ရန်ကုန်၊သြဂုတ်၁၇ ။ ။ H1N1ရောဂါဖြစ်ပွားသူ ရန်ကုန်တွင်အများဆုံးဖြစ်ပြီး သေဆုံးသူအရေအတွက်မှာ ဧရာဝတီတိုင်းတွင် အများဆုံးဖြစ်နေကြောင်း ကျန်းမာရေးနှင့်အားကစားဝန်ကြီးဌာန၏ သြဂုတ်လ(၁၆)ရက်နေ့ညပိုင်းက ထုတ်ပြန်ချက်စာရင်းများအရ သိရသည်။
Seasonal Influeza A(H1N1)pdm09 ရောဂါပိုးကို တိုင်းနှင့်ပြည်နယ်(၁၃)ခုတွင် တွေ့ရှိရသည့်အနက် ရန်ကုန်တိုင်းဒေသကြီး၌ (၈၁)ဦးဖြင့် အများဆုံးဖြစ်နေသည်။
ထို့အတူ တိုင်းနှင့်ပြည်နယ် (၁၃)ခုတွင် H1N1ရောဂါဖြင့် သေဆုံးသူဦးရေမှာ ဧရာဝတီတိုင်း၌ (၁၀)ဦးဖြင့် အများဆုံးဖြစ်သည်။
သြဂုတ်လ(၁၅)ရက်နေ့လည်(၂)နာရီမှ သြဂုတ်(၁၆)ရက်နေ့လည်(၂)နာရီအထိ H1N1ရောဂါတွေ့ရှိသူ(၂၀)နှင့် သေဆုံးသူ(၁)ဦးတိုးလာခဲ့သည်။
ထို့ကြောင့် တစ်နိုင်ငံလုံးတွင် H1N1ရောဂါဖြစ်ပွားသူ (၂၆၂)ဦးနှင့် သေဆုံးသူ(၂၆)ဦးရှိကြောင်း ဇူလိုင်(၂၁)မှ သြဂုတ်(၁၆)ရက်အထိ စာရင်းများအရသိရသည်။
H1N1ရောဂါတွေ့ရှိသည့် ပြည်နယ်နှင့်တိုင်းများမှာ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ရခိုင်ပြည်နယ်၊ မွန်ပြည်နယ်၊ ဧရာဝတီတိုင်းဒေသကြီး၊ နေပြည်တော်၊ ရှမ်းပြည်နယ်၊ ပဲခူးတိုင်းဒေသကြီး၊ မကွေးတိုင်းဒေသကြီး၊ ကရင်ပြည်နယ်၊ တနင်္သာရီတိုင်းဒေသကြီး၊ စစ်ကိုင်းတိုင်းဒေသကြီးနှင့် ချင်းပြည်နယ်တို့ ပါဝင်နေသည်။