ရန်ကုန်၊ ဇူလိုင် ၂၅ ။ ။ အကောင်အထည်ဖော်မှုအားနည်းနေသေးသည့် ရခိုင်ပြည်သူတို့၏ နိုင်ငံရေး၊ စီးပွားရေး၊ လူမှုရေးများကိုအကောင်အထည်ဖော်ရန် ကြိုးစားမည်ဟု ရခိုင်ဒီမိုကရေစီအဖွဲ့ချုပ်ပါတီ (ALP) ပါတီမှ ပါတီဖြစ်မြောက်ရေးကော်မတီဝင် ဦးမျိုးကျော်က ပြောဆိုလိုက်သည်။
၂၀၁၄ ခုနှစ်တွင် ရခိုင်တိုင်းရင်းသားများတိုးတက်ရေးပါတီနှင့် ALP ပါတီတို့ပေါင်းစည်းခဲ့သော်လည်း အများပြည်သူမျှော်လင့်သကဲ့သို့ စည်းလုံးညီညွှတ် သော အင်အားစုတစ်ရပ် ဖြစ်မလာခဲ့ဘဲ ပေါင်းစည်းထားသော ရခိုင်အမျိုးသားပါတီမှာ ရခိုင်ပြည်သူ တို့ ၏ နိုင်ငံရေး၊ စီးပွားရေး၊ လူမှုရေး ပြသာနာများကို ဖြေရှင်းပေးနိုင်သည့်အခြေအနေသို့ရောက်မလာခဲ့ဟု ဇူလိုင် ၂၅ ရက်စွဲဖြင့် ALP ပါတီမှ ထုတ်ပြန်သည်။
“ နှစ်ပါတီပေါင်းထားတဲ့အတွက် ရခိုင်ဒီမိုကရေစီအဖွဲ့ချုပ်ရဲ့မူတွေလဲ အဲ့ဒီမှာ ပါတာပဲ။ ဒါကြောင့် မူအရတော့ ရှိနေတယ်ဗျာ ဒါပေမယ့် လက်တွေ့လုပ်ဆောင်မှုတွေက အဲ့ဒီဟာတွေက အကောင်အထည်မပေါ်လာဘူးလေ။ လုပ်ဆောင်မှုအပိုင်းမှာ လိုနေတာ။ ဒါကြောင့် အဲ့ဒီ့ဟာကို ကျွန်တော်တို့ လက်တွေ့အကောင်အထည်ဖော်ဖို့အတွက် ကြိုးစားရမှာပေါ့ “ ဟု ဦးမျိုးကျော်က ဆိုသည်။
၂၀၁၆ ခုနှစ်နောက် ပိုင်းကာလ များတွင် ရခိုင်အမျိုးသားပါတီအတွင်း စည်းလုံးညီညွှတ်မှုကို ပြိုကွဲစေသော အခြေအနေတစ်ချို့ကြောင့် ရခိုင်ဒီမိုကရေစီအဖွဲ့ချုပ်ကို ပြန်လည် မှတ်ပုံတင်ရန် အခြေအနေတောင်းဆိုလာခဲ့ခြင်းဖြစ်သည်ဟု ALP ပါတီ၏ ထုတ်ပြန်ချက်တွင်ဖော်ပြထားသည်။
သို့သော် ရခိုင်အမျိုးသားပါတီ အထွေထွေအတွင်းရေးမှူးဦးထွန်းအောင်ကျော်က “ ရခိုင်အမျိုးသားပါတီသည် ပြည်သူတွေရဲ့လိုအပ်ချက်ကို အတိုင်းအတာ တစ်ခုအထိ ဖြည့်ဆည်းပေးနိုင်တာ မြင်နေရတဲ့အတွက် ဒီပုဂ္ဂိုလ်များရဲ့ စွပ်စွဲချက်သည် လုံးဝမှန်ကန်မှုမရှိဘူး။ ကျွန်တော်တို့က ကိုယ်ရည်မှန်း သလောက်မလုပ်နိုင်ဘူး။ ဒါပေမယ့် တစ်စိတ်တစ်ပိုင်းတော့ လုပ်နိုင်တယ်ဆိုတာ ခိုင်ခိုင်မာမာပြောနိုင်ပါတယ်ခင်ဗျ “ ဟု ပြောဆိုသည်။
ရခိုင်ဒီမိုကရေစီအဖွဲ့ချုပ်ပါတီ (ALP) ပါတီအနေဖြင့် ရန်ကုန်မြို့ရှိ တော်ဝင်နှင်းဆီတွင် ယနေ့ (ဇူလိုင် ၂၅) ပါတီ၏ ရပ်တည်ချက်များနှင့် ပက်သက်ပြီးသတင်းစာရှင်းပွဲပြုလုပ်ပြီး အဆိုပါ ထုတ်ပြန်ချက်ကို ကြေညာခဲ့ခြင်းလည်းဖြစ်သည်။
ALP အနေဖြင့် ရခိုင်ပြည်နယ်၏ ဒေသတွင်းလုံခြံုရေး၊ တရားဥပဒေစိုးမိုးရေးနှင့် နှင့် စစ်မှန်သောဖက်ဒရာယ်ပြည်ထောင်စုတည်ဆောင်ရေးတို့ကို ဦးစားပေးလုပ်ဆောင်သွားမည်ဟု လည်းထုတ်ပြန်ချက် တွင် ဖော်ပြထားသည်။