ရီးယဲလ်မက်ဒရစ်အသင်းဟာ ချန်ပီယံလိဂ် ချန်ပီယံနှစ်နှစ်ဆက် ရယူနိုင်ခဲ့တာကြောင့် ကြာသပတေးနေ့က မိုနာကိုမှာ ပြုလုပ်ကျင်းပခဲ့တဲ့ ၂၀၁၆-၂၀၁၇ ယူအီးအက်ဖ်အေ ဆုပေးပွဲ အခမ်းအနားကို ကြီးစိုးခဲ့ပါတယ်။
ရီးယဲလ်အသင်းဟာ ပြီးခဲ့တဲ့ ရာသီက ချန်ပီယံလိဂ်ဖလား၊ လာလီဂါဖလား၊ UEFA စူပါဖလားနှင့် ကမ္ဘာ့ကလပ်ဖလားများကို ရရှိခဲ့တာဖြစ်ပါတယ်။
ဥရောပရှိ နည်းပြ အယောက် ၈၀ က ရွေးချယ် ပေးအပ်တဲ့ UEFA တစ်နှစ်တာအကောင်းဆုံး အမျိုးသားကစားသမားဆုကို ရီးယဲလ်ရဲ့ စူပါစတာ စီရော်နယ်လ်ဒိုက ဘာစီလိုနာ တိုက်စစ်မှူး မက်ဆီနှင့် ဂျူဗီတပ်စ် ဂိုးသမား ဘူဖွန်တို့ကို ကျော်ဖြတ်ပြီး အဆိုပါဆုကို ၃ ကြိမ်မြောက် ဆွတ်ခူးရရှိခဲ့ပါတယ်။
ပေါ်တူဂီကစားသမားကို ၂၀၁၆-၂၀၁၇ ရာသီအတွက် အကောင်းဆုံး တိုက်စစ်မှူးအဖြစ်လည်း ရွေးချယ်ခံရပြီး ရီးယဲလ်အသင်းဖော်တွေဖြစ်တဲ့ ရာမို့စ်နှင့် မိုဒရစ်တို့က အကောင်းဆုံ နောက်ခံကစားသမားနှင့် အကောင်းဆုံး ကွင်လယ်ကစားသမားဆုတို့ကို အသီးသီး လက်ခံရရှိခဲ့ပါတယ်။
ရော်နယ်လ်ဒိုဟာ ရီးယဲလ်အသင်း ၁၂ ကြိမ်မြောက် ချန်ပီယံလိဂ်ဖလား ဆွတ်ခူးနိုင်ဖို့အတွက် အဓိက ကစားသမားဖြစ်ပြီး ပြီးခဲ့တဲ့ ချန်ပီယံလိဂ်ပြိုင်ပွဲအတွင်း ဗိုလ်လုပွဲမှာ သွင်းဂိုးအပါအဝင် ၁၂ ဂိုး သွင်း၊ ၆ ကြိမ် ဖန်တီးပေးခဲ့ကာ အသင်းကို ပံ့ပိုးပေးခဲ့ပါတယ်။ ဂိုးသွင်းအများဆုံးကစားသမားအဖြစ်လည်း ရပ်တည်ခဲ့ပါတယ် ဒါ့ကြောင့် မက်ဆီနှင် ဘတ်ဖွန်တို့ကိုကျော်ကာ အကောင်းဆုံးဆုကို ရရှိခဲ့တာဖြစ်ပါတယ်။
အီတလီ ဝါရင့်ဂိုးသမားကြီး ဘူဖွန်က အကောင်းဆုံး ဂိုးသမားအဖြစ် အသိအမှတ်ပြုခံခဲ့ရပါတယ်။
အကောင်းဆုံးအမျိုးသမီး ဘောလုံးသမားဆုကိုမူ နယ်သာလန်နှင့် ဘာစီလိုနာတိုက်စစ်မှူး လီကီမာတန့်စ်က ရရှိသွားခဲ့ပါတယ်။ မာတန့်စ်ဟာ နယ်သာလန်အသင်းကို ပထမဆုံးအကြိမ် ယူရိုဖလားရရှိအောင် စွမ်းဆောင်ပေးနိုင်ခဲ့သူဖြစ်ပါတယ်။
(EFE_EPA)