မြောက်ကိုရီးယား သံတမန်တစ်ဦးကို မြန်မာထုတ်ပစ်ခဲ့ဟု ကုလအစီရင်ခံစာဖော်ပြ

မြောက်ကိုရီးယား သံတမန်တစ်ဦးကို မြန်မာထုတ်ပစ်ခဲ့ဟု ကုလအစီရင်ခံစာဖော်ပြ

ကမ္ဘာ့ကုလသမဂ္ဂ၏ အရေးယူဒဏ်ခတ်ပိတ်ဆို့ခြင်းခံရသော ကုမ္ပဏီတစ်ခုနှင့် ပတ်သက်မှုရှိနေသည့် မြောက်ကိုရီးယားသံတမန်တစ်ဦးကို မြန်မာအစိုးရက ယခုနှစ်အစောပိုင်းတွင်   နိုင်ငံအတွင်းမှနှင်ထုတ်ခဲ့ကြောင်း  ကုလသမဂ္ဂ၏ အစီရင်ခံစာတစ်ခုတွင် ဖော်ပြထားသည်။

“မြန်မာနိုင်ငံရန်ကုန်မြို့ရှိ မြောက်ကိုရီးယားသံရုံးမှ ဒုတိယအတွင်း ရေးမှူးဖြစ်သူ မစ္စတာကင်မ်ချိုလ်နမ်ဟာ ကိုရီးယားသတ္တုတွင်းကော်ပိုရေးရှင်းတစ်ခု၏ အဖွဲ့ဝင်ဖြစ်တယ်လို့ သိရှိရတာကြောင့်   မြန်မာအစိုးရက လိုအပ်သည့်အတိုင်း အရေးယူခဲ့ပါတယ်” ဟု အောက်တိုဘာလ ၆ ရက်နေ့ ရက်စွဲဖြင့် တင်ပြခဲ့သော ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်အဖွဲ့ရုံး၏ အစီရင်ခံစာထဲ၌ ဖော်ပြ ခဲ့သည်။

ထိုပြန်တမ်းကို အောက်တိုဘာလ ၉ ရက်နေ့ရက်စွဲဖြင့် ထုတ်ပြန်သော အစီရင်ခံစာထဲ၌လည်း ဖော်ပြခဲ့သလို လုံခြုံရေးကောင်စီ၏ မြောက်ကိုရီးယားအပေါ် အရေးယူဒဏ်ခတ်သည့်ကော်မတီ၏ တရားဝင်ဝက်ဘ်ဆိုက်၌ လည်း ဖော်ပြခဲ့သည်။

အဆိုပါသတ္တုတွင်းကုမ္ပဏီသည် ပဲ့ထိန်းတပ်ဒုံးပျံများနှင့် စစ်လက်နက်ပစ္စည်းများကို တင်ပို့ရောင်းချရာတွင် ပါဝင်ပက်သက်နေသည့်အတွက် ကုလသမဂ္ဂလုံခြုံရေးကောင်စီနှင့် အမေရိကန်တို့၏ အရေးယူဒဏ်ခတ်မှုကို ရင်ဆိုင်နေရသည့် ကုမ္ပဏီတစ်ခုဖြစ်သည်။

လုံခြုံရေးကောင်စီ၏ အရေးယူဒဏ်ခတ်မှုဆိုင်ရာကော်မတီ၌ ဖော်ပြခဲ့သော အစီရင်ခံစာထဲ၌ မြန်မာအစိုးရက ၎င်းတို့သည် မြန်မာနိုင်ငံအတွင်းမှ ဇွန်လ ၉ ရက်နေ့မှ ထွက်ခွာသွားခဲ့သော   မြောက်ကိုရီးယားသံတမန်တစ်ဦးကို နိုင်ငံအတွင်းမှ နှင်ထုတ်မည်ဟု မြောက်ကိုရီးယားသံရုံးကို လွန်ခဲ့သော ဧပြီလ ၂၆ ရက်နေ့က အကြောင်းကြား ခဲ့ကြောင်း တင်ပြထားသည်။

“ကုလသမဂ္ဂလုံခြုံရေးကောင်စီရဲ့ ဆုံးဖြတ်ချက်ကို ပြည်ထောင်စုမြန်မာနိုင်ငံတော်ဟာ အပြည့်အဝကို လိုက်နာကျင့်သုံးပါတယ်” ဟုလည်း ထိုအစီရင်ခံစာထဲ၌ ဖြည့်စွက်ဖော်ပြထားသည်။

Ref: South China Morning Post

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly