ရခိုင်အရေးတွင် အကျိုးစီးပွားများပါဝင်နေပြီး လက်ရှိအစိုးရအကြပ်အတည်းဖြစ်အောင် လုပ်နေဟု ကိုမင်းကိုနိုင် ပြော

.

ရန်ကုန်၊ စက်တင်ဘာလ ၁၃ ။         ။ ရခိုင်ပြည်နယ်တွင် ဖြစ်ပွားနေသော အကြမ်းဖက်မှုကိစ္စရပ်များသည် အကျိုးစီးပွားများပုံစံမျိုးစုံဖြင့် ပါဝင်နေပြီး လက်ရှိအစိုးရအား အကြပ်အတည်းဖြစ်စေရန် လုပ်ဆောင်နေသည်ဟု ယူဆရကြောင်း ၈၈ မျိုးဆက်ငြိမ်းချမ်းရေးနှင့်ပွင့်လင်းလူ့အဖွဲ့အစည်းမှ ကိုမင်းကိုနိုင်က ပြောဆိုလိုက်သည်။

ယနေ့ စက်တင်ဘာ၁၃ရက် သင်္ယန်းကျွန်းမြို့နယ်ရှိ ၈၈ ရုံးခန်းတွင် ပြုလုပ်သည့် ရခိုင်အရေးနှင့် ပတ်သက်သည့် သတင်းစာရှင်းလင်းပွဲ၌ ပြောခဲ့ခြင်း ဖြစ်သည်။

"အခုဖြစ်လာတာတွေကို သေချာပြန်ကြည့်ရင် တချို့ဟာတွေကပစ္စည်းတွေကိုလုသွားတာ သဘောက ပြောရရင်တော့ မင်းတို့ ဒီဟာကိုဖန်တီးပြီးရင် အဲဒီမှာရတဲ့ပစ္စည်းတွေ ယူသွားဆိုတဲ့ပုံစံမျိုး ကျွန်တော်တို့ တွေ့နေရတယ်။ ဒါက ရိုးရိုးသားသား လူမျိုးရေးဘာသာရေး ဖြစ်တာမဟုတ်ဘူး။ အကြမ်းဖက်ပြီးတော့ လုယူချင်တဲ့ ဥစ္စာပစ္စည်းတွေကို ဓနအင်အားတွေကိုပါ လုယူတဲ့ပုံစံမျိုး တွေ့နေရတဲ့အတွက်ကြောင့် အကျိုးစီးပွားဟာ ပုံသဏ္ဍာန်မျိုးစုံနဲ့ပါနေတယ်ဆိုတာ ကျွန်တော်တို့ မြင်လို့ရတယ်"ဟု ၈၈ မျိုးဆက်ငြိမ်းချမ်းရေးနှင့်ပွင့်လင်းလူ့အဖွဲ့အစည်းမှ ကိုမင်းကိုနိုင်က ပြောခဲ့သည်။

၈၈မျိုးဆက် ငြိမ်းချမ်းရေးနှင့်ပွင့်လင်းလူ့အဖွဲ့အစည်းမှ ဦးကိုကိုကြီး(စမ်းချောင်း)၊ ဒေါ်နီလာသိန်း နှင့် ဒေါ်မီးမီးတို့ ပါဝင်သည့်အဖွဲ့သည် စက်တင်ဘာလ ၂ ရက်နေ့မှ စက်တင်ဘာလ ၁၀ ရက်နေ့အထိ ရခိုင်ပြည်နယ်ရှိ အကြမ်းဖက်များဖြစ်ပွားခဲ့သည့်ဒေသများသို့ သွားရောက်၍ ထောက်ပံ့ပစ္စည်းများ ပေးအပ်ခြင်း နယ်မြေလေ့လာခြင်းများ ပြုလုပ်ခဲ့သည်။

ထို့ပြင် ရခိုင်အရေးကိစ္စသည် လက်ရှိအစိုးရအား အကြပ်အတည်းဖြစ်စေရန် လုပ်ဆောင်နေသည်ဟု ယူဆရပြီး တိုင်းပြည်အတွက်အကျိုးရှိစေရန် ပူးပေါင်းဆောင်ရွက်သင့်သည့်အချိန်ဖြစ်သည်ဟု  ကိုမင်းကိုနိုင်က ပြောသည်။

ရခိုင်ပြည်နယ်အတွင်း သြဂုတ်လ ၂၅ ရက်နေ့မှ စက်တင်ဘာ ၅ ရက်နေ့အထိ ကျေးရွာပေါင်း ( ၅၉) ရွာ ၊ နေအိမ်အလုံးပေါင်း ၆၈၄၂ လုံး မီးရှို့ဖျက်ဆီးခံခဲ့ရသည်ဟု အစိုးရ၏ နောက်ဆုံးရ သတင်းထုတ်ပြန်ချက်အရ သိရသည်။

အကြမ်းဖက်သမား ၃၇၁ ဦး အသေဖမ်းဆီးရမိကာ ၃၈ ဦးကို အရှင်ဖမ်းမိခဲ့ပြီး ဒေသခံများ သေဆုံးမှု အဖြစ် ဒေသခံတိုင်းရင်းသား ၁၄ ဦး ၊ ဒေသခံ ဟိန္ဒူဘာသာဝင် ၇ ဦး၊ ဘင်္ဂလီ ၇ ဦး စုစုပေါင်း ၂၈ ဦး သေဆုံးခဲ့သည်ဟု တရားဝင်သတင်းထုတ်ပြန်ခဲ့သည်။

လက်ရှိအချိန်တွင် နိုင်ငံတော်သမ္မတ ဦးထင်ကျော်နှင့် နိုင်ငံတော်အတိုင်ပင်ခံပုဂ္ဂိုလ်တို့ဘက်မှ  ၈၈ မျိုးဆက်ငြိမ်းချမ်းရေးနှင့်ပွင့်လင်းလူ့အဖွဲ့အစည်းမှ အမြဲထောက်ခံပါကြောင်း ၈၈ ငြိမ်း/ပွင့်မှ ကိုဂျင်မီက ပြောသည်။