ရန်ကုန်၊ စက်တင်ဘာ ၂၂ ။ ။ မိုင်းရှင်းလင်းရေးလုပ်ဆောင်ရန် ကရင်ပြည်နယ်ကို လျာထားသော်လည်း တိုင်းရင်းသားလက်နက်ကိုင်ဘက်မှ ဆွေးနွေးနေဆဲဖြစ်သည့်အတွက် မိုင်းရှင်းလင်းရေးလုပ်ငန်းများ လတ်တလောတွင်လုပ်ဆောင်နိုင်ဦးမည် မဟုတ်ကြောင်း (JMC-U) အတွင်းရေးမှူး (၂) ဗိုလ်မှူးကြီး ဝဏ္ဏအောင် က ပြောဆိုလိုက်သည်။
ရန်ကုန်မြို့၊ ရွှေလီလမ်းရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) တွင်ပြုလုပ်သည့် ပြည်ထောင်စုအဆင့် ပစ်ခတ်တိုက် ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMCU) ၁၂ ကြိမ် မြောက်အစည်းအဝေးအပြီး မီဒီယာများကို ဖြေကြားခဲ့ခြင်းဖြစ်သည်။
“ ကျွန်တော်တို့ တပ်မတော်ဘက်ကတော့ ရှေ့ပြေးစီမံကိန်းအနေနဲ့ပေါ့နော် ။ ကရင်ပြည်နယ်မှာတော့ စတင်လုပ်ဖို့ ဆွေးနွေးထားတာရှိပါတယ်။ တစ်ဖက်ကလည်း သူတို့အဖွဲ့အစည်းမှာ ဒါနဲ့ပတ်သက်ပြီး ပြန်လည်ဆွေးနွေးနေတာ ဖြစ်သေးတဲ့အတွက် ဘယ်နေ့မှာတော့ အကောင်အထည်ဖော် စတင် ဆောင်ရွက်နိုင်မှာကိုတော့ ပြောလို့မရသေးဘူးဖြစ်ပါတယ် “ ဟု ဗိုလ်မှူးကြီးဝဏ္ဏအောင်ကပြောသည်။
ကရင်ပြည်နယ်အတွင်း မိုင်းရှင်းလင်းရေးလုပ်ငန်းစဉ်ကို ၂၀၁၇ ဧပြီလ ၌ လုပ်ဆောင်နိုင်ရန် စီစဉ်ထားသော်လည်း လက်ရှိအချိန်ထိ ဆောင်ရွက်နိုင်ခြင်းမရှိသေးခြင်း ဖြစ်သည်။
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ကို တိုင်းရင်းသားလက်နက်ကိုင်(၈)ဖွဲ့နှင့် အစိုးရတို့ ၂၀၁၅ခုနှစ် သြဂုတ်လ ၁၅ ရက်က လက်မှတ်ရေးထိုးခဲ့သည်။
တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) အခန်း(၃) ပုဒ်မခွဲ(င)တွင် နှစ်ဖက်တပ်များ ခင်းကျင်းထားသည့် မိုင်းများကို ရှင်းလင်းရန်နှင့် မိုင်းရှင်းလင်းရေး လုပ်ငန်းစဉ်များကို အစိုးရနှင့်ညှိနှိုင်းပြီး လုပ်ဆောင်သွားရန်ဟု ထည့်သွင်းဖော်ပြထားသည်။
ပြည်ထောင်စုအဆင့် အပစ်အခတ်ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) တစ်နှစ်အတွက် ရန်ပုံငွေ အမေရိကန်ဒေါ်လာ ၆.၅ သန်းကို ပြီးခဲ့သည့် JICM အစည်းအဝေး ဆုံးဖြတ်ချက်အရ ရရှိထားပြီး အဆိုပါရန်ပုံငွေထဲမှ မိုင်းရှင်းလင်းအတွက် သီးသန့်ခေါင်းစဉ်ဖြင့် ထုတ်ယူသုံးစွဲမည်ဖြစ်ကြောင်း ဗိုလ်မှူးကြီး ဝဏ္ဏအောင် ပြောဆိုထားသည်။
မြန်မာနိုင်ငံတွင် မြေမြုပ်မိုင်းကြောင့် သေဆုံးသူ ၄၁၉ဦး၊ ထိခိုက်ဒဏ်ရာရရှိသူ ၃၁၅၆ဦး ရှိနေကြောင်း ၁၉၉၉ ခုနှစ်မှ ၂၀၁၅ခုနှစ်အတွင်းကောက် ယူရရှိထားသော စစ်တမ်းများအရ သိရသည်။
