အဆင့်မြင့်ဈေးဆောက်လုပ်ပြီးပါက အဟောင်းထည်များ ရောင်းချခွင့်မရမည်ကို စိုးရိမ်နေကြ

.

ဓာတ်ပုံ - မင်းမျိုးနွယ်/RiA

စစ်တွေ၊ သြဂုတ် ၁ ရက်။          ။ ရခိုင်ပြည်နယ်၊ စစ်တွေမြို့ရှိ မေယုဈေးဟောင်းနေရာကို ပြီးခဲ့သည့် ၂၀၁၆ ခုနှစ်မှ စတင်ကာ အဆင့်မြင့်ဈေး ဆောက်လုပ်ရန်အတွက် ပြင်ဆင်လျှက်ရှိပြီး   ဆောက်လုပ်ပြီးပါက လက်ရှိရောင်းချလျှက်ရှိသည့် အဟောင်းထည်(ဘေထုပ်) များအား ရောင်းချခွင့်မရရှိမည်ကို ဈေးဆိုင်ပိုင်ရှင်များ စိုးရိမ်လျှက်ရှိသည်။

အဆိုပါဈေးမှာ ရခိုင်ပြည်နယ်၏ အကြီးဆုံးသော အဟောင်းထည်များရောင်းချရာ ဈေးတစ်ခုဖြစ်ပြီး နိုင်ငံခြားဖြစ် ကုန် ပစ္စည်းများဖြစ်သည့် အဝတ်အထည်နှင့် အိမ်သုံးပစ္စည်းများကို အဓိက ရောင်းချနေသည့်ဈေးလည်း ဖြစ်သည်။

“ဈေးကို အသစ်ဆောက်ပေးမယ်ဆိုတော့ ကျွန်တော်တို့လည်း ဝမ်းသာတာပေါ့။ ဒါပေမယ့် ကျွန်တော်တို့ စိုးရိမ်တာက ဈေးဆောက်ပြီးလို့ရှိရင် ဒါတွေကို ရောင်းချခွင့်မရမှာကိုပါပဲ။ တလောက စည်ပင်သာယာနဲ့ အစိုးရအဖွဲ့ ဝန်ကြီးတွေ လာတုန်းက ပြောသွားပါတယ်။ အဟောင်းထည်တွေကို ရောင်းချနိုင်ဖို့အတွက်လည်း စီစဉ်ပေးရမယ်ဆိုပြီး ပြောသွားပါတယ်။ တရားဝင်ပြောသွားတာတော့ မဟုတ်ဘူး။ နောက်ကျမှ အဟောင်းထည်တွေကို ရောင်းချခွင့်မပြုဘူး ဆိုရင် အခက်အခဲ ရှိနိုင်ပါတယ်”ဟု လက်ရှိမေယုဈေး (ယာယီ)တွင် ရောင်းချလျှက်ရှိသည့် ဈေးဆိုင်ပိုင်ရှင်တစ်ဦးက ပြောသည်။

အဆိုပါဈေးမှာ ယခင်ကတည်းက တရားဝင်ဖွင့်လှစ်ထားသည့် စည်ပင်သာယာဈေးတစ်ခုဖြစ်ပြီး ယင်းဈေးတွင် စစ်တွေမြို့မဈေးကဲ့သို့ ကုန်စုံရောင်းချသည့် ဈေးမျိုးမဟုတ်ဘဲ အဟောင်းထည်များ ကိုသာ သီးသန့်ရောင်းချသည့် ဈေးလည်းဖြစ်သည်။

“ဈေးသစ်ဆောက်လို့ပြီးရင်တော့ လက်ရှိဆိုင်ခန်းပိုင်ရှင်တွေက အဲဒီဈေးထဲမှာ ဆိုင်ခန်းတွေရရှိမှာပါ။ ငွေပေးသွင်းဖို့ မလိုပါဘူး။ ဒါပေမယ့် အဆင့်မြင့်ဈေး ဖြစ်တဲ့အတွက် လက်ရှိရောင်းချနေတဲ့ ပစ္စည်းတွေကို တားမြစ်မှာကို စိုးရိမ်ပါ တယ်။ ဝန်ကြီးကလည်း လာကြည့်တုန်းပြောသွားတာပဲ ဖြစ်ပါတယ်။ ဘယ်နေရာမှာ ချပေးမယ့် ဘယ်လိုတွေ စီစဉ်မယ် ဆိုတာကို အခုထိမပြောသေးဘူး။”ဟု ဆက်လက်ပြောကြားသည်။

ယင်းအပြင် မေယု အဆင့်မြင့်ဈေးဆောက်လုပ်နေမှုမှာ လွန်ခဲ့သည့် ၉ လခန့်က စတင် ဆောက်လုပ်နေခြင်းဖြစ်ပြီး ဈေးဆိုင်ခန်းများအား ယာယီဈေးသို့ ပြောင်းရွှေ့ပေးခဲ့စဉ်က ဈေးသစ်ဆောက်လုပ်မှုမှာ သုံးနှစ်ခန့်သာကြာမြင့်မည်ဟု ပြောဆိုထားခဲ့သော်လည်း ယခုအချိန်ထိ စီမံကိန်းမှာ အကောင်အထည်မပေါ်သေးကြောင်း ဈေးဆိုင်ပိုင်ရှင်များက ပြောသည်။

ထို့အပြင် လက်ရှိတွင်ရောင်းချခွင့် ပေးထားခဲ့သည့် ယာယီဈေးမှာ အဆင်မပြေမှုများရှိနေပြီး သက်ဆိုင်ရာဌာနများ အနေဖြင့် ဈေး၏ လိုအပ်ချက်များကို စီမံပေးမှု၊ ကြပ်မတ်ဆောင်ရွက်ပေးမှုများ အားနည်းနေကြောင်း သိရသည်။