ဆားလင်းကြီးရှိ အက်ဆစ်စက်ရုံကို ရွှေ့ပြောင်းရန် အစီအစဉ်မရှိဟု ကာကွယ်ရေးဒုဝန်ကြီး ပြော

ဆားလင်းကြီးရှိ အက်ဆစ်စက်ရုံကို ရွှေ့ပြောင်းရန် အစီအစဉ်မရှိဟု ကာကွယ်ရေးဒုဝန်ကြီး ပြော
တစ်ရက်လျှင် ဆာလ်ဖျူရစ်အက်ဆစ် တန် (၅၀)ထုတ်လုပ်နိုင်သော စက်ရုံဖြစ်ပြီး ထိုစက်ရုံအား အမေရိကန်ဒေါ်လာ ၅သန်းဖြင့် ရင်းနှီးမြှုပ်နှံထားသည်။

နေပြည်တော်(ဩဂုတ် ၁၆ရက်၊ ၂၀၁၇ခုနှစ်)။ ။ ဒေသခံများက ပြောင်းရွှေ့ပေးရန် တောင်းဆိုထားသော စစ်ကိုင်းတိုင်း၊ ဆားလင်းကြီးမြို့နယ်၊ ကံကုန်းကျေးရွာအနီးရှိ မိုးကြိုးဆာလ်ဖျူရစ်အက်ဆစ် စက်ရုံအား ရွှေ့ပြောင်းပေးရန် အစီအစဉ် မရှိကြောင်း ကာကွယ်ရေးဝန်ကြီးဌာန၊ ဒုတိယဝန်ကြီး ဗိုလ်ချုပ် မြင့်နွယ်က ပြောကြားလိုက်သည်။

“ဒေသဖွံ့ဖြိုးတိုးတက်ရေးနှင့် နိုင်ငံတော်အတွက် အကျိုးပြုသော စက်ရုံဖြစ်သည့်အတွက် ရွှေ့ပြောင်းပေးရန် အစီအစဉ်မရှိပါ” ဟု ဗိုလ်ချုပ် မြင့်နွယ်က ဩဂုတ်လ ၁၆ရက်၊ ပြည်သူ့လွှတ်တော်အစည်းအဝေးတွင် ပြောသည်။

ဆားလင်းကြီးမြို့နယ်၊ ပြည်သူ့လွှတ်တော်အမတ် ဦးဝင်းသိန်းဇော်က မြန်မာ့စီးပွားရေးဦးပိုင်လီမိတက်၏ မိုးကြိုးဆာလ်ဖျူရစ်အက်ဆစ် စက်ရုံလည်ပတ်ခြင်းကြောင့် လူမှုပတ်ဝန်းကျင်နှင့် သဘာဝပတ်ဝန်းကျင်တို့ကို ဆိုးရွားစွာ အန္တရာယ်ဖြစ်စေ၍ ဒေသခံပြည်သူများမှ စက်ရုံကို လွတ်ကင်းရာ နေရာသို့ ပြောင်းရွှေ့ပေးရန် တောင်းဆိုထားမှုအပေါ် အဆိုပါ စက်ရုံကို ပြောင်းရွှေ့ပေးရန် အစီအစဉ် ရှိ၊ မရှိ မေးမြန်းမှုအပေါ် အထက်ပါအတိုင်း ပြန်လည်ဖြေကြားခဲ့ခြင်း ဖြစ်သည်။

မိုးကြိုးဆာလ်ဖျူရစ်အက်ဆစ် စက်ရုံသည် နိုင်ငံတကာ အသိအမှတ်ပြု ISO လက်မှတ် (၃)စောင် ရရှိထားပြီးဖြစ်ခြင်း၊ လက်ပံတောင်းတောင် စုံစမ်းစစ်ဆေးရေးကော်မရှင်အဖွဲ့၏ အကြံပြုလမ်းညွှန်ချက်များနှင့်အညီ လိုက်နာဆောင်ရွက်နေခြင်း၊ စက်ရုံ၏ အသားတင်အမြတ်ငွေမှ (၂)ရာခိုင်နှုန်းအား ဒေသဖွံ့ဖြိုးရေးအတွက် CSR ရံပုံငွေအဖြစ် ဆောင်ရွက်လျက် ရှိခြင်း၊ စက်ရုံ၏ အနီးပတ်ဝန်းကျင်မှ ဒေသခံများအတွက် အလုပ်အကိုင်အခွင့်အလမ်း ရရှိစေခြင်း၊ စက်ရုံလည်ပတ်ခြင်းဖြင့် လူမှုပတ်ဝန်းကျင်နှင့်သဘာဝပတ်ဝန်းကျင်ကို ထိခိုက်မှု မရှိခြင်း၊ စက်ရုံမှ ထွက်ရှိသော အက်ဆစ်များကို လက်ပံတောင်းတောင်၊ စံပယ်တောင်တို့မှ ကြေးထုတ်လုပ်ရာတွင် အသုံးပြုခြင်းနှင့် လက်ပံတောင်းတောင်ကြေးနီစီမံကိန်းမှ အကျိုးအမြတ် (၅၁)ရာခိုင်နှုန်းအား နိုင်ငံတော်မှ ရရှိခံစားနေခြင်း စသည့် အကြောင်းများကြောင့် ပြောင်းရွှေ့ရန် အစီအစဉ် မရှိဟု ဗိုလ်ချုပ် မြင့်နွယ်က လွှတ်တော်တွင် ပြောသည်။

ကံကုန်းကျေးရွာ ဒေသခံများကမူ မိုးကြိုးဆာလ်ဖျူရစ် အက်ဆစ်စက်ရုံမှ အနံ့ဆိုးများ ထွက်ရှိသဖြင့် စက်ရုံကို ရွှေ့ပြောင်းပေးရန် စစ်ကိုင်းတိုင်းဝန်ကြီးများထံ ပြီးခဲ့သည့် မေလအတွင်းက တင်ပြထားသည်။

မြန်မာ့စီးပွားရေးဦးပိုင်လီမိတက်သည် မိုးကြိုးဆာလ်ဖျူရစ် အက်ဆစ်စက်ရုံအား တရုတ်နိုင်ငံမှ NORINCO ကုမ္ပဏီနှင့် ၂၀၀၅ခုနှစ်တွင် စာချုပ် ချုပ်ဆို၍ ၂၀၀၆ခုနှစ်၊ မေလ (၁၅)ရက်တွင် စက်ရုံကို စတင် တည်ဆောက်ခဲ့သည်။

၂၀၀၇ခုနှစ်၊ ဧပြီလတွင် စတင် လည်ပတ်ခဲ့ပြီး တစ်ရက်လျှင် ဆာလ်ဖျူရစ်အက်ဆစ် တန် (၅၀)ထုတ်လုပ်နိုင်သော စက်ရုံဖြစ်ပြီး ထိုစက်ရုံအား အမေရိကန်ဒေါ်လာ ၅သန်းဖြင့် ရင်းနှီးမြှုပ်နှံထားသည်။

စက်ရုံမှ ထုတ်လုပ်သော ဆာလ်ဖျူရစ်အက်ဆစ်များအား လက်ပံတောင်းတောင်၊ စပယ်တောင်နှင့် ကြေးစင်တောင်တို့၌ ကြေးထုတ်လုပ်ရာတွင် အသုံးပြုခြင်းလည်း ဖြစ်သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly