ရန်ကုန် (မဇ္ဈိမ) ။ ။ တရုတ်နိုင်ငံအနေဖြင့် လာမည့် နိုဝင်ဘာရွေးကောက်ပွဲအား စောင့်ကြည့်လေ့လာလိုပါက ရွေးကောက်ပွဲကော်မရှင်က ဖိတ်ကြားမည်ဟု ကော်မရှင်ဥက္ကဋ္ဌ ဦးတင်အေးက ပြောသည်။

မြန်မာနိုင်ငံဆိုင်ရာတရုတ်သံအမတ်အသစ် မစ္စတာဟုန်လျန်အား နေပြည်တော်၌ သြဂုတ် ၁၂ ရက်နေ့က တွေ့ဆုံစဉ် သံအမတ်ကြီး၏ ရွေးကောက်ပွဲစောင့်ကြည့်လေ့လာရေးနှင့်ပတ်သက်၍ မေးမြန်းမှုကို ပြန်လည်ရှင်းလင်းစဉ် ထည့်သွင်း ပြောဆိုခဲ့ခြင်းဖြစ်သည်။

အာဆီယံနိုင်ငံများ၏ ရွေးကောက်ပွဲကော်မရှင်များကိုလည်း ပြည်ထောင်စုရွေးကောက်ပွဲကော်မရှင် အနေနှင့် ဖိတ်ကြားမည်ဟုဆိုသည်။ ၂၀၁၀ ရွေးကောက်ပွဲနှင့် ၂၀၁၂ ကြားဖြတ်ရွေးကောက်ပွဲကဲ့သို့ မြန်မာနိုင်ငံဆိုင်ရာ သံအမတ်ကြီးများကိုလည်း လေ့လာခွင့်ပြုသွားမည်ဟု ယနေ့ထုတ် နိုင်ငံပိုင်သတင်းစာထဲ၌ ဖော်ပြထားသည်။

ထို့ပြင် ပြည်တွင်း/ပ ရွေးကောက်ပွဲစောင့်ကြည့်လေ့လာရေးအဖွဲ့များအား လေ့လာခွင့်ပြုသွားမည်ဖြစ်ပြီး Carter Center၊ EU၊ ANFREL၊ IRI နှင့် Gender Concern အဖွဲ့တို့ လေ့လာလိုကြောင်း အဆိုပြုထားပြီး Carter Center၊ EU တို့မှာ MoU ရေးထိုးထားပြီးဖြစ်သည်။ ပြည်ပမှ အန်ဂျီအိုများကို လေ့လာခွင့် မပြုထားသော်လည်း ပြည်တွင်းမှ လူမှုအဖွဲ့အစည်းများကိုမူ ခွင့်ပြုမည်ဖြစ်သည်။

စောင့်ကြည့်လေ့လာခြင်းကို ကာလရှည်နှင့် ကာလတို နှစ်မျိုးသတ်မှတ်ထားပြီး ကာလရှည်မှာ ၃-၄ လခန့် စောင့်ကြည့် လေ့လာခြင်းဖြစ်ပြီး MoU ထိုးရန်လိုအပ်သည်။ ကာလတိုမှာမူ ရွေးကောက်ပွဲနေ့မတိုင်မီ ၂ ရက်နှင့် ရွေးကောက်ပွဲအပြီး တစ်ရက်-နှစ်ရက်ခန့်သာ လေ့လာခြင်းဖြစ်သည်။

ကော်မရှင်ဖွဲ့စည်းပုံနှင့် တာဝန်များ၊ ရွေးကောက်ပွဲစနစ်၊ မဲပေးပုံစနစ်၊ မဲစာရင်းပြုစုပုံ၊ ရွေးကောက်ပွဲဖြစ်စဉ်များနှင့် ပြင်ဆင် ဆောင်ရွက်ထားမှုများကိုလည်း ဥက္ကဋ္ဌ ဦးတင်အေးက တရုတ်သံအမတ်ကြီးအား ရှင်းလင်းပြောကြားခဲ့သေးသည်။ မြန်မာနိုင်ငံဆိုင်ရာတရုတ်သံအမတ်အသစ် မစ္စတာဟုန်လျန်နှင့် တွေ့ဆုံရာတွင် ဥက္ကဌနှင့်အတူ အဖွဲ့ဝင်များ၊ အတွင်းရေးမှူး နှင့် ကော်မရှင်ရုံးတာဝန်ခံများ ပါဝင်သည်။