ရန်ကုန်၊သြဂုတ်၂၁ ။ ။ ရန်ကုန်ရေကြောင်းဘတ်စ်(Yangon Water Bus)ကို စက်တင်ဘာလတွင်စတင်ပြေးဆွဲနိုင်ရန် ခန့်မှန်းထားပြီး သင်္ဘောများရောက်ရန် ကျန်ရှိနေသေးကြောင်း ရန်ကုန်တိုင်းဒေသကြီး သယ်ယူပို့ဆောင်မှုကြီးကြပ်ကွပ်ကဲရေး အာဏာပိုင်အဖွဲ့ အတွင်းရေးမှူး ဒေါက်တာမောင်အောင်ကပြောသည်။
"လကုန်ဆွဲမယ်ဆိုတာမဟုတ်ဘူး သူတို့ကမှန်းထားတာနောက်လထဲမှာ။ ဒါပေမယ့်အတိအကျပြောလိုက်ရင် ဟိုဟာဖြစ်မှာ(လွဲမှာ)စိုးလို့ ပြောရခက်တယ်ဗျ"ဟု ဒေါက်တာမောင်အောင်ကပြောပြသည်။
ရေကြောင်းဘတ်စ်ပြေးဆွဲရန် သင်္ဘောတချို့ရောက်ရှိနေပြီဖြစ်သော်လည်း ကျန်ရှိနေသည့်သင်္ဘောများလည်းရှိနေသည်ဟု ဒေါက်တာမောင်အောင်ကပြောသည်။
ရေကြောင်းဘတ်စ်ပြေးဆွဲရာတွင် သြစတေးလျနို်င်ငံထုတ်သင်္ဘောများ၊ ထိုင်းနိုင်ငံထုတ်သင်္ဘောများနှင့် မြန်မာနိုင်ငံထုတ်သင်္ဘောများပါဝင်မည်ဖြစ်ပြီး လူဦးရေ(၅၀)ဆံ့၊ (၁၀၀)ဆံ့နှင့် အများဆုံး(၂၀၀)ဆံ့သင်္ဘောများပါဝင်မည်ဖြစ်သည်။
ပြည်တွင်းမှသင်္ဘော(၇)စီး၊ ပြည်ပမှသင်္ဘော(၆)စီး စုစုပေါင်း(၁၃)စီး၊အရန်သင်္ဘော(၃)စီးဖြင့် ပြေးဆွဲရန် စီစဉ်ထားကြောင်း ရေကြောင်းဘတ်စ်တာဝန်ယူလုပ်ကိုင်နေသည့် တင့်တင့်မြန်မာကုမ္ပဏီဥက္ကဌက ဇူလိုင်(၁၄)ရက်နေ့က ဖြေကြားခဲ့သည်။
ရန်ကုန်ရေကြောင်းဘတ်စ် စတင်ပြေးဆွဲမည်ဆိုပါက လှိုင်သာယာ၊ အင်းစိန်မှ၊ ဗိုလ်တစ်ထောင်ဆိပ်ကမ်းသို့ ပြေးဆွဲပေးသွားမည်ဖြစ်ပြီး ပုံမှန်ယာဉ်စီးခ(၃၀၀)ကျပ်၊ ခရီးစဉ်အစဆုံး(၅၀၀)ကျပ်ကျသင့်မည်ဖြစ်သည်။