ရန်ကုန်၊ နိုဝင်ဘာ ၁၄ ။ ။ ချင်းပြည်နယ် ပလက်ဝတွင် မြန်မာ့တပ်မတော်နှင့် AA ဖြစ်ပွားနေသည့် တိုက်ပွဲများနှင့် ပတ်သက်ပြီး နိုင်ငံရေး နည်းအရ ငြိမ်းချမ်းစွာ ဆွေးနွေး အဖြေရှာချင်သည်ဟု ရက္ခိုင့်တိုင်းရင်းသားလက်နက်ကိုင်အဖွဲ့ (AA) မှပြန်ကြားရေးတာဝန်ခံ ဦးခိုင်သုခ က ပြောသည်။
“တကယ် ငြိမ်းချမ်းရေးကို လိုလားတယ်ဆိုလို့ရှိရင် တပ်မတော်အနေနဲ့အခုလို ထိုးစစ်တွေကို ရပ်ဖို့လိုတယ်။ ကျွန်တော်တို့ AA အနေနဲ့ ဘယ်ပြသာနာကိုမဆို ငြိမ်းငြိမ်းချမ်းချမ်းနဲ့ ဖြေရှင်းချင်တယ်။ နိုင်ငံရေးပြသာနာေ တွကို နိုင်ငံရေးနည်းအရ ဖြေရှင်းနိုင်တဲ့ဆန္ဒအများကြီးရှိပါတယ် ”ဟု ရက္ခိုင့်တိုင်းရင်းသားလက်နက်ကိုင်အဖွဲ့ (AA) မှ ပြန်ကြားရေးတာဝန်ခံ ဦးခိုင်သုခက မဇ္ဈိမသို့ ပြောသည်။
သို့သော်လည်း ယနေ့ (နိုဝင်ဘာ ၁၄ ရက် ) တွင် ကုလားတန်မြစ်အထက်ပိုင်း ၄ နေရာ၌ တပ်မတော်နှင့် တိုက်ပွဲများ ပြင်းထန်နေဆဲဖြစ်ကြောင်း AA အဖွဲ့ မှ ပြောသည်။
စစ်ဘေးရှောင် အရည်အတွက်နှင့် တိုက်ပွဲအရှိန်ပိုမိုပြင်းထန်လာနိုင်သည့် တိုက်ပွဲများသည် နိုဝင်ဘာ ၁ ရက်နေ့မှစတင်ကာ ယနေ့ ( နိုဝင်ဘာ ၁၄ ရက် ) ထိ ၁၄ ရက်တိတိကြာမြင့်ခဲ့ပြီဖြစ်သည်။
နိုဝင်ဘာ ၈ ရက်နေ့တွင်လည်း AA အဖွဲ့ ပစ်ခတ်မှုကြောင့် အရပ်သားတစ်ဦး သေဆုံးခဲ့သည်ဟုအစိုးရဘက်မှ ထုတ်ပြန်ထားသည်။
အဆိုပါကိစ္စနှင့် ပက်သက်ပြီး နိုင်ငံတော်အတိုင်ပင်ခံရုံး ညွှန်ကြားရေးမှူးချုပ် ဦးဇော်ဌေးက “ ဒါကတော့ နိုင်ငံတော်အစိုးရရော လုံခြံုရေးတပ်ဖွဲ့ဝင်တွေ ရော အကုန်လုံးကတော့ ပြည်သူထိခိုက်လာတဲ့အခါမှာ ထုံးစံအတိုင်းပေါ့ ပြန်ပြီးတော့တိုက်ခိုက်ရမှာပေါ့ “ ဟုဆိုသည်။
မည်သို့ပင် ဆိုစေကာမူ ချင်းပြည်နယ် ပလက်ဝတွင် ဖြစ်ပွားနေသည့်တိုက်ပွဲများကြောင့် ကျေးရွာအတွင်း လက်နက်ကြီး ကျခြင်းကဲ့သို့ဖြစ်စဉ်များအပြင် နေရပ်စွန်ခွာထွက်ပြေးနေရသည့် စစ်ဘေးရှောင် အနည်းဆုံး ၃၀၀ ထက် မနည်းရှိနေပြီဖြစ်သည်။
ရက္ခိုင့်တိုင်းရင်းသားလက်နက်ကိုင်အဖွဲ့ (AA) သည် ၂၀၁၅ ခုနှစ်ခန့်မှစတင်ကာ တပ်မတော်နှင့် တိုက်ပွဲများ အပြင်းအထန်ဖြစ်ပွားသည့်အဖွဲ့တစ်ခု ဖြစ်သည့်အပြင် တရားမဝင် အဖွဲ့အစည်းအဖြစ် အစိုးရမှ ကြေညာထား သည်။
