ပြည်ပပို့ကုန်လုပ်ငန်းများထံ ကုန်ချောနှင့် တစ်စိတ်တစ်ပိုင်းကုန်ချောများ ရောင်းချနေသည့် လုပ်ငန်းငယ်များကို ရာနှုန်းပြည့် ပြည်ပတင်ပို့သည့် လုပ်ငန်းအဖြစ် သတ်မှတ်

ပြည်ပပို့ကုန်လုပ်ငန်းများထံ ကုန်ချောနှင့် တစ်စိတ်တစ်ပိုင်းကုန်ချောများ ရောင်းချနေသည့် လုပ်ငန်းငယ်များကို ရာနှုန်းပြည့် ပြည်ပတင်ပို့သည့် လုပ်ငန်းအဖြစ် သတ်မှတ်

ပြည်တွင်းမှ ထုတ်လုပ်ထွက် ရှိသည့် ကုန်ချောပစ္စည်းများနှင့် တစ်စိတ်တစ်ပိုင်း ကုန်ချောထုတ်ကုန်များကို ပြည်တွင်း စျေးကွက်အတွင်း ရောင်းချခြင်းမပြုဘဲ  ပြည်ပသို့ ရာခိုင်နှုန်းပြည့် တင်ပို့နေသည့်   ရင်းနှီးမြှုပ်နှံမှု လုပ်ငန်းများ ထံရောင်း ချနေသည့် ရင်းနှီးမြှုပ်နှံမှုလုပ်ငန်းများအား ပြည်ပသို့ ရာခိုင်နှုန်းပြည့်တင်ပို့သည့် ရင်းနှီး မြှုပ်နှံမှု လုပ်ငန်းဖြစ် သတ်မှတ် ကြောင်း မြန်မာနိုင်ငံရင်းနှီးမြှုပ်နှံမှုကော်မရှင်မှ သိရသည်။

ရည်ရွယ်ချက်အနေနှင့် ပြည်တွင်းရှိ ပို့ကုန်လုပ်ငန်းများကို အားထားလုပ်ကိုင်နေရသည့် အသေးစားအလတ်စားစီးပွားရေး လုပ်ငန်းများ-SMEs  ပိုမို ဖွံ့ဖြိုးစေရန် ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာန၏ ညွှန်ကြားရေးမှူး ချုပ်- ဦးအောင်နိုင်ဦးက မဇ္စျိမ၏ မေးမြန်းမှုကို ဖြည့်စွပ်ပြောဆိုသည်။

“ပြည်တွင်းအထည်ချုပ်လုပ်ငန်း ၊ အထည်ချုပ်နှင့်ဆက်စပ်သည့်လုပ်ငန်းများနဲ့ အသေးစား ၊ အလတ်စားလုပ်ငန်းလေးများ ဖွံ့ဖြိုးတိုးတက်လာစေဘို့ ရည်ရွယ်ဆောင်ရွက်ပေးလိုက်တာပါ”  ဟု ဦးအောင်နိုင်ဦး က ပြောသည်။

နိုဝင်ဘာလ ၂၀ ရက်က မြန်မာနိုင်ငံရင်းနှီးမြှုပ်နှံမှုကော်မရှင်မှ ထုတ်ပြန်သည့် အမိန်ကြော်ငြာစာအမှတ် (၈၇/၂၀၁၇) အရ  အဆိုပါလုပ်ငန်းများအနေနှင့် ပြည်ပသို့ ရာခိုင်နှုန်းပြည့် တင်ပို့သည့် ရင်းနှီးမြှုပ်နှံမှု လုပ်ငန်းများအဖြစ် သတ်မှတ်ခံရ သည့်အတွက် အကောက်ခွန်ကင်းလွတ် သို့မဟုတ် သက်သာခွင့်လျှောက် ထားနိုင်မည်ဖြစ်ကြောင်း ဖော်ပြထားသည်။

ဦးအောင်နိုင်ဦးက -''အကောက်ခွန် ကင်းလွတ်ခွင့် ဒါမှမဟုတ် သက်သာခွင့်တွေကို အခုစလျှောက်လို့ရပါပြီ” ဟု ဆိုသည်။

အဆိုပါအမိန်ကြော်ငြာစာထုတ်ပြန့်သည့် ရက်မှ စတင်ကာ ယင်းရင်းနှီးမြှုပ်နှံမှု လုပ်ငန်းများသည် မြန်မာနိုင်ငံရင်းနှီးမြုပ်နှံမှု ဥပဒေ ပုဒ်မ ရ၇ (ခ)နှင့်အညီ အကောက်ခွန် ကင်းလွတ် သို့မဟုတ် သက်သာခွင့်များ လျှောက်ထားနိုင်ပြီဖြစ်ကြောင်း သိရသည်။

Mizzima Weekly