ရန်ကုန် သြဂုတ်၂၁ ။ ။ အလုံမြို့နယ်၊ အလုံစျေးအဆင့်မြှင့်တင် တည်ဆောက်ရာတွင် မူလဆိုင်ခန်း၊ မူလ အကျယ်အဝန်းရရှိရေး သဘောတူညီ ချက်များကို တရားဝင် စာချုပ်ချုပ်ဆိုပေး ရေးအတွက် အလုံစျေးသူစျေးသားများက ရန်ကုန်မြို့တော်ခန်းမရှေ့တွင် ယနေ့ သြဂုတ်လ ၂၁ ရက်က ဆန္ဒဖော်ထုတ် ခဲ့ကြသည်။
အလုံစျေး အဆင့်မြင့်တည်ဆောက်ရာတွင် ဆိုင်ခန်းများအားလုံးကို မြေညီထပ်တွင် ချထားပေးရန် စျေးသူစျေးသား များ၏ တောင်းဆိုချက်များကို ရန်ကုန် မြို့တော်စည်ပင်သာယာရေးက သဘောတူခဲ့သော်လည်း တရားဝင် စာချုပ် ချုပ်ဆိုပေးခြင်းမရှိဟု အလုံစျေး မှ ကိုမိုးသဲက ပြောသည်။
" ကော်မတီဝင်တွေက မူလနေရာ၊ မူလဆိုင်ခန်းအတိုင်း ပြန်ရ ရှိမယ်ဆိုရင် သဘောတူစာချုပ် ချုပ်ပါဆိုတော့ မြို့တော်ဝန်ကလည်း စာချုပ် ချုပ်မပေးဘူး။ လွှတ်တော်ကိုယ်စားလှယ် ၃ ဦးကလည်း စာချုပ် ချုပ်မပေးဘူး။ နှုတ်ကတိနဲ့ပဲ ပြောသွားတယ်။ ကျွန်တော် တို့က အကြိမ်ကြိမ် အလိမ်ခံရတဲ့အတွက် ကြောင့် ယုံကြည်မှုမရှိဘဲ လမ်းပေါ် တက်ခဲ့ ရခြင်းဖြစ်တယ်" ဟု ကိုမိုးသဲက ပြောသည်။
တရားဝင်စာချုပ် ချုပ်ဆိုပေးလျှင် စျေးသူ စျေးသားများအနေနှင့် လမ်းပေါ်ထွက် လာစရာမရှိဟု အလုံစျေးမှ စျေးသည် ကိုမျိုးမင်းဦးက ပြောသည်။
"ကျွန်တော်တို့ကို စာချုပ်စာတမ်းအပြည့် အစုံနဲ့ တရားဝင် လာပြီးတော့ ရှင်းပြမယ် ဆိုရင် ကျွန်တော်တိို့ စျေးသူစျေးသား တွေက ကိုယ့်စျေးပဲ ကိုယ်ရောင်းတော့ မှာပေါ့။ ဒီလိုမျိုးဆန္ဒ ထုတ်ဖော်မှုတွေ မလုပ်တော့ဘူးပေါ့။ ကျွန်တော်တို့ တရားဝင်ပိုင်ဆိုင်တဲ့ ၂၁၆ ခန်းလုံး မင်းတို့ ဒီနေရာ ဒီနေရာ နေရာ အလိုက် ၂၁၆ ခန်းလုံး ကိုယ့်ရဲ့မူလ အကျယ်အဝန်းနဲ့ မူလဆိုင်ခန်းအတိုင်း ပြန်ရမယ်ဆိုရင် ကျွန်တော်တို့ဘက်ကလည်း ကိုယ့်စျေး ပဲကိုယ် ရောင်းဖို့ပဲ ရှိတော့တယ်" ဟု ကိုမျိုးမင်းဦးက ပြောသည်။
ဆိုင်ခန်းနေရာများကို စျေးသူစျေးသားများတောင်းဆိုသည့်အတိုင်း ပြန်လည်နေရာရရှိစေရန် လွှတ်တော်ကိုယ်စားလှယ်များ၊ မြို့တော်ဝန်နှင့် စည်ပင်သာယာရေးကော်မတီတို့ သြဂုတ်(၁၉)ရက်နေ့၌ ညှိနိူင်းဆွေးနွေးခဲ့ကြသည်။
၎င်းနောက် ဆိုင်ခန်း(၂၁၆)ခန်းကို စျေးသူစျေးသားများတောင်းဆိုသည့်အတိုင်းမြေညီထပ်တွင် နေရာချထားပေးရန် သဘောတူညီခဲ့ကြပြီး ဆောက်လုပ်သည့်ပုံစံပါ ပြောင်းလဲပေးခဲ့သည်။သို့သော်စာချုပ်မချုပ်ပေးသည့်အတွက် ယနေ့တွင်ဆန္ဒထုပ်ဖေါ်ခဲ့ကြခြင်းဖြစ်သည်။
အလုံမြို့နယ်မဲဆန္ဒနယ်အမှတ်(၁) တိုင်းဒေသကြီးလွှတ်တော်ကိုယ်စားလှယ် ဒေါ်ယဉ်ယဉ်မြင့်ကမူ အလုံစျေးသူစျေးသားတောင်းဆိုသကဲ့သို့ ဆောက်လုပ်စစျေးများအတွက် စာချုပ်ချုပ်ဆိုခြင်းမျိုး အစဉ်အလာမရှိခဲ့ဖူးကြောင်း၊ ဆန္ဒပြသည်မှာ ၄င်းတို့၏သဘောထားဖြစ်သည့်အတွက် မပိတ်ပင်လိုကြောင်း ၊သို့သော်အဆင်ပြေပြီးသားကိစ္စရပ်အား ပြန်လည်ဆန္ဒပြသည်ကို နားမလည်နိုင်ကြောင်း ပြောသည်။
မူလပုံစံတွင် အသား၊ငါး ကုန်စိမ်းဆိုင်များကို မြေညီထပ်၊ ကုန်ခြောက်ဆိုင်များကိုပထမထပ် စသည်ဖြင့် စီစဉ်ထားခဲ့ ပြီး ကားပါကင်ပါရှိခဲ့သည်။ ယခုလက်ရှိပုံစံတွင် ဆိုင်ခန်း(၂၁၆)ခန်းအား မြေညီထပ်၌ထားရှိနိုင်ရန် ကားပါကင်အား ပြန်ဖြုတ်ခဲ့သည်။
အဆိုပါကိစ္စနှင့်ပတ်သက်၍ သြဂုတ်လ ၁၁ ရက်နေ့ကလည်း အလုံစျေးရှေ့တွင် ဆန္ဒဖော်ထုတ်ခဲ့သေးသည်။