ကုလသမဂ္ဂ၊ အမေရိကန်ပြည်ထောင်စု၊ နိုဝင်ဘာ ၁၇ ။              ။ ဆီးရီးယား၌ဖြစ်ပွားခဲ့သော ဓာတုအဆိပ်လက်နက်ဖြင့် တိုက်ခိုက်မှု၏နောက်ကွယ်မှ လက်သည်တရားခံကို ကုလသမဂ္ဂမှဦးဆောင်ပြီးစုံစမ်းစစ်ဆေးနေမှုအား တိုးချဲ့လုပ်ဆောင်မည့်အစီအစဉ်ကို ကုလသမဂ္ဂလုံခြံုရေး ကောင်စီ၌ ကြာသာပတေးနေ့က ရုရှားတို့ဘက်မှ ဗီတာအာဏာသုံး၍ ထပ်မံပယ်ချခဲ့သည်။

ယခုအကြိမ်သည် ရုရှားတို့ဘက်မှ ၄င်းတို့၏မဟာမိတ်ဖြစ်သော ဆီးရီးယားနိုင်ငံအပေါ်ပစ်မှတ်ထားသည့် ကောင်စီ၏လုပ်ရပ်ကို ၁၀ ကြိမ်မြောက် ဗီတိုအာဏာသုံး၍ ဆန့်ကျင်လိုက်ခြင်းဖြစ်သည်။

အမေရိကန်တို့ဘက်မှအဆိုပြုထားသည့် ပူးပေါင်းစုံစမ်းမှုယန္တရား (JIM) အဖွဲ့အား ဆီးရီးယားအဆိပ်ဓာတ်ငွေ့ တိုက်ခိုက်မှု၏တရားခံကို ဖော်ထုတ်နိုင်ဖို့ ဆက်လက်လုပ်ကိုင်ခွင့်ပေးမည့်အစီအစဉ်ကို ကောင်စီအဖွဲ့ဝင် ၁၅ နိုင်ငံမှ ၁၁ နိုင်ငံက ထောက်ခံမဲပေးခဲ့ကြသော်လည်း ရုရှားတို့က ဗီတိုအာဏာသုံး၍ ပယ်ချလိုက်ခြင်းဖြစ်သည်။

အဆိုပါအစီအမံနှင့်ပက်သက်၍ အီဂျစ်နှင့်တရုတ်နိုင်ငံတို့က မဲမပေးပဲကြားနေခဲ့ကြသော်လည်း ဘိုလစ်ဗီးယား နိုင်ငံက ရုရှားနှင့်အတူ ဆန့်ကျင်မဲပေးခဲ့သည်။

ထိုကိစ္စနှင့်ပက်သက်၍ အမေရိကန်သံတမန် နစ်ကီဟာလေက ဆန့်ကျင်ဝေဖန်ခဲ့ပြီး “ရုရှားတို့ဟာ ကောင်စီက တစ်ခဲနက်ထောက်ခံနေတဲ့ စုံစမ်းစစ်ဆေးရေးယန္တရားအဖွဲ့ကို သတ်ပစ်လိုက်တာပါပဲ” ဟု ပြောဆိုခဲ့သည်။

JIM အဖွဲ့ကို တစ်နှစ်သက်တမ်းတိုးပြီး လုပ်ကိုင်ခွင့်ပေးမည့်ကိစ္စနှင့်စပ်လျင်း၍ အမေရိကန်နှင့်ရုရှားတို့သည် လုံခြံုရေးကောင်စီ၌ အချေအတင်ဖြစ်နေကြခြင်းဖြစ်သည်။ ကောင်စီ၌ မူကြမ်းတစ်ခုအတည်ပြုနိုင်ဖို့ မဲကိုးမဲ လိုအပ်သော်လည်း ရုရှား၊ ဗြိတိန်၊ တရုတ်၊ ပြင်သစ်နှင့် အမေရိကန်တို့သည် မည်သည့်အဆိုပြုချက်ကိုမဆို ဗီတိုအာဏာသုံး၍ ပယ်ချနိုင်ခွင့်ရှိသည်။

ဆီးရီးယားနိုင်ငံ ခန်းရှိတ်ခန်းရွာ၌ဖြစ်ပွားခဲ့သော အဆိပ်ဓာတ်ငွေ့တိုက်ခိုက်မှုကြောင့် လူပေါင်းများစွာသေဆုံးခဲ့ ရမှုတွင် ဆီးရီးယားလေတပ်အား JIM အဖွဲ့၏အစီရင်ခံစာထဲ၌   ပြစ်တင်ဝေဖန်ထားသောကြောင့် ရုရှားတို့ဘက်မှ JIM အဖွဲ့ကို အပြစ်ရှာဝေဖန်နေခြင်းဖြစ်သည်။