ရန်ကုန်၊ စက်တင်ဘာ ၂၈ ။         ။ လူငယ်များအတွက် သတင်းအချက်အလက်စင်တာတစ်ခု တည်ဆောက်ရန် ရန်ကုန်တိုင်းဒေသကြီး အစိုးရအဖွဲ့မှ စီစဉ်ဆောင်ရွက်နေပြီဖြစ်ကြောင်း တိုင်းအစိုးရအဖွဲ့ဝင် ကရင်တိုင်းရင်းသားရေးရာ ဝန်ကြီး နော်ပန်းသဉ္ဇာမျိုးက ပြောဆိုလိုက်သည်။

ရန်ကုန်တိုင်းဒေသကြီး ရွှေဂုံတိုင်တွင်ရှိသည့် အမျိုးသားဒီမိုကရေစီအဖွဲ့ချုပ် (NLD) ရုံးချုပ်တွင် ပြုလုပ်သည့် NLD ပါတီတည်ထောင်သည့် ၂၉ နှစ်မြောက်နှစ်ပတ်လည်နေ့ အခမ်းအနားတွင် ပြောဆိုခဲ့ခြင်းဖြစ်သည်။

“ နန်းသီတာဆိပ်ကမ်းဘေးနားမှာဖြစ်ပါတယ်။ မြေ ၄ ဧကနီးပါးလောက်ရှိပါတယ်။ အဲ့ဒီမှာ လူငယ်တွေအတွက် အင်ဖော်မေးရှင်းစင်တာတစ်ခုလာမှာပါ “ ဟု နော်ပန်းသဉ္ဇာမျိုးကပြောသည်။

အဆိုပါ စင်တာတွင် ရရှိနိုင်သည့် ဝန်ဆောင်မှုများတွင် အလုပ်စတင်လုပ်ရန် ရုံးခန်းမငှားနိုင်သည့် လူငယ်များအတွက် ရုံးခန်းငှားပေးခြင်း၊ နည်းပညာ ဖလှယ်ခြင်းနှင့် လုပ်ငန်းခွင့် Workshop ကဲ့သို့မျိုး လည်း လုပ်ဆောင်ပေးမည်ဖြစ်ကြောင်း ၎င်းက ဆက်လက်ပြောဆိုသည်။

လက်ရှိတွင် အင်ဖော်မေးရှင်းစင်တာအတွက် ပြင်ဆင်မှုများ စတင်လုပ်ဆောင်နေပြီး ဒီဇင်ဘာလခန့်တွင် စတင်ရုပ်လုံးပေါ်လာမည်ဖြစ်ကြောင်း ရန်ကုန်တိုင်းအစိုးရအဖွဲ့က ပြောဆိုထားသည်။