ရန်ကုန်၊ အောက်တိုဘာ ၃ ။ ။ ရခိုင်ပြည်နယ်တွင် အကြမ်းဖက်တိုက်ခိုက်မှု နှစ်ကြိမ်တိုင်တိုင်ပြုလုပ်ခဲ့သည့် Arakan Rohingya Salvation Army (ARSA) အကြမ်းဖက်အဖွဲ့သည် မြန်မာ - ဘင်္ဂလားဒေ့ရှ် နှစ်နိုင်ငံစလုံး၏ ဘုံရန်သူဖြစ်ကြောင်း ဘင်္ဂလားဒေ့ရှ်နိုင်ငံခြားရေးဝန်ကြီး H.E. Mr. Abdul Hassan Mahmood Ali ကပြောဆိုလိုက်သည်။
ဘင်္ဂလားဒေ့ရှ်နိုင်ငံ၊ နိုင်ငံခြားရေးဝန်ကြီး H.E. Mr. Abdul Hassan Mahmood Ali ၏ ဖိတ်ကြားချက်အရ နိုင်ငံတော်အတိုင်ပင်ခံရုံးဝန်ကြီးဌာန၊ ပြည်ထောင်စုဝန်ကြီး ဦးကျော်တင့်ဆွေ သည် ဘင်္ဂလားဒေ့ရှ်နိုင်ငံ၊ ဒါကာမြို့သိုသွားရောက်သည့် ၃ ရက်ကြာခရီးစဉ်အတွင်း ထိုသို့ပြောဆိုခဲ့ခြင်းဖြစ်သည်။
“ ဘင်္ဂလားဒေ့ရှ်နိုင်ငံသည် မြန်မာနိုင်ငံနှင့် တည်ရှိနေသည့် ချစ်ကြည်ရင်းနှီးမှုကိုအလေးထားကြောင်းနှင့် ထိန်းသိမ်းရန်ဆန္ဒရှိပါကြောင်း၊ Arakan Rohingya Salvation Army (ARSA) အား မြန်မာနှင့် ဘင်္ဂလားဒေ့ရှ် နှစ်နိုင်ငံလုံး၏ ဘုံရန်သူအဖြစ် ခံယူကြောင်းနှင့် ဘင်္ဂလားဒေ့ရှ် နိုင်ငံအနေဖြင့် အကြမ်းဖက်မှုများ အပေါ် လုံးဝလက်မခံသည့် မူဝါဒကို ကျင့်သုံးလျက်ရှိသည် “ ဟု မြန်မာသံတမန်များကို ပြောဆိုခဲ့ကြောင်း နိုင်ငံတော်အတိုင်ပင်ခံရုံးကသတင်းထုတ်ပြန်သည်။
အောက်တိုဘာ ၁ ရက်နေ့မှ ၃ ရက်နေ့အထိ သွားရောက်ခဲ့သည့်ခရီးစဉ်ကို ပြည်ထောင်စုဝန်ကြီးနှင့်အတူ နိုင်ငံခြားရေးဝန်ကြီးဌာန၊ အမြဲတမ်းအတွင်းဝန် ဦးကျော်ဇေယျလည်း လိုက်ပါခဲ့သည်။
ထို့နောက် နှစ်နိုင်ငံ နယ်စပ်လုံခြုံရေးဆိုင်ရာ ဆက်လက် ဆောင်ရွက်မည့် အစီအစဉ်များနှင့် နှစ်ဖက်သဘောတူထားသည့် သတ်မှတ်ချက်များအတိုင်း မြန်မာနိုင်ငံသို့ ပြန်လည် ဝင်ရောက်လိုသည့် ဒုက္ခသည်များစိစစ်ရေး ကိစ္စရပ်များကို ဆွေးနွေးရန် ဘင်္ဂလားဒေ့ရှ် နိုင်ငံခြားရေးဝန်ကြီးအား မြန်မာနိုင်ငံ၊ နေပြည်တော်သို့လာရောက်ရန် မြန်မာအစိုးရဘက်မှ ဖိတ်ကြားခဲ့ကြောင်းသိရသည်။