ဂျေရုဆလင်၊ ဇူလိုင် ၁၃ ။ ။ အနောက်ဖက်ကမ်း မြောက်ပိုင်းတွင် ရှိသော ဂျီနင်း ဒုက္ခသည်စခန်းတွင် အစ္စရေးစစ်သားများနှင့် ထိပ်တိုက်တွေ့မှုအတွင်း ပါလက်စတိုင်းနှစ်ဦး ပစ်သတ်ခံရကာ အခြားတစ်ဦး ဒဏ်ရာရကြောင်း ပါလက်စတိုင်း သတင်းဌာန ဝါဇာက ဇူလိုင် ၁၂ ရက်တွင် ဖော်ပြသည်။
ဒုက္ခသည်စခန်းတွင် ညပိုင်းက အစ္စရေးစစ်သားများကို ပါလက်စတိုင်းတိုက်ခိုက်သူများက သေနတ်ဖြင့် ပစ်ခြင်း၊ ဖောက်ခွဲခြင်းများလုပ်ဆောင်ရာမှ ယခုကဲ့သို့ ထိပ်တိုက်တွေ့မှု ဖြစ်ကြောင်း အစ္စရေးစစ်တပ် IDF က တွစ်တာတွင် ဖော်ပြသည်။
“တိုက်ခိုက်မှုကို တုံ့ပြန်ရတာဖြစ်တယ်။ တိုက်ခိုက်တဲ့သူတွေကိုပဲ ဦးတည်ပြီး ပြန်လှန်ပစ်ခတ်ခဲ့တာဖြစ်တယ်။”ဟု IDF က ဖြည့်စွက်ဆိုသည်။
သေဆုံးသူနှစ်ဦးတွင် အသက် ၂၁ နှစ်ရှိ နာဆားဆလက်ရှ်က ဦးခေါင်းထိမှန်ကာ နေရာတွင်ပင် သေဆုံးပြီး မိုဟာမက်ဆာလမ်မက်ရှက်က ဆေးရုံပေါ်တွင် သေဆုံးခြင်းဖြစ်ကြောင်း ဝါဖာသတင်းက အတည်ပြုသည်။
ထိပ်တိုက်တွေ့မှုတွင် ဒဏ်ရာရသူတစ်ဦးရှိကြောင်းကို ကျန်းမာရေးနှင့် ဒေသတွင်း သတင်းရင်းမြစ်များက ဖော်ပြပြီး အွန်လိုင်းသတင်း ဝိုင်နက်တွင် အစ္စရေးစစ်သားများဖက်တွင် ထိခိုက်ဒဏ်ရာရသူ မရှိခဲ့ကြောင်း ဖော်ပြသည်။
