မကွေးတိုင်းဒေသကြီး ၊ပခုက္ကူ မြို့ အမှတ် ၁၂၊ အမှတ် ၁၃ ရပ်ကွက်များတွင်တပိုင်တနိုင် ရိုးရာခြေညှပ်ဖိနပ်လုပ်ငန်းများ တွင်ကျယ်စွာ လုပ်ဆောင်လျက်ရှိသည်။
ယင်းရိုးရာခြေညှပ်ဖိနပ်လုပ်များမှ ရဟန်းစီး သားရေဖိနပ်နှင့်ကတ္တီပါဖိနပ်များ၊ အမျိုးသား၊အမျိုးသမီး စီး သားရေဖိနပ်နှင့်ကတ္တီပါဖိနပ်များအား အများဆုံးထုတ်လုပ်ကြသည်။
"ရိုးရာခြေညှပ်ဖိနပ်က ကျန်းမာရေးနဲ့ညီညွတ်တယ်။နေပူထဲသွားရင် ခြေဖဝါးတွေမပူဘူး။ခြေဆီတွေ စုတ်ယူမှုရှိတယ်။အပူဒါဏ်ကာကွယ်လို့ ကောင်းတယ်"ဟု ပခုက္ကူမြို့ မှ ချင်းတွင်းဖိနပ်လုပ်ငန်းပိုင်ရှင် ဦးရဲထွဋ် က ဆိုသည်။
မြန်မာ့ရိုးရာ ခြေညှပ်ဖိနပ်များအားပြုလုပ်ရာတွင် ကုန်ကြမ်းအနေဖြင့် နွားသားရေ၊ ရာဘာတို့ဖြင့် အဓိက ပြုလုပ်ရပြီး မန္တလေး ၊မြင်းခြံ၊မုံရွာ၊မော်လမြိုင်အစရှိသည့် မြို့များမှ မှာယူကြရသည်။
"လက်မှုလုပ်ငန်းထွက်တဲ့ ပစ္စည်းတွေဖြစ်နေတော့ လုပ်ငန်းတွင်ကျယ်မှုက စက်ရုံထုတ်ဖိနပ်များနဲ့ကွာခြားနေတယ်။ ရိုးရာခြေညှပ်ဖိနပ်တွေက လက်လုပ်ပစ္စည်းတွေဖြစ်တဲ့အတွက်တော့ နိုင်ငံခြားဖြစ် စက်ရုံထုတ် ဖိနပ်တွေနဲ့ ယှဉ်ရင်တော့ စျေးကွာဟမှုရှိနေတယ်။ဒါပေမယ့် သုံးစွဲရင် အကြိုက်တွေ့ကြမှာပါ"၎င်းက ဆိုသည်။
အဆိုပါ ရိုးရာဖိနပ်လုပ်ငန်းများအနေဖြင့် မိုးရာသီလွတ်ကင်းချိန် သီတင်းကျွတ်လမှ ဖိနပ်များမှာယူမှု စတင်ချိန်ဖြစ်ပြီး နေပြည်တော်၊ရန်ကုန်၊စစ်တွေ၊မုံရွာ၊တောင်တွင်းကြီး၊မော်လမြိုင်နှင့် ဧရာဝတီတိုင်းရှိ မြို့အများစုအား ပို့ဆောင်ပေးရပြီး ကဆုန်လမှ စတင်ကာ မှာယူမှုနည်ပါးသွားသည်ဟု ဖိနပ်လုပ်ငန်းရှင်များက ဆိုသည်။
"အရင်က ဖိနပ်လုပ်သား များကြတယ်။ တစ်ရပ်ကွက်လုံးနီးပါး ဖိနပ်လုပ်ကြတယ်။ ခုကတော့ နိုင်ငံခြားဖိနပ်တွေ ဝင်လာတဲ့အခါ ရိုးရာခြေညှပ်ဖိနပ်က လူသုံးနည်းသွားတော့ လုပ်သားတွေကို အရင်ကလောက် အလုပ်မပေးနိုင်တော့ဘူး။ ပြီးတော့ ၁၂ရာသီ အလုပ်မပေးနိုင်တာလည်းပါနေတော့ လုပ်သားတွေက အခြားအလုပ်တွေ ပြောင်းလုပ်ကုန်ကြတယ်။ မှာယူမှုများတဲ့အခါ လိုသလောက်တော့ အချိန်မှီမပို့နိုင်တော့ဘူး"ဟု ဖိုက်စတား ဖိနပ်လုပ်ငန်းပိုင်ရှင် ကိုဇော်ထက်အောင်က ဆိုသည်။
လက်ရှိအချိန်တွင် မြန်မာ့ရိုးရာခြေညှပ်ဖိနပ်များအနေဖြင့် ပျောက်ကွယ်လုဆဲဆဲအခြေအနေများဖြင့် ရင်ဆိုင်နေရပြီး လုပ်ငန်းရှင်များအနေဖြင့်လည်း ၎င်းတို့၏ ရိုးရာလုပ်ငန်းများအား မပျောက်ပျက်စေရေး အရည်အသွေးမြင့်မားလာစေရန် ကြိုးပမ်းနေရလျှက်ရှိသည်။ယင်းလုပ်ငန်းများမပျောက်ပျက်ေစရေး ထိန်းသိမ်းထားနိုင်ရန်အတွက် ေသးစားချေးငွေလုပ်ငန်းများ နှင့်နှစ်ရှည်ချေးငွေများ ချထားပေးရေးမျှော်လင့်လျှက်ရှိနေကြသည်။