ပြိုင်ပွဲကို လွှမ်းမိုးမှုနဲ့ One Championship ကို ပြန်လာတဲ့ လီယန်ဒရိုအစ်ဆာ

ပြိုင်ပွဲကို လွှမ်းမိုးမှုနဲ့ One Championship ကို ပြန်လာတဲ့ လီယန်ဒရိုအစ်ဆာ

ဘရာဇီးဖိုက်တာ လီယန်ဒရိုအစ်ဆာက UFC ပွဲတွေမှာသာ ထိုးသတ်နေပြီး One Championship ပွဲတွေနဲ့ ဝေးကွာနေတာ လေးနှစ်လောက်ရှိပါပြီ။ ONE: KINGS AND CONQUERORS ရဲ့ စတုတ္ထမြောက် ပွဲစဉ်မှာတော့ အစ်ဆာက ပရိသတ်တွေကို သူ့အစွမ်းပြသွားခဲ့ပါတယ်။

အစ်ဆာက ဂျူဂျစ်ဆု ခါးပတ်အနက်အဆင့်ရှိသူဖြစ်ပြီး ချန်ပီယံတစ်ဦးလည်း ဖြစ်ပါတယ်။ သူ့ရဲ့ပြိုင်ဘက် တိုနီတာရူကလည်း ခေသူတော့ မဟုတ်ပါဘူး။ Cage Warriors World Championship ပြိုင်ပွဲရဲ့ ဘင်တန်ဝိတ်တန်းမှာ ချန်ပီယံတစ်ဦးဖြစ်ပါတယ်။

ဒါပေမဲ့ ပထမအချီစလွှတ်လိုက်ကတည်းက အစ်ဆာဟာ တိုနီတာရူကို လှဲသိပ်ချုပ်ကိုင်ပြီး အပေါ်စီးကနေ တရစပ်ထိုးသတ်ခဲ့တာပါ။ ပွဲစပြီး တစ်မိနစ်လောက်ကတည်းက ပထမအချီပြီးဆုံးတဲ့အထိ တံတောင်ရိုက်ချက်တွေ တရစပ်လက်သီးထိုးချက်တွေနဲ့ အစ်ဆာအသာရခဲ့ပါတယ်။

ဒုတိယအချီမှာလည်း အစ်ဆာက တိုနီတာရူရဲ့ မျက်နှာကို ဘယ်ဝိုက်လက်သီးတစ်လုံးပစ်သွင်းပြီး အထိနာစေခဲ့ပါတယ်။ အဲ့ဒီနောက်တော့ ထပ်မံလှဲသိပ်ပြီး အပေါ်စီးက ထိုးသတ်ပြန်ပါတယ်။ လက်သီးတွဲလုံးတွေက တရစပ်နဲ့ တစ်ဖက်သတ်ကြီး ဖြစ်နေတာကြောင့် ဒုတိယအချိ တစ်မိနစ်ခွဲမှာ ကြိုးဝိုင်းဒိုင်က ပွဲရပ်ပြီး အစ်ဆာကို အနိုင်ပေးလိုက်ပါတော့တယ်။

အစ်ဆာအတွက် MMA ပြိုင်ပွဲတွေမှာ ၁၄ ပွဲမြောက်နိုင်ပွဲဖြစ်ပြီး တိုနီအတွက်တော့ ၆ ပွဲမြောက်ရှုံးပွဲ ဖြစ်ခဲ့ရပါတယ်။

 

Mizzima Weekly