အမေရိကန် ဖို့ဒ် (Ford) မော်တော်ယာဉ်လုပ်ငန်း အုံနဲ့ကျင်းနဲ့ ၀င််တော့မှာလား

အမေရိကန် ဖို့ဒ် (Ford) မော်တော်ယာဉ်လုပ်ငန်း အုံနဲ့ကျင်းနဲ့ ၀င််တော့မှာလား
" အရှေ့ဒဂုံစက်မှုဇုန်ရှိ Ford Everest နှင့် Ford Ranger အမျိုးအစား ကားများကို ထုတ်လုပ်နေသော လုပ်ငန်းခွင်ကို တွေ့မြင်ရစဉ်" (Photo: Capital Automotive Limited)

အမေရိကန်နိုင်ငံ မီရှီဂန်ပြည်နယ်၊ ဒီရယ်ဘွန်းတွင် အခြေစိုက်သောသက်တမ်း ၁၀၀ ကျော် ဖို့ဒ် (Ford) အများပိုင်ကားကုမ္ပဏီသည် မိသားစုသုံးနှင့် လုပ်ငန်းသုံးကားများကိုဖို့ဒ် (Ford) အမှတ်တံဆိပ်နှင့် ထုတ်လုပ်နေပြီး ဇိမ်ခံအဆင့်မြင့် ကားများကိုတော့ လင်ကွန်း (Lincoln) အမည်ဖြစ် ထုတ်လုပ်လျက်ရှိသည်။

ကုမ္ပဏီအနေနှင့် ၂၀၁၆ ခုနှစ်တွင် မော်တော်ယာဉ်နှင့် အစိတ်အပိုင်းများရောင်းချခြင်းမှ ၀င်ငွေ အမေရိကန်ဒေါ်လာ ၁၅၁ ဘီလီယံရရှိခဲ့သည်။

ဖို့ဒ် (Ford) ဘယ်တော့ အလုံးအရင်းနဲ့ လာမလဲ

အဆိုပါမေးခွန်းနှင့် ပတ်သက်၍ မြန်မာပြည်တွင်း ကားသစ်စျေးကွက်ဝယ်လိုအား လုံးလုံးလျားလျားတိုးတက်လာသည့်အခါ Ford မော်တော်ယာဉ် ထုတ်လုပ်ခြင်းအတွက် အပြည့်အဝ ရင်းနှီးမြှုပ်နှံမှုများ ပြုလုပ်သွားမည်ဖြစ်ကြောင်း Ford ၏ အာဆီယံဆိုင်ရာဥက္ကဖြစ်သူ Mark Kaufman က အဖြေပေးထားသည်။

“ကားသစ်စျေးကွက်ကဒီမှာဘယ်လောက်အထိတိုးတက်နေလဲဆိုတဲ့အပေါ်မှာမူတည်ပါတယ်။ တိုးတက်လာမယ့် အချိန်ကိုစောင့်ကြည့်သွားမယ်၊ ပြီးတော့ Ford ရဲ့ ရင်းနှီးမြှုပ်နှံမှုတွေကိုဆက်လက်လုပ်ဆောင်သွားမှာဖြစ်ပါတယ်”

ယင်းကိုဇူလိုင်လ ၂၁ ရက်နေ့ကရန်ကုန်ရှိ Ford ကားအရောင်းစင်တာတွင် ပြုလုပ်သော Ford ၏ ကားတပ်ဆင်စက်ရုံ ဖွင့်လှစ်ကြောင်း မီဒီယာအား အသိပေးအခမ်းအနားတွင် Mark က မဇ္စျိမမီဒီယာ၏ တိုက်ရိုက်ရင်းနှီးမြှုပ်နှံမှုဆိုင်ရာ မေးခွန်းကိုဖြေကြားထားခြင်းဖြစ်သည်။

Mark က ဆက်လက်ပြီး “လက်ရှိ မြန်မာနိုင်ငံမှာ ကားသစ်စျေးကွက်က တစ်နှစ်ကို ၄၀၀၀ လောက်ပဲ ရောင်းချရတယ်။ ဗီယက်နမ်မှာဆိုရင် တစ်နှစ်ကိုကားသစ် ၃ သိန်း (၃၀၀၀၀ ၀ )ရောင်းချရတယ်”ဟုအာဆီယံ ၂ နိုင်ငံ၏ ကားသစ်စျေးကွက်ကို နှိုင်းယှဉ်ပြထားသည်။

ကားသစ်စျေးကွက်ဟု ဆိုရာတွင် နိုင်ငံတကာမှ တင်သွင်းသောကားများနှင့် ပြည်တွင်းတွင် တပ်ဆင်ထုတ်လုပ်သော ကားများလည်း ပါ၀င်သည်။

ကားသစ်စျေးကွက်အနေနှင့် “ပြည်တွင်းမှာ တပ်ဆင်ထုတ်လုပ်တဲ့ ကားသစ်တွေ ပိုရောင်းရတယ်၊ သူက ရန်ကုန်လိုင်စင်ရတာနဲ့ စျေးသက်သာတာရယ်ကြောင့်ပါ” ဟု မြန်မာနိုင်ငံ မော်တော်ယာဉ်ထုတ်လုပ် ဖြန့်ချိရောင်းချသူများအသင်း ဥက္ကဌဒေါက်တာစိုးထွန်း လက်တလော ပြည်တွင်းကားသစ်စျေးကွက် အခြေအနေကိုပြောပြသည်။

လက်ရှိအချိန်တွင် အမေရိကန်အမှတ်တံဆိပ် ဖို့ဒ် (Ford) အပါအဝင် နီဆန်း၊ ဆူဇူကီး၊ ကေအိုင်အေ၊ လီဖန်း၊ ဂရန်းတိုက်ဂါးအစရှိသည့် မော်တော်ယာဉ်များကို ပြည်တွင်းတွင် တပ်ဆင်ထုတ်လုပ်နေသည်ဟု ဒေါက်တာစိုးထွန်းက ပြောသည်။

မြန်မာနိုင်ငံရင်းနှီးမြှုပ်နှံမှုကော်မရှင်-MIC တွင် ကားတပ်ဆင်ထုတ်လုပ်ရန် အဆိုပြုထားသည့် မော်တော်ယာဉ်ကုမ္ပဏီများလည်း ရှိနေဦးမည်ဟု ၄င်းက ဆိုသည်။

မြန်မာ့ နိုင်ငံရေးအကူးအပြောင်းပြေးလမ်းပေါ်က ဖို့ဒ် (Ford)

မြန်မာသမ္မတဟောင်း ဦးသိန်းစိန်အစိုးရလက်ထက် အမေရိကန်၏ စီးပွားရေးပိတ်ဆို့မှုှ ရှိနေဆဲဖြစ်သည့် ၂၀၁၃ ခုနှစ် အချိန် က စတင်ကာဖို့ဒ် (Ford) သည် ထိုင်းအခြေစိုက် ရင်းနှီးမြှုပ်နှံမှုကုမ္ပဏီ RMA Group မှ တဆင့် မြန်မာနိုင်ငံကားသစ် စျေးကွက်သို့ တရားဝင် အစောဆုံး ၀င်ရောက်လာခဲ့သည်။

အရောင်းနှင့် ဖြန့်ချိရေးအပိုင်းကိုမူ ပြည်တွင်းထိပ်တန်းလုပ်ငန်းရှင် ဒေါက်တာကိုကိုကြီး ပိုင်ဆိုင်သည့် Capital Diamond Star Group (CDSG) ၏ မော်တော်ယာဉ် စီးပွားရေးလုပ်ငန်းခွဲဖြစ်သည့် Capital Automotive Limited (CAL) က တစ်ဦးတည်း အရောင်းကိုယ်စားလှယ်အဖြစ် လုပ်ကိုင်နေခြင်းဖြစ်သည်။

ထို့မှတစ်ဆင့် Capital Automotive Limited (CAL) သည် ဖို့ဒ် (Ford) မော်တော်ယာဉ်များကို ပြည်တွင်းတွင် တပ်ဆင်ထုတ်လုပ်ရန် မြန်မာနိုင်ငံရင်းနှီးမြှုပ်နှံမှုကော်မရှင်-MIC သို့ အဆိုပြုခဲ့ရာ MIC က လုပ်ငန်းများလုပ်ကိုင်ရန် ၂၀၁၆ ခုနှစ်၊ ဇန်နဝါရီလ ၁၉ ရက်နေ့ကခွင့်ပြုပေးခဲ့သည်။

ယင်း တပ်ဆင်ထုတ်လုပ်မှု လုပ်ငန်းကို Capital Motors Limited အမည်ဖြစ် လုပ်ကိုင်မည်ဖြစ်သည်။

၂၀၁၇ ခုနှစ် မတ်လတွင် ရန်ကုန်တိုင်းဒေသကြီး၊ အရှေ့ဒဂုံစက်မှုဇုန်တွင် ကနဦးအဆင့် ရင်းနှီးမြှုပ်နှံမှုအဖြစ် အမေရိကန် ဒေါ်လာ ၁၀ သန်းတန် ကားတပ်ဆင်စက်ရုံကို ဖွင့်လှစ်လုပ်ကိုင်ခဲ့ရာ ယင်းတပ်ဆင်စက်ရုံမှ Ford Everest နှင့် Ford Ranger မော်တော်ကားများကို ပြည်တွင်းဝန်ထမ်း ၈၅ ဦးခန့်ဖြင့် တပ်ဆင်ထုတ်လုပ်လျက်ရှိရာဖို့ဒ် (Ford) အနေနှင့် မြန်မာ့ကားလမ်းမများပေါ်သို့ လမ်းကြောင်းချဲ့ထွင်ရန် ကြိုးစားလာသည်။

မြေစမ်းခရမ်းပျိုး

၂၀၁၃ ခုနှစ်၊ အောက်တိုဘာလအတွင်းဖို့ဒ် (Ford) မိသားစုသုံးနှင့် လုပ်ငန်းသုံးကားများကို မြန်မာပြည်တွင် ဖြန့်ချီခဲ့ရာစျေးကွက်ဖြစ်ပေါ်ခဲ့သည့် အချိန် ၄ နှစ်အတွင်းဖို့ဒ် (Ford) ကားတပ်ဆင်ထုတ်လုပ်သည့် စက်ရုံကိုဖွင့်လှစ်ခဲ့ခြင်းဖြစ်ရာယင်းသည် စီးပွားရေးပေါင်းစပ်မှု၏ ရင်းနှီးမြှုပ်နှံမှု ပထမအဆင့်ဖြစ်သည်ဟု အကျိုးတူလုပ်ငန်းရှင်များက ဆိုသည်။

ကားတပ်ဆင်ထုတ်လုပ်သည့် စက်ရုံကိုဖွင့်လှစ်နိုင်ဖို့ ၂၀၁၅ ခုနှစ်၊ စက်တင်ဘာလက ပြည်ထောင်စုလွှတ်တော်က ပြဌာန်းခဲ့သော မြန်မာနိုင်ငံ မော်တော်ယာဉ်ဥပဒေကို စောင့်ကြည့်ပြီး ဆုံးဖြတ်ခဲ့ရသည်ဟု ပြည်တွင်းမိတ်ဘက် ကုမ္ပဏီ ဖြစ်သည့် Capital Automotive Limited (CAL) ဥက္ကဌဦးခင်ထွန်းကဆိုသည်။

“မော်တော်ယဉ် ဥပဒေထွက်လာပြီးတဲ့အချိန်မှာ ဖို့ဒ် (Ford) ရဲ့ ကားတပ်ဆင်စက်ရုံကို တည်ထောင်မလားဆိုပြီး စဉ်းစားခဲ့ကြ တယ်။ ဒီအတွက် Ford က အချိန် ၂နှစ်လောက် ရင်းနှီးမြှုပ်နှံခဲ့ရပြီးတော့မှ ဒီလုပ်ငန်းကို စတင်လုပ်ကိုင်နိုင်တာ ဖြစ်ပါတယ်” ဟုဦးခင်ထွန်းက ပြောသည်။

စျေးကွက်အနေနှင့် ပြည်တွင်းစျေးကွက်ကိုသာ အာရုံစိုက်သွားမည်ဖြစ်ကာ မော်တော်ယာဉ်ရောင်းချမှုကို တစ်နှစ်အတွင်း ကားအစီးရေ ၂၀၀၀ မှ ၃၀၀၀ အထိ မျှော်မှန်းထားသည်ဟု CAL ဥက္ကဌဦးခင်ထွန်းက ဆိုသည်။

ဦးခင်ထွန်းက“ဒါပေမယ့် စျေးကွက်က စီးပွားရေးအပေါ် မူတည်နေတာဖြစ်တဲ့အတွက် အတိအကျတော့ မျှော်မှန်းလို့မရဘူး” ဟုဆိုသည်။

အဆိုပါ ရန်ကုန်ကားတပ်ဆင်စက်ရုံမှ ထုတ်လုပ်သော Ford Everest နှင့် Ford Ranger အမျိုးအစားကားတစ်စီး၏ စျေးနှုန်းသည် အမေရိကန်ဒေါ်လာ ၃၀၄၀၀ (မြန်မာကျပ် သိန်းပေါင်း ၄၀၀ ကျော်) မှ စတင်သည်။

အနာဂတ်ရင်းနှီးမြှုပ်နှံမှုအတွက် အကောင်းမြင်ထားသောဖို့ဒ် (Ford)

ဖို့ဒ် (Ford) ၏ အာဆီယံဒေသဆိုင်ရာဥက္ကဌ Mark က မြန်မာ၏ လက်ရှိတစ်နှစ်ကိုကားသစ် ၄၀၀၀ ခန့် ရောင်းချနေရသည့် စျေးကွက်သည် သင့်လျော်သော ပထမအဆင့်ခြေလှမ်းဖြစ်လာခဲ့ပြီး အခြားကားထုတ်လုပ်သူများပါ စျေးကွက်ထဲ ရောက်ရှိလာသည့်အခါ ပြည်တွင်းစျေးကွက်သည် တိုးတက်လာမည်ဟု အကောင်းမြင်ပြောဆိုသည်။

“အဲဒိအခါကျရင် သူတွေက ရင်းနှီးမြှုပ်နှံမှုတွေကို အဆင့်တက် လုပ်ဆောင်ကြမှာ ဖြစ်ပါတယ်”ဟု Mark က ဆိုသည်။

ယခုနှစ် မတ်လအကုန်က စတင်ခဲ့သော မြန်မာ-ဖို့ဒ် (Ford) ကားတပ်ဆင်စက်ရုံရှိ လိုအပ်သော အစိတ်အပိုင်းများအားလုံးကိုထိုင်း၊ ဗီယက်နမ်စသောဖို့ဒ် (Ford) မော်တော်ကားစက်ရုံတို့မှ ရာခိုင်နှုန်း ၉၀ ကျော် တင်သွင်းခြင်းဖြစ်သည်။

အကျိုးတူ ကုမ္ပဏီများ၏ ဖြေကြားချက်များအရ ၎င်းတို့၏ ရင်းနှီးမြှုပ်နှံမှုများကို စျေးကွက်အနေအထားအရ မဖြစ်မနေ တိုးမြှင့်သွားမည်ဟု ပြောဆိုကြသည်။

ပြည်တွင်းမိတ်ဘက် Capital Automotive Limited (CAL) ဥက္ကဌဦးခင်ထွန်းက“ ဘယ်စက်ရုံပဲဖြစ်ဖြစ်၊ ဘယ်အမှတ် တံဆိပ်ပဲဖြစ်ဖြစ် လူအား (Manual) နဲ့ ထုတ်ရင် အစီးရေ ၆၀၀၀ (ခြောက်ထောင်) ထက် မပိုပါဘူး။ စျေးကွက်က ၆၀၀၀ ထက် ပိုလိုအပ်လာမယ်ဆိုရင် မဖြစ်မနေ Semi-auto (လူတစ်ဝက်+စက်တစ်ဝက်) ဆိုတဲ့ ကဏ္ဍကို သွားရပါတယ်”ဟု ရှင်းပြသည်။

Semi-Auto ကားစက်ရုံတစ်ခုလျှင် ကားအစီးရေးပေါင်း တစ်နှစ်ကို သုံးသောင်းမှ လေးသောင်းအထိ ထုတ်လုပ်နိုင်ကြောင်း ဦးခင်ထွန်းက ပြောသည်။

ဦးခင်ထွန်းက ဆက်လက်ပြီး “ ကျွန်တော်တို့ နိုင်ငံရဲ့ ရေမြေသဘာဝအရ နိုင်ငံတကာနဲ့ ကမ္ဘာလုံးဆိုင်ရာအတွက် Production အဖြစ် ထုတ်လုပ်သင့်တယ်ဆိုတဲ့ အချိန်ရောက်လာရင်တော့ မြန်မာပြည်မှာဖို့ဒ် (Ford) ကိုယ်တိုင်က ရင်းနှီးမြှုပ်နှံတဲ့ စက်ရုံတွေဖြစ်လာပါလိမ့်မယ်”ဟု ဖြည့်စွက်ပြောဆိုထားသည်။

ရာနှုန်းပြည့် တစ်ပတ်ရစ်ကားစျေးကွက်

ပြည်ပမှ တင်သွင်းပြီး အရောင်းပြခန်းနှင့် ရောင်းချသည့် ကားသစ်စျေးကွက်သည် မြန်မာ၏ ၂၀၁၀ နှောင်းပိုင်း ပြုပြင်ပြောင်းလဲမှု-ကားတင်သွင်း ခြင်းမူဝါဒအပြောင်းအလဲများနှင့် အတူ စီးပွားရေးမြို့တော် ရန်ကုန်တွင် စတင်သန္ဓေတည်ခဲ့ရာ ၉၈ ရာခိုင်နှုန်းရှိ မြန်မာပြည်၏ လမ်းမများကို စိုးမိုးလျက်ရှိသည့် တစ်ပတ်ရစ် ကားစျေးကွက်ကြားတွင် ရုန်းကန်နေရသည်။

မော်တော်ယာဉ် တင်သွင်းရောင်းချခြင်းတွင် အခွန်အခနှင့် မူဝါဒများက လက်ဆုပ်လက်ကိုင်တည်ငြိမ်မှု မရှိသေးဘဲ ယင်းအခြေအနေမျိုးတွင် ပြည်တွင်းကားစျေးကွက်အတွင်း တစ်ပတ်ရစ်ကားများကို တစ်နှစ်လျှင် အစီးရေတစ်သိန်းခွဲခန့် တင်သွင်းရောင်းချနေရပြီး ယင်းပမာဏက ကားသစ်စျေးကွက်ထက် အဆပေါင်း ၅၀ ခန့် များပြားနေသည်။

မြန်မာနိုင်ငံ မော်တော်ယာဉ် ထုတ်လုပ်ဖြန့်ချိရောင်းချသူများအသင်း ဥက္ကဌဒေါက်တာစိုးထွန်းကမူ “လူတွေ ၀င်ငွေမကောင်းရင် ကားသစ် ၀ယ်မစီးနိုင်ပါ၊ မြန်မာနိုင်ငံစီးပွားရေး ကောင်းဖို့လိုပါတယ်”ဟုပြောသည်။

“လူတွေ ၀င်ငွေ နည်းပါးသေးတယ်” ဟု ၄င်းက ထပ်မံပြောဆိုသည်။

လက်ရှိအချိန်တွင် ဖို့ဒ် (Ford) မော်တာကားတပ်ဆင်ထုတ်လုပ်သည့် စက်ရုံကိုရန်ကုန်တိုင်းဒေသကြီးအရှေ့ဒဂုံစက်မှု ဇုန်တွင် လုပ်သား ၈၅ ဦးဖြင့် ထုတ်လုပ်လျက် ရှိနေသည်။

ဖို့ဒ် (Ford) သည် ပြည်တွင်းထုတ်လုပ်မှုနှင့် စျေးကွက်အခြေအနေပေါ်မူတည်၍ ၎င်းတို့၏ ကားထုတ်လုပ်မှုအရေအတွက် ကိုခေတ်မှီ နည်းပညာနှင့် စက်များကိုအသုံးပြု၍ ထုတ်လုပ်လျက် ရင်းနှီးမြှုပ်နှံမှုများကို နှစ်အလိုက်တိုးမြှင့်သွားမည် ဖြစ်ကြောင်း မြန်မာနိုင်ငံရင်းနှီးမြှုပ်နှံမှုကော်မရှင်-MIC ညွှန်ကြားရေးမှူးဖြစ်သူ ဦးစိုးမြင့်အောင်ကကုမ္ပဏီ၏ MIC သို့ တင်ပြထားသော အဆိုပြုချက်ကို ကိုးကား၍ မဇ္စျိမကို ဖြေကြားထားသည်။

“ဖို့ဒ် (Ford) ရဲ့ ကားစျေးကွက်အခြေအနေပေါ် မူတည်ပြီးတော့ ကုမ္ပဏီဘက်က Semi-Auto စက်ရုံဘက်ကို တည်ထောင် လိမ့်မှာ ဖြစ်တဲ့အပြင် ပြည်တွင်းနဲ့ နိုင်ငံခြားစျေးကွက် အရွယ်အစားပမာဏအပေါ်မှာ မူတည်ပြီးတော့ Fully-Auto (စက်များနှင့် လည်ပတ်သည့်) စက်ရုံအဖြစ်သို့ တိုးချဲ့လုပ်ကိုင်သွားလိမ့်မှာဖြစ်ပါတယ်”ဟုဦးစိုးမြင့်အောင်က ပြောသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly