စက်တင်ဘာ ၂၈၊ မန်ချက်စတာ။ ။ CSKA မော်စကိုအသင်းကိုအနိုင်ရတဲ့ ချန်ပီယံလိဂ်ပွဲစဉ်မှာ ဂိုးသွင်းမှတ်တမ်းကိုဆက်လက်ရယူနိုင်ခဲ့တဲ့ တိုက်စစ်မှူးလူကာကူဟာ အသင်းအတွက်အရေးပါတဲ့ဂိုးတွေကိုသွင်းပေးနေသူပါလို့ မန်ယူနည်းပြမော်ရင်ဟိုက ထုတ်ဖော်ချီးကျူးလိုက်ပါတယ်။
နွေရာသီတုန်းက အဲဗာတန်ကနေ ပေါင် ၇၅ သန်းနဲ့ပြောင်းလာတဲ့အဲဒီတိုက်စစ်မှူးဟာ CSKA မော်စကိုအသင်းကို အဝေးကွင်းမှာ နှစ်ဂိုးသွင်းယူနိုင်ခဲ့ပြီး အသင်းဖော်မာရှယ်နဲ့ မစ်ကီတာယန်တို့က တစ်ဂိုးစီသွင်းယူခဲ့ကြပါတယ်။
ရုရှမြို့တော်မှာ ၄-၁ ဂိုးနဲ့နိုင်ပွဲရပြီးနောက် မန်ယူအသင်းဟာ အုပ်စု (က)မှာ နှစ်ပွဲကစား ၆ မှတ်ရထားပါတယ်။ ၉ ပွဲကစား ၁၀ ဂိုး သွင်းထားတဲ့ဘယ်လ်ဂျီယံတိုက်စစ်မှူးကိုလည်း မော်ရင်ဟိုက ချီးကျူးခဲ့ပါတယ်။
“ပွဲတိုင်းလိုလိုမှာ သူကအရေးကြီးတဲ့ဂိုးတွေသွင်းပေးနေတယ်ဆိုတာ ကျွန်တော်ဝန်ခံပါတယ်။ သူက သိပ်ကောင်းတဲ့ကစားသမား ဆိုတာကို ကျွန်တော်တို့သိထားပါတယ်။
သူကဂိုးတွေအများကြီးသွင်းနိုင်စွမ်းရှိသူဖြစ်ပြီး အရည်အသွေးမြင့်ကစားသမားတွေနဲ့တွဲကစားလိုက်တဲ့အခါ ဂိုးသွင်းရတာ ပိုတောင်လွယ်သွားပါသေးတယ်” လို့ မော်ရင်ဟိုက ပြောဆိုခဲ့ပါတယ်။
လူကာကူကလည်း သူ့အနေနဲ့ ကြိုးကြိုးစားစားကစားနေကြောင်း၊ အသင်းဖော်တွေအတွဲညီညီနဲ့ကစားနေကြတဲ့ပုံစံကို ဆက်ထိန်းထားရမှာဖြစ်ကြောင်းနဲ့ ဆုဖလားတွေရယူလိုကြောင်း ပြောဆိုခဲ့ပါတယ်။
Ref; Daily Mail
