ရန်ကုန်၊ အောက်တိုဘာ ၁၂ ။ ။ အကြမ်းဖက် တိုက်ခိုက်ခံခဲ့ရသည့် ရခိုင်ပြည်နယ်မောင်တောဒေသခံများကို အားပေးနှစ်သိမ့်ရန် တိုင်းရင်းသားနိုင်ငံရေးပါတီ ၁၅ ခုဖြင့် ဖွဲ့စည်းထားသည့် “ စည်းလုံးညီညွတ်သော တိုင်းရင်း သားလူမျိုးများ မဟာမိတ်အဖွဲ့ (UNA) ကိုယ်စား လှယ် အဖွဲ့သည် ယနေ့ (အောက်တိုဘာ ၁၂ ရက်) မှစတင်ကာ ရခိုင်ပြည်နယ်သို့ သွားရောက်မည်ဖြစ်ကြောင်း ဇိုမီးဒီမိုကရေစီအဖွဲ့ချုပ်ပါတီ အထွေထွေ အတွင်းရေးမှူး ဦးဂင့်ကမ်းလျန်ကပြောသည်။
အကြမ်းဖက်တိုက်ခိုက်ခံခဲ့ရသည့် မောင်တောဒေသသို့အဓိကသွားရောက်ပြီး ရခိုင်ဒေသခံများကို သွားရောက်အားပေးမည်ဖြစ်ကာ ရခိုင်ပြည်နယ် အစိုးရအဖွဲ့နှင့်လည်း တွေ့ဆုံသွားရန်ရှိကြောင်းသိရသည်။
“ သွားတာကတော့ ရခိုင်ပြည်မှာဖြစ်တာကို ကိုယ်တိုင်ကိုယ်ကျမြင်တွေ့မယ်။ ဟိုမှာ ဒုက္ခရောက်နေတဲ့လူထုတွေကိုအားပေးနှစ်သိမ့်ဖို့ ဒါအဓိကထား သွားတာပါ။ နှစ်ရက် သုံးရက်တော့ကြာမှာပဲ။ အဓိကတော့ မောင်တောပဲအဓိကဦးတည်သွားမှာဖြစ်ပါတယ် “ဟုဦးဂင့်ကမ်းလျန်ကဆိုသည်။
လတ်တလောတွင် အားပေးနှစ်သိမ့်ရန်နှင့် လေ့လာရန်အတွက်သွားရောက်ခြင်းဖြစ်ပြီး ခရီးစဉ်ပြီးဆုံးပါက အစည်းအဝေးထိုင်ကာ မည်ကဲ့သို့ကူညီမည်၊ မည်ကဲ့သို့သဘောထားရှိသည်များကို ထုတ်ပြန်ကြေငြာရန်ရှိကြောင်းလည်းသိရသည်။
အကြမ်းဖက်တိုက်ခိုက်မှုများ ပြုလုပ်နေသည့် (ARSA)အဖွဲ့ကို ကို ပြင်းထန်စွာ ရှုတ်ချကြောင်း UNA က သြဂုတ် ၂၉ ရက်တွင် သဘောထား ထုတ်ပြန်ခဲ့ဖူးသည်။
တိုင်းရင်းသားနိုင်ငံရေးပါတီ ၁၅ ခုပါဝင်သည့် UNA အဖွဲ့တွင် ရခိုင်ဒေသခံပါတီများဖြစ်သည့် ရခိုင်ဒီမိုကရေစီအဖွဲ့ချုပ် (ALD)၊ ရခိုင်မျိုးချစ်ပါတီ (APP)၊ မြိုအမျိုးသားဒီမိုကရေစီပါတီ (MNDP) တို့လည်းပါဝင်နေသည်။