စက်တင်ဘာ ၅ ။ ။ ကမ္ဘာ့ဖလားခြေစစ်ပွဲ ပွဲစဉ် ၈ အပြီးမှာတော့ ဥရောပထိပ်သီးအသင်းကြီးတွေဖြစ်တဲ့ ဂျာမနီနဲ့အင်္ဂလန်တို့ဟာ တိုက်ရိုက် ခြေစစ်ပွဲအောင်မြင်ဖို့ အလွန်နီးစပ်သွားပြီဖြစ်ပါတယ်။
ဂျာမနီအသင်းဟာ နော်ဝေအသင်းကို ၆ ဂိုး၊ ဂိုးမရှိနဲ့ ဂိုးပြတ်အနိုင်ယူပြီး ကမ္ဘာ့ဖလားခြေစစ်ပွဲမှာ ရာနှုန်းပြည့်နိုင်ပွဲ ရယူထားပါတယ်။ လက်ရှိမှာ ရမှတ် ၂၄ မှတ်ရထားပြီး ဒုတိယနေရာက မြောက်အိုင်ယာလန်ကို ၅ မှတ်ဖြတ်ထားပါတယ်။ ဒါကြောင့် လက်ကျန် ၂ ပွဲမှာ ရမှတ် ၂ မှတ်ရရုံနဲ့ တိုက်ရိုက်ခြေစစ်ပွဲအောင်မြင်တော့မှာ ဖြစ်ပါတယ်။
နော်ဝေအသင်းနဲ့ပွဲစဉ်မှာ အိုဇေးလ်၊ ဒရက်စ်လာ၊ ဂရော့ကာနဲ့ဂိုမက်ဇ်တို့က တစ်ဂိုးစီသွင်းယူပေးခဲ့ကြပြီး တိုက်စစ်မှူးဝါနာက ၂ ဂိုးသွင်းပေးခဲ့ပါတယ်။
အင်္ဂလန်အသင်းကတော့ အိမ်ကွင်းဝင်ဘလေမှာ ဆလိုဗက်ကီးယားကို ၂ဂိုး ၁ ဂိုးနဲ့ အနိုင်ယူပြီး ဂျာမနီနည်းတူ ခြေစစ်ပွဲအောင်ဖို့ ရမှတ် ၂ မှတ်သာ လိုအပ်ပါတော့တယ်။ လက်ရှိမှာ အင်္ဂလန်က ရမှတ် ၂၀ ရရှိထားပြီး ဒုတိယနေရာက ဆလိုဗက်ကီးယားက ၁၅ မှတ်ရရှိထားပါတယ်။
ဒီပွဲစဉ်မှာ အင်္ဂလန်အသင်းအတွက် သွင်းဂိုးတွေကို ဒိုင်ယာနဲ့ရက်ရှ်ဖို့ဒ်တို့က သွင်းယူပေးခဲ့ကြပါတယ်။
ဥရောပဇုန်ခြေစစ်ပွဲတွေမှာ ဘယ်လ်ဂျီယံတစ်သင်းသာ ခြေစစ်ပွဲအောင်မြင်ထားပါသေးတယ်။ လက်ရှိမှာ အိမ်ရှင် ရုရှားနဲ့အတူ ကမ္ဘာ့ဖလားယှဉ်ပြိုင်ခွင့်ရရှိထားတဲ့အသင်းတွေကတော့ ဘရာဇီး၊ အီရန်၊ ဂျပန်၊ မက္ကဆီကိုနဲ့ ဘယ်လ်ဂျီယံတို့ဖြစ်ပါတယ်။
ရည်ညွှန်း ဘီဘီစီ