ရန်ကုန်၊သြဂုတ်၂၅ ။ ။ မြို့ပြနေအမျိုးသမီးများ၏ ဘေးကင်းလုံခြံုမှုနှင့် စပ်လျင်း၍ မြို့နယ်အဆင့် အစိုးရများနှင့် မြို့နယ်ခံပြည်သူများ မျက်နှာစုံညီဆွေးနွေးပွဲတစ်ခုကို ယနေ့သြဂုတ်၂၅မနက်ပိုင်းက ရန်ကုန်မြို့ Summit Park View ဟိုတယ်၌ ပြုလုပ်ခဲ့သည်။
အမျိုးသမီးများ၏လုံခြံုမှုရရှိစေရန် ဆောင်ရွက်သင့်သည်များကို ထောက်ပြဆွေးနွေးခဲ့ကြပြီး အစိုးရ၏ပြည်သူ့ဝန်ဆောင်မှုများအားကောင်းလာစေရန်အတွက် ရည်ရွယ်ချက်ဖြင့် Action Aid Myanmar Swedenနိုင်ငံအဖွဲ့အစည်း၊ Safe Cities For Women Myanmar နှင့် မဇ္စျိမမီဒီယာတို့ပူးပေါင်းပြုလုပ်ခြင်းဖြစ်သည်။
"ကျွန်တော်တို့နိုင်ငံက အမျိုးသမီးပတ်သက်ပြီးတော့ နည်းမျိုးစုံနဲ့အကြမ်းဖက်မှုမျိုးကို ရင်ဆိုင်နေရတယ်ဆိုရင်လည်း မမှားပါဘူး ကျွန်တော်တို့နိုင်ငံပဲလားဆိုတော့ ကမ္ဘာအရပ်ရပ်မှာရှိတဲ့ ဖွံ့ဖြိုးဖို့အတွက်ကို ကြိုးစားနေတဲ့ နိုင်ငံတိုင်းမှာ လိုလိုရှိနေတာပါ ။ ကျွန်တော်တို့ နိုင်ငံအနေနဲ့ကလည်း အခုမှ ရုတ်ချည်းကောက်ဖြစ်လာတာ မဟုတ်ပါဘူး။ အခုခေတ် အခြေအနေက ပိုမိုပွင့်လင်းမြင်သာလာတဲ့ခေတ်တစ်ခုကို ရောက်ရှိလာတဲ့ အခြေအနေလည်း ရှိပါတယ်။ လူမှုရေးစာမျက်နှာတွေကလည်း အင်မတန်မှ ကျယ်ပြန့်တဲ့အခါမှာ တစ်ခုခုဖြစ်ပြီဆိုရင် နာရီမိနစ်စက္ကန့်မလပ် သိသွားတာများပါတယ် ။ နောက်တစ်ချက်ကလည်းပဲ ပိုမိုယုံကြည်အားကိုးလာတဲ့အတိုင်း တာတွေလည်းရှိပါတယ် ။ ငါတို့ဒီလိုမျိုးတိုင်မယ်ဆိုရင် ငါတို့အတွက် ထိရောက်တဲ့ဥပဒေကာကွယ်မှုတွေဆောင်ရွက်ပေးနိုင်မယ်ဆိုတဲ့ဟာတွေကိုလည်း သိရှိတဲ့အတွက် ပြည်သူတွေဟာအားကိုးတကြီးနဲ့ တိုင်ကြားလာ တာလည်း ရှိသလို မသိမသာနဲ့တိမ်မြှုပ်ပျောက်ကွယ်သွားတာတွေလည်း ရှိပါတယ်"ဟု လူမှုရေးနှင့် အမျိုးသား စီမံခန့်ခွဲရေးကော်မတီမှ အတွင်းရေးမှူး ဦးညီညီက မိန့် ခွန်းတွင် ပြောခဲ့သည်။
အဆိုပါပွဲသို့ ရန်ကုန်တိုင်းလွှတ်တော်ကိုယ်စားလှယ်များ၊ စည်ပင်သာယာရေးကော်မတီမှ တာဝန်ရှိသူများ၊ လူမှုဝန်ထမ်းဌာနမှ တာဝန်ရှိသူများ၊ အမျိုးသမီးရေးရာဌာနမှ တာဝန်ရှိသူများ တက်ရောက်ခဲ့ကြသည်။
မြို့ခံပြည်သူများအနေဖြင့် ဒေါပုံမြို့နယ်၊ ဒလမြို့နယ်၊ လှိုင်သာယာမြို့နယ်၊ သာကေတမြို့နယ်၊ အင်းစိန်မြို့နယ်အပါအဝင် မြို့နယ်(၇)ခုက စေတနာ့ဝန်ထမ်းများက တက်ရောက်ခဲ့သည်။
မြို့ပြနေအမျိုးသမီးများ ဘေးကင်းလုံခြံုရေးအတွက် လမ်းမီးတိုင်များထားရှိပေးရေး၊ အမှိုက်ပုံများ စနစ်တကျ ထားရှိပေးရေး၊ ကောင်းမွန်သောကျန်းမာရေးစောင့်ရှောက်မှုရရှိစေရေးနှင့် တရားဥပဒေစိုးမိုးရေးကိစ္စရပ်များကို တာဝန်ရှိသူများနှင့် ပြည်သူများ အပြန်အလှန်ဆွေးနွေးခဲ့ကြသည်။