စက်တင်ဘာ ၂၃ ။ ။ အင်ဒိုနီးရှားနိုင်ငံ ဘာလီကျွန်းပေါ်က မီးတောင်တစ်ခု လှုပ်ရှားနေခဲ့တာကြောင့် ယခုအခါ ယင်းမီးတောင်အနီးအနားနေ ဒေသခံထောင်ပေါင်းများစွာကို ဘေးလွတ်ရာကို ရွှေ့ပြောင်းခိုင်းထားရတယ်ဆိုပြီး တာဝန်ရှိသူတွေက ထုတ်ပြန်ပါတယ်။
ဘာလီကျွန်းရှိ အဆိုပါ Agung မီးတောင် ပေါက်ကွဲနိုင်ခြေနဲ့ပတ်သက်လို့လည်း အမြင့်ဆုံး သတိပေးချက် အဆင့် သတ်မှတ်ထုတ်ပြန်ထားပြီး အချိန်မရွေး ပေါက်ကွဲလာနိုင်ခြေ ရှိနေတယ်လို့ သိရပါတယ်။
ယခုလက်ရှိအချိန်မှာ အဆိုပါမီးတောင်အနီး ၉ ကီလိုမီတာ အကွာအဝေးဧရိယာအတွင်း ကမ့်ထိုးခြင်း၊ တောင်တက်ခြင်းများကို ရှောင်ကြဉ်ကြဖို့ ခရီးသွားတွေကိုရော၊ ဒေသခံတွေကိုပါ သတိပေးထားကြောင်း အာဏာပိုင်တွေက ပြောပါတယ်။
" မီးတောင် လှုပ်ရှားမှုက ဆက် ရှိနေပါတယ်၊ ဒါ့အပြင် ချော်ရည်ဆူပွက်မှုကြောင့် မြေလွှာတုန်ခါမှုတွေ ရှိနေပါတယ်" အမျိုးသား သဘာဝဘေးဒုက္ခ စီမံခန့်ခွဲရေး အေဂျင်စီ အကြီးအကဲ ဆူတိုပို နူဂရိုဟိုက ပြောပါတယ်။
ယခုလက်ရှိအချိန်ထိ လူပေါင်း ၁,၁၀၀၀ နီးပါးထိ ဘေးလွတ်ရာကို ရွှေ့ပြောင်းပေးထားကြောင်းနဲ့ နောက်ထပ်လည်း ထပ်တိုးလာနိုင်သေးကြောင်း တာဝန်ရှိသူတွေက ပြောထားပါတယ်။
