ပေကျင်း၊ အောက်တိုဘာ ၁၉ ။ ။ တရုတ်နိုင်ငံ၏ ယခုနှစ် တတိယသုံးလပတ် စီးပွားရေးသည် ပြီးခဲ့သည့် ၂၀၁၆ အလားတူကာလကထက် ၆ ဒဿမ ၈ ရာခိုင်နှုန်း ကြီးထွားခဲ့ကြောင်း အမျိုးသား စာရင်းအင်းဗျူရိုအရ သိရသည်။
အဆိုပါ ထုတ်ပြန်ချက်တွင် တရုတ်နိုင်ငံ၏ ဂျီဒီပီက ၂၀၁၇ ပထမကိုးလအတောအတွင်း တစ်နှစ်ကထက် ၆ ဒဿမ ၉ ရာခိုင်နှုန်း ဖွံ့ဖြိုးပြီး ယွမ် ၅၉ ဒဿမ ၃၂ ထရီယံ(အမေရိကန်ဒေါ်လာ ၉ ဒဿမ ၁၂ ထရီယံ) အထိ ရှိခဲ့ကြောင်း ဖော်ပြထားသည်။
တတိယသုံးလပတ်ဖြစ်သည့် ဇူလိုင်မှ စက်တင်ဘာအတွင်း “အားသစ်များ၏ မောင်းနှင်မှုဖြင့် အမျိုးသားစီးပွားရေးသည် အရှိန်အဟုန်ကြီးထွားမှုနှင့်အတူ ဖွံ့ဖြိုးမှု တည်ငြိမ်ကြောင်း” အမျိုးသား စာရင်းအင်းဗျူရိုမှ ပြောရေးဆိုခွင့်ရှိသူ Xing Zhihong က သတင်းစာရှင်းလင်ပွဲတွင် ပြောသည်။
ထိုအချက်အလက်အားဖြင့် “စီးပွားရေးဖွံ့ဖြိုးမှု နှစ်စဉ် ရည်မှန်းချက်ကို အခြေခိုင်ခိုင်ဖြင့် ရရှိခြင်း”ဟုလည်း ၎င်းက ဖြည့်စွက်ဆိုသည်။
တရုတ်အာဏာပိုင်များအနေဖြင့် ၂၀၁၇ အတွက် စီးပွားရေးရည်မှန်းချက်ကို ၆ ဒဿမ ၅ ရာခိုင်နှုန်း ရည်မှန်းထားခြင်း ဖြစ်ပြီး ယင်းရည်မှန်းချက်အတိုင်း ပြည့်မီခြင်းအပြင် ကျော်လွန်လည်း ရောက်ရှိနိုင်သည်ဟု ယုံကြည်ထားသည်။
ယခုလအစောပိုင်းက နိုင်ငံတကာငွေကြေးရန်ပုံငွေအဖွဲ့ IMF က တရုတ်နိုင်ငံအတွက် ၎င်းတို့၏ ခန့်မှန်းချက်ကို ဆယ်ပုံတစ်ပုံ ထပ်တိုးကာ ၆ ဒဿမ ၈ ရာခိုင်နှုန်း ဖွံ့ဖြိုးမှု ရှိမည်ဖြစ်ကြောင်း ပြောင်းလဲခန့်မှန်းခဲ့သည်။