတွင်း လွှတ်တော်က ပြဌာန်းထားတဲ့ ဥပဒေမူကြမ်းတွေရှိနေပါတယ်။ ကျွန်မတို့ အသင်းအနေနဲ့ နိုင်ငံခြားစီးပွားရေးအသင်းတွေနဲ့ ပြည်တွင်းက MCRB လို့ခေါ်တဲ့ တာဝန်သိ စီးပွားရေးလုပ်ငန်းများ အထောက်အကူပြုရေး မြန်မာဌာနနဲ့ စတာတွေနဲ့လည်း မြန်မာပြည်ကဥပဒေမူကြမ်းအသစ်တွေနဲ့ ရှိပြီးသားဥပဒေတွေအပေါ်မှာအကြံပေးနိုင်ဖို့ ပူးပေါင်းပြီးအလုပ်အတူလုပ်နေပါတယ်။ ကျွန်မကလည်းရှေ့နေတစ်ယောက်ဖြစ်တာကြောင့် ဒါတွေနဲ့ ပတ်သတ်ပြီးမျှော်လင့်စွာနဲ့ လုပ်ကိုင်သွားမှာဖြစ်ပါတယ်။

မဇ္စျိမ။    ။ သြစတျေးလျ-မြန်မာကုန်သည်စီးပွားရေးအသင်းရဲ့ အကြံအစည်တွေကဘာတွေလဲ

ဂျိုဒီ။     ။ ကျွန်မတို့မှာရည်ရွယ်ချက် ၄ ခုရှိပါတယ်။ ပထမတစ်ခုကဗဟုသုတမျှဝေခြင်းနဲ့ အရည်အသွေးတည်ဆောက်တဲ့နေရာမှာအာရုံစိုက်လုပ်ကိုင်နေပါတယ်။ ဒီအတွက်ကိုအင်္ဂလိပ်ဘာသာသင်တန်းတွေ၊ စီမံအုပ်ချုပ်ခြင်းဆိုင်ရာသင်တန်းတွေ၊ ဥပဒေရေးရာသင်တန်း၊ အမျိုးသမီးတွေအတွက် အလုပ်အကိုင် အင်တာဗျူးဖြေဆိုဖို့ သင်တန်း၊ ကိုယ်ရေးအချက်အလက်-CV ရေးသားခြင်းစတဲ့ သင်တန်းတွေကိုလုပ်ကိုင်နေပါတယ်။ ဒါ့အပြင် မြန်မာ့စီးပွားရေးလုပ်ငန်းတွေအတွက်အင်္ဂလိပ်ဘာသာသင်တန်းတွေ အများကြီးထွက်ပေါ်လာဖို့ကိုလည်း မြန်မာကုန်သည်စက်မှုအသင်းချုပ်-UMFCCI နဲ့လည်းပူးပေါင်းဆောင်ရွက်နေပါတယ်။နောက်ထပ် ရည်ရွယ်ချက်တစ်ခုကကွန်ရက်ဖြန့်ကျက်ခြင်းဖြစ်ပါတယ်။ လတိုင်းလတိုင်းအနည်းဆုံးကွန်ရက်ဖြန့်ကျက်တဲ့ အစီအစဉ်၂ ခုကို ကျွန်မတို့ ကျင်းပလေ့ရှိပါတယ်။ ကျွန်မတို့က အဖွဲ့ဝင်မဟုတ်တဲ့ သူတွေအများကြီးရှိပြီးတော့ သူတို့လည်းလာရောက်နိုင်ပါတယ်။ ပြီးတော့ ရှိပြီးသားအဖွဲ့ဝင်တွေနဲ့ တွေ့ဆုံနိုင်မယ့် အခွင့်အလမ်းတွေ ရရှိမှာဖြစ်ပါတယ်။ ပြီးတော့ လ တစ်လချင်းဆီမှာလည်းအခြား နိုင်ငံခြားကုန်သည်စီးပွားရေးအဖွဲ့တွေနဲ့လည်းပူးတွဲကျင်းပတဲ့ ကွန်ရက်အစီအစဉ်တွေရှိပါတယ်။

မဇ္စျိမ။    ။ နာမည်က…

ဂျိုဒီ။     ။ ကျွန်မတို့ဆီမှာ နိုင်ငံခြားကုန်သည် စီးပွားအသင်းအဖွဲ့တွေ အများကြီးရှိပါတယ်။ ပြင်သစ်ကုန်သည်စီးပွားအသင်း၊ ဥရောပကုန်သည်စီးပွားအသင်း၊ဗြိတိန် ကုန်သည်စီးပွားအသင်း၊ တစ်ခြားလည်းရှိပါသေးတယ်။ဒီကွန်ရက်တွေကနေလည်း ကျွန်မတို့ရဲ့ အဖွဲ့ဝင်တွေအတွက် ကြီးမားတဲ့ အခွင့်အလမ်းတွေကိုပေးစွမ်းနိုင်မယ်လို့ ထင်ပါတယ်။ တတိယရည်ရွယ်ချက်တစ်ခုကတော့ စည်းရုံးလှုံဆော်ရေးဖြစ်ပါတယ်။ ဒါကြောင့် ကျွန်မတို့ရဲ့ အဖွဲ့ဝင်တွေရော၊ စီးပွားရေးအဖွဲ့အစည်းတွေနဲ့ရောစကားအများကြီးပြောဆိုဆွေးနွေးဖို့ အချိန်တွေ အများကြီးအသုံးပြုခဲ့ပါတယ်။ဘာတွေ ပြောကြသလဲဆိုရင်အခုအစိုးရကဖော်ဆောင်နေတဲ့ ဥပဒေပြုရေး၊ လုပ်နေဆဲဖြစ်တဲ့ ဥပဒေမူကြမ်းနဲ့ မူဝါဒတွေမှာ ပတ်သတ်ပြီးသူတို့ ဘာတွေ ထင်မြင်ကြသလဲဆိုတာတွေပါ။ ကျွန်မအနေနဲ့ လည်း အဖွဲ့ဝင်တွေကိုယ်စား စည်းရုံးလှုံဆော်ပြောဆိုဖို့ ဆန္ဒရှိနေပါတယ်။

နောက်ဆုံးလေးခုမြောက်ရည်ရွယ်ချက်ကတော့ တာဝန်သိ ရင်းနှီးမြှုပ်နှံမှုလုပ်ငန်းတွေကို မြှင့်တင်ဖို့ဖြစ်ပါတယ်။ကျွန်မအနေနဲ့ သြစတျေးလျ ကုမ္ပဏီတွေဟာဒါကိုလုပ်ကိုင်ဖို့အတွက် အလေ့အကျင့်ကောင်းတွေကို မြှင့်တင်ဖို့ ကောင်းမွန်တဲ့ ရပ်တည်ချက်တွေ ရှိတယ်လို့ ထင်ပါတယ်။ ကျွန်မတို့ကလည်း မြန်မာမှာရင်းနှီးမြှုပ်နှံမှုတွေလုပ်ဖို့ အားပေးမှာဖြစ်ပြီး တာဝန်သိ ရင်းနှီးမြှုပ်နှံမှုတွေ အဖြစ် သေချာသွားအောင် ဆောင်ရွက်မှာဖြစ်ပါတယ်။

မဇ္စျိမ။    ။ ဂျိုဒီခင်ဗျားဟာလွန်ခဲ့တဲ့ အချိန် တစ်နှစ်ခွဲကတည်းကနေစပြီးအသင်းမှာ ကျွမ်းကျင်မှုကို နှစ်မြှုပ်လုပ်ကိုင်နေတယ်၊ အခုအချိန်မှာအဲဒိအချိန် တစ်နှစ်ခွဲကထူးခြားတဲ့ အောင်မြင်မှုတွေကဘာတွေလဲ

ဂျိုဒီ။     ။ လွန်ခဲ့တဲ့ တစ်နှစ်ကမှာအောင်မြင်မှုတွေ အများကြီးရှိတယ်ဆိုတာ ကြားသိခဲ့ရပြီးပါပြီ။။ ကျွန်မတို့ အသင်းဟာ ၂၀၁၇ ခုနှစ် အာရှ-ပစိဖိတ်ရဲ့ အငယ်စားကုန်သည် စီးပွားအသင်းဆုကိုလည်းရရှိခဲ့ပါတယ်။ ဒီဆုကိုပေးတာကတီထွင်ဆန်းသစ်မှုအစီအစဉ်တွေအတွက် ခိုင်ခိုင်လုံလုံလုပ်ကိုင်နိုင်တာကြောင့်နဲ့ အဖွဲ့ဝင်အရေအတွက် အကြီးအကျယ် တိုးတက်ခဲ့တာကြောင့် ဖြစ်ပါတယ်။ အသင်းသားအရေအတွက်ဆိုရင် တစ်နှစ်ထဲမှာပဲ ၅၀ ရာခိုင်နှုန်းကျော် တိုးတက်ခဲ့ပါတယ်။ ဒါ့အပြင် မနှစ်ကကျင်းပတဲ့ စီးပွားရေးလုပ်ငန်းတွေမှာ အမျိုးသမီးများဦးဆောင်မှုကဏ္ဍ ညီလာခံကိုကျင်းပနိုင်တာ အပါအဝင်လည်းဖြစ်ပါတယ်။ ဒီညီလာခံကိုလည်းလာမယ့် သောကြာနေနဲ့ စနေနေ့တွေမှာထပ်ပြီးကျင်းပသွားမှာဖြစ်ပါတယ်။

ဒီအစီအစဉ်တွေကိုတော့ ကျွန်မကဥက္ကဌအဖြစ် ဆောင်ရွက်နေပြီးMCRB က ဗစ်ကီဘိုးမန်းကတွဲဖက် ဥက္ကဌအဖြစ် ဆောင်ရွက်တဲ့ တာဝန်သိ စီးပွားရေးလုပ်ငန်းများ အလုပ်အဖွဲ့ကနေတောက်လျှောက် လုပ်ကိုင်နေတာဖြစ်ပါတယ်။

ကျွန်မတို့ ကုန်သည်စီးပွားအသင်းဟာ ထင်ထင်ရှားရှားနဲ့ကို တိုးတက်နေပါတယ်။ ဘာဖြစ်လို့လဲဆိုရင် ကျွန်မတို့ဟာတက်ကြွတဲ့ အသင်းအဖွဲ့ဖြစ်တာကြောင်နဲ့ စျေးကွက်ထဲမှာ   စောစောရောက်နေပြီးတာကြောင့်ပါ။ ကျွန်မတို့ဟာ ပြည်သူတွေရဲ့ စကားသံတွေကိုနားထောင်ပါတယ်။ ကျွန်မတို့ဟာ စီးပွားရေးအသိုက်အဝန်းတွေရော အဖွဲ့ဝင်မဟုတ်တဲ့ သူတွေနဲ့ရောတစ်စိတ်တစ်ဒေသဖြစ်ပါတယ်။

မဇ္စျိမ။    ။ အမျိုးသမီးနဲ့ပတ်သတ်တဲ့ အကြောင်းအရာကိုထပ်သွားရအောင်၊ ဘာကြောင့်လဲဆိုရင် သြစတျေးလျ-မြန်မာကုန်သည်စီးပွားအသင်းအနေနဲ့ ပြီးခဲ့တဲ့ နှစ်တွေကနေစပြီး စီးပွားရေးလုပ်ငန်းတွေမှာအမျိုးသမီးတွေကို မြှင့်တင်ဖို့ စိတ်ပါ၀င်စားနေတာကို သိခဲ့ရတယ်၊ ဘာကြောင့် စိတ်ဝင်စားတာပါလဲ

ဂျိုဒီ။     ။ ကျွန်မရဲ့ ပုဂ္ဂိုလ်ရေးအရမှာလည်းဘယ်နိုင်ငံကအမျိုးသမီးအကြောင်းအရာကိုမဆို စိတ်ဝင်စားပါတယ်။

မဇ္စျိမ။    ။ ခင်ဗျားကအမျိုးသမီးဖြစ်နေတာလည်းပါတာပေါ့

ဂျိုဒီ။     ။ ဟုတ်ပါတယ်၊ အမျိုးသမီးဖြစ်နေလို့ပါ။ ကျွန်မမှာအမေရှိတယ်၊ အဘွားရှိတယ်၊ ညီမ၊ အစ်မလည်းရှိတယ်၊အခု မြန်မာအမျိုးသမီးတွေ ရင်ဆိုင်နေရတဲ့ အကြောင်းအရာတွေဆိုတာကလည်းဒီမှာမှ မဟုတ်ပါဘူး၊ ခွဲခြားဆက်ဆံခံရတာလည်းကမ္ဘာအနှံ့မှာ ဖြစ်ပျက်နေတဲ့ အကြောင်းအရာဖြစ်ပါတယ်။ သြစတျေးလျမှာလဲအတူတူပါပဲ။ ကျွန်မကတော့ အမျိုးသမီးကိစ္စ၊ စီးပွားရေးကဏ္ဍကအမျိုးသမီးတွေရဲ့ ဖွံ့ဖြိုးရေးကိုအမြဲအာရုံစိုက်ထားတယ်၊ စီးပွားရေးသဘောအရလည်းဘက်မမျှတာ၊ မတူညီတာတွေ ရှိနေပါတယ်။

မဇ္စျိမ။    ။ မြန်မာအမျိုးသမီးတွေ ရင်ဆိုင်နေရတဲ့ စိန်ခေါ်မှုတွေကိုကျေးဇူးပြုပြီးပြောပြနိုင်မလား

ဂျိုဒီ။     ။ မိသားစုတွင်းမှာဆိုရင် အမျိုးသမီးတွေဆိုတာအိမ်မှာပဲနေထိုင်ရမယ်ဆိုတဲ့ မျှော်လင့်ချက်ထားတာမျိုး၊ အဆင့်မြင့်တဲ့ အသက်မွေးဝမ်းကြောင်း တိုးတက်ဖို့ကလည်းအကန့်အသတ်တွေ ရှိနေပါတယ်။ ခွဲဲခြားဆက်ဆံခံရတာလည်း အများကြီးပါ။ အဲဒိခွဲခြားဆက်ဆံခံနေရတာတွေ ဆက်မဖြစ်ဖို့ အမှန်တကယ်ကိုအားကောင်းတဲ့ ဥပဒေပြုရေးတွေ လိုအပ်နေပါတယ်။ ကျွန်မတို့ အမျိုးသမီးတွေ၊ လွှတ်တော်ထဲကိုရောက်ဖို့ လိုအပ်ပါတယ်။ စီးပွားရေးအဖွဲ့အစည်းတွေနဲ့ အသင်းအဖွဲ့တွေရဲ့ အုပ်ချုပ်ရေးအပိုင်းတွေမှာအမျိုးသမီးတွေကို ကျွန်မတို့ မြင်တွေ့ဖို့ လိုအပ်ပါတယ်။ အမျိုးသမီးတွေရဲ့ အသံတွေကို ကြားဖို့လည်းလိုအပ်ပါတယ်။ အဲဒိကနေအမျိုးသမီးတွေ စီးပွားရေးကဏ္ဍမှာ ပါ၀င်ပတ်သတ်ဖို့အတွက် အားပေးကူညီနိုင်မှာဖြစ်ပါတယ်။

မဇ္စျိမ။    ။ မိသားစုဝင်ငွေကို စီမံခန့်ခွဲဖို့နဲ့ ပြသနာတွေကိုကိုင်တွယ်ဖို့ဆိုတဲ့နေရာမှာကျေးလက်ဒေသကအမျိုးသမီးတွေရဲ့ ဘဝတွေနဲ့ ပတ်သတ်ပြီးဘယ်လိုသိမြင်ထားပါသလဲ

ဂျိုဒီ။     ။ ကျွန်မအနေနဲ့ ကျေးလက်ဒေသမှာနေထိုင်အလုပ်လုပ်ကိုင်နေတဲ့ အမျိုးသမီးတွေနဲ့ အတူအလုပ်အတူလုပ်ကိုင်နေတဲ့ အဖွဲ့ဝင်တစ်ချို့ကုုိစကားပြောဆိုဖူးတဲ့ ပုံအရဆိုအဲဒိအမျိုးသမီးတွေဟာသူတို့ရဲ့ မိသားစုဘဏ္ဍာရေးထိန်းသိမ်းစောင့်ရှောက်တာ၊ အိမ်ထောင်စုကိုထိန်းသိမ်းတဲ့ နေရာမှာသိပ်ကိုအံ့အားသင့်စရာကောင်းတာကို ကြားရပါတယ်။ စာရင်းဇယားတွေမှာဆိုအမျိုးသမီးတွေဟာ ပိုက်ဆံကိုထိန်းထိန်းသိမ်းသိမ်းသုံးတတ်တာကို ပြသနေပါတယ်။ကလေးတွေ ပညာသင်ကြားဖို့၊ မိသားစုအစားအသောက်အတွက် သူတို့ကပိုက်ဆံသုံးကြပါတယ်။ စီးပွားရေးအသိုက်အဝန်းတွေထဲက အဖွဲ့ဝင်တွေ ကျွန်မကိုပြောတာတော့စီးပွားရေးလုပ်ပိုင်ခွင့်လည်းမရှိဘဲငွေကြေးအကန့်အသတ်အများကြီးရှိတဲ့ အမျိုးသမီးတွေကို ကျွန်မတို့ ထောက်ပ့ံပေးနိုင်ဖို့ကမှန်ကန်တဲ့ နည်းလမ်းတစ်ခုဖြစ်ပြီး ဒါဟာအရေးကြီးတယ်ဆိုတာပါပဲ။အခုနို၀င်ဘာလ ၂၅ ရက်နေ့၊စနေ့နေ့မှာကျင်းပမယ့် ကျွန်မတို့ရဲ့ စီးပွားရေးကဏ္ဍအမျိုးသမီးများဦးဆောင်နိုင်မှု ညီလာခံမှာအမျိုးသမီးတွေအတွက် အခြားရွေးချယ်စရာ အလုပ်အကိုင်ကဏ္ဍ၊ မိရိုးဖလာမဟုတ်တဲ့ အခန်းကဏ္ဍနဲ့ အမျိုးသမီးတွေ စိတ်ဝင်စားတဲ့ အကြောင်းအရာတစ်ခုခုကိုအားပေးကူညီတာတွေ စတဲ့ ဆွေးနွေးမယ့် အစိတ်အပိုင်းတွေပါ၀င်မှာဖြစ်ပါတယ်။ ပြီးတော့ ဒီကနေအောင်မြင်တဲ့ စိတ်ဝင်စားစရာဇာတ်လမ်းအကြောင်းအရာတွေကိုလည်းနားထောင်ရမှာဖြစ်ပါတယ်။ ပြီးတော့ အမျိုသမီးအသေးစားအလတ်စား လုပ်ငန်းတွေနဲ့ ပတ်သတ်ပြီး ကျွန်မတို့ တကယ့်ကိုဦးတည်သွားမှာဖြစ်ပါတယ်။ အဲဒိညီလာခံကနေ စီးပွားရေးလုပ်ငန်းတစ်ခုကို ဘယ်လိုတည်ထောင်လဲ၊   ငွေကြေးအထောက်အပံ့တွေကို ဘယ်လိုရယူလဲ၊ ယနေ့ ဒီဂျစ်တယ်ခေတ်ကြီးထဲမှာဘရန်း(Brand ) ကိုဘယ်လိုတည်ဆောက်မလဲစတဲ့ အကြောင်းအရာတွေကိုလည်းနားထောင်ရမှာဖြစ်ပါတယ်။

မဇ္စျိမ။    ။ အဲဒိတော့ သြစတျေးလျ-မြန်မာကုန်ုသည်စီးပွားအသင်းရဲ့ မြန်မာအမျိုးသမီးတွေအတွက် အထောက်အကူပြုအစီအစဉ်တွေကဘာတွေလဲဆိုတာပြောပြနိုင်မလား

ဂျိုဒီ။     ။ ရှိတာပေါ့၊ ကျွန်မတို့မှာ အစီအစဉ်တွေ အများကြီးရှိပါတယ်။

ဒီစီးပွားရေးကဏ္ဍ အမျိုးသမီးများခေါင်းဆောင်မှု ညီလာခံမှာနဲ့ ဂါလာ-Galaညစာစားပွဲဟာဆိုရင်လည်းတစ်ခုအပါ အဝင် ဖြစ်ပါတယ်။ ဒါဟာအမျိုးသမီးတွေကိုစွမ်းဆောင်ရည် မြှုင့်တင်တဲ့ အစီအစဉ်လည်းဖြစ်ပါတယ်။ ညစာစားပွဲကိုပရိသတ် ၂၅၀ လောက် တက်ရောက်မယ်လို့ မျှော်လင့်ထားပြီးတနင်္ဂနွေအတွက်လည်းပရိသတ် ၅၀၀-၆၀၀ လောက် လာပြီးတော့ စိတ်ဝင်စားစရာ ဇာတ်လမ်းအကြောင်းအရာတွေကိုလည်းနားထောင်ကြပါလိ်မ့်မယ်။ ကျွန်မတို့မှာတစ်ခြားအမျိုးသမီးကဏ္ဍ အထူးပြု အစီအစဉ်များစွာလည်းရှိပါတယ်။ ၂၀၁၇ ခုနှစ် မတ်လတုန်းက အပြည်ပြည်ဆိုင်ရာ အမျိုးသမီးများနေ့ အတွက် ပထမအကြိမ်စတင်ခဲ့တဲ့ မြန်မာအမျိုးသမီးရက်သတ္တပတ် အခမ်းအနားကိုလည်းကူညီပေးခဲ့ပါတယ်။ အမျိုးသမီးတွေ တက်ရောက်နိုင်အောင် အခွင့်အလမ်းများစွာလည်း   ထောက်ပံ့ပေးခဲ့ပါတယ်။ ကျွန်မတို့ဟာအလုပ်အကိုင် မကျွမ်းကျင်သေးတဲ့အမျိုးသမီးတွေ၊ တက္ကသို်လ် ကျောင်းသူတွေ အတွက်လည်းကိုယ်ရေးအချက်အလက်-CV ကိုဘယ်လိုရေးရလဲ၊ အင်တာဗျူး ဘယ်လိုဖြေဆိုရမလဲ၊ အလုပ်ရသွားတဲ့အခါ ဘယ်လို ပြုမူနေထိုင်ရမလဲစတဲ့ လက်ဆင့်ကမ်းသင်တန်းတွေ ပေးခဲ့ပါတယ်။ ဒါဟာလည်း ကြီးကြီးမားမားအောင်မြင်ခဲ့ပါတယ်။ အဲဒိအခမ်းအနားကိုလူပေါင်း ၃၀၀ လောက် တက်ရောက်ခဲ့ပါတယ်။ အများစုကတော့ အမျိုးသမီးတွေပါ။ ခွဲခြားဆက်ဆံမှု တိုက်ဖျက်ရေး၊ ဥပဒေအသစ်တွေပြဌာန်းနိုင်ရေးစတာတွေဟာလည်း ကျွန်မတို့ တာဝန်သိ ရင်းနှီးမြှုပ်နှံမှုလုပ်ငန်းများပူးပေါင်းမှု အလုပ်အဖွဲ့ရဲ့ ဆောင်ရွက်မှုတွေဖြစ်ပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly