ရန်ကုန်၊သြဂုတ်၁၉ ။ ။ အလုံစျေး ဆောက်လုပ်မှုကို စျေးသူစျေးသားများတောင်းဆိုချက်အတိုင်း ဆိုင်ခန်းအားလုံးကိုမြေညီထပ်၌ နေရာချထားပေးရန် အစီစဉ်ပြန်ဆွဲထားကြောင်း အလုံမြို့နယ် ပြည်သူ့လွှတ်တော်အမတ် ဦးရဲလွင်က ပြောသည်။
လွှတ်တော်ကိုယ်စားလှယ်များ၊ မြို့တော်ဝန်နှင့် ရန်ကုန်မြို့တော်စည်ပင်တို့ ယနေ့သြဂုတ် ၁၉ ရက်၌ တွေ့ဆုံညှိနိူင်းခဲ့ကြပြီးနောက် ယခုကဲ့သို့ စျေးသူစျေးသားများတောင်းဆိုနေသည့် မြေညီထပ်တွင် တစ်စုတစ်စည်းတည်းထားပေးရန် ဆုံးဖြတ်ခဲ့ခြင်းဖြစ်သည်။
"အားလုံး အဆင်ပြေသွားပါပြီခင်ဗျား။ အခု သူတို့လိုချင်တဲ့ ဆိုင်ခန်းပေါင်း(၂၁၇)ခန်းကို မြေညီထပ်မှာ အကုန်ပြန်Plan(အစီစဉ်)ဆွဲလိုက်ပါပြီ"ဟု အလုံမြို့နယ် ပြည်သူ့လွှတ်တော်ကိုယ်စားလှယ် ဦးရဲလွင်က မဇ္စျိမကို ပြောသည်။
မူလပုံစံတွင်မူ အသား၊ငါး ကုန်စိမ်းဆိုင်များကို မြေညီထပ်၊ ကုန်ခြောက်ဆိုင်များကို ပထမထပ် စသည်ဖြင့် စီစဉ်ထားခဲ့သည်။
ထို့အပြင် မူလပုံစံတွင် ကားပါကင်ပါရှိခဲ့ပြီး ယခုလက်ရှိပုံစံတွင် ဆိုင်ခန်း(၂၁၇)ခန်းအား မြေညီထပ်၌ထားရှိနိုင်ရန် ကားပါကင်အား ပြန်ဖြုတ်ခဲ့သည်ဟု ပြည်သူ့လွှတ်တော်အမတ်ဦးရဲလွင်ကပြောသည်။
အဆိုပါ အလုံစျေး ဆောက်လုပ်သည့်ကိစ္စနှင့်ပတ်သက်၍ စည်ပင်နှင့် စျေးသူစျေးသားတွေ သြဂုတ်လ ၁၅ ရက်က ပဋိပက္ခဖြစ်ပွားခဲ့သည်။ ထို့နောက် ရန်ကုန်မြို့တော်ဝန်ဦးမောင်မောင်စိုးက အလုံစျေးဆောက်လုပ်မှုကို ရပ်နားထားခိုင်းခဲ့သည်။
ယခု လက်ရှိအချိန်တွင် စျေးသူစျေးသားတောင်းဆိုချက်ဖြစ်သည့် မြေညီထပ်တွင် ဆိုင်ခန်းအားလုံးနေရာရရှိရေးကို လိုက်လျောကာ ဆောက်လုပ်သည့်ပုံစံအား ပြန်ပြောင်းလဲခဲ့ခြင်း ဖြစ်သည်။