ဆက်သွယ်ရေး ဥပဒေပုဒ်မ ၆၆(ဃ) ရှိသင့်လား (အပိုင်း ၃)

04 July 2017
ဆက်သွယ်ရေး ဥပဒေပုဒ်မ ၆၆(ဃ) ရှိသင့်လား (အပိုင်း ၃)

ဦးမျိုးသန့် (တာဝန်ခံ အယ်ဒီတာ)

Mizzima Media

ဆရာဦးသီဟစော ကျွန်တော်တို့ ဆက်သွယ်ရေး ဥပဒေဆိုင်ရာ သုတေသန အဖွဲ့အစည်းရဲ့ အစီရင်ခံစာကို ဖတ်တဲ့အခါမှာ တရားရင်ဆိုင်နေရတဲ့ မီဒီယာသမား ၁၄ ဦးလောက် ရှိတယ်လို့ ကျွန်တော်တို့ သွားတွေ့ရပါတယ်။ အဲတော့ ကျွန်တော်တို့ ဒီ ၆၆(ဃ)နဲ့ စွဲထားတာ ၁၄ ဦးလောက်ရှိတယ် ဆိုတဲ့အခါကျတော့ ခုနက ဆရာ့ကို မေးခဲ့သလိုပဲ လွတ်လပ်စွာ ထုတ်ဖော်ပြောဆိုခွင့် ဘယ်လောက်ထိ ထိခိုက်တယ်လို့ ဆရာ ပြောနိုင်မလဲ။

ဦးသီဟစော (Executive Director)

မြန်မာ သတင်းပညာသိပ္ပံ

အဲမှာ သတင်းသမားတွေ တရားစွဲခံရတဲ့ အရေအတွက်တွေ ကျွန်တေ်ာလည်း တွေ့ပါတယ်။ ၆၆(ဃ)က ဦးသိန်းစိန်လက်ထက်မှာ ဘယ်လောက်ရှိတယ်၊ အခု ဘယ်နှစ်မှုရှိတယ် မီဒီယာကို စွဲတာရှိတယ်၊ မီဒီယာမဟုတ်တဲ့သူတွေကို စွဲတာရှိတယ်ပေါ့နော်။ စသဖြင့် ရှိပါတယ်။ ဒါပေမယ့် ပြဿနာက ဘာလဲဆိုတော့ တကယ်တမ်းပြောရင် ကျွန်တော်က သတင်းသမားအနေနဲ့ ပြောတာဆိုတော့ သတင်းသမားတွေမှာက Main Stream Media နဲ့ Social Media တွေရှိတယ်။ Social Media မှာ ရေးတဲ့လူတွေက တကယ်ဆိုရင် သူတို့က Train Journalist မဟုတ်ဘူး။ ကျွန်တော်တို့ Journalist ဆိုတာတွေက  သင်ထားတယ်၊ ကြားထားတယ်၊ လေးကျင့်ထားတယ်။ Social Media မှာကျတော့ တကယ်ဆိုရင် သတင်းစားသုံးသူရော သတင်းထုတ်လုပ်တဲ့သူရော ကိုယ်တစ်ဦးတည်း ဖြစ်နေကြတယ် အများစုက အဲဒီ စားသုံးသူတွေကိုယ်တိုင်က ထုတ်လုပ်လာတဲ့အခါမှာ သူက သတင်းပညာ သင်ထားတာမဟုတ်ဘူး။ အဲတော့ သတင်းစည်းကမ်းတွေကိုလည်းမသိဘူး သတင်းကျင့်ဝတ်တွေကိုလည်း မသိဘူး။ ပြောစရာရှိတာ ပြောမှာပဲ အဲတော့ ပြောစရာရှိတာ ပြောတဲ့အခါမှာ လွတ်လပ်စွာပြောတယ် ပြောသင့်တာလည်းရှိသလို မပြောသင့်တာလည်း ရှိမှာပေါ့နော်။ အဲဒါကြောင့်မိုလို့ ပိုစွဲတယ်လို့ ကျွန်တော်မြင်တယ်။ အဲတော့ သတင်းသမားတွေကျတော့ ဘာဖြစ်လို့ သွားငြိလဲဆိုရင် ပြောရမယ်ဆိုရင်တော့ Eleven ကိစ္စတုန်းကဟာပေါ့ အဲဒီတုန်းက ကျွန်တော်တို့ကို ခေါ်ပြီးတော့ တိုင်ပင်တယ်။ တိုင်ပင်တဲ့အခါမှာ ကျွန်တေ်ာတို့က ဒါကို သတင်းမီဒီယာကောင်စီကို တိုင်ပါ တိုင်လို့ရှိရင် သတင်းဥပဒေအရဆိုရင် ကျင့်ဝတ်နဲ့ ညီသလား မညီသလားဆိုတာ ကျွန်တော်တို့ ဆုံးဖြတ်မယ်။ ကျင့်ဝတ်နဲ့ မညီရင် မညီတဲ့အကြောင်း ပြောပြီးတော့ လိုအပ်တဲ့ ပြင်ဆင်မှုတွေလုပ်ခိုင်းမယ်။ ဒါဆိုရင် တရားဘောင်လွတ် မဖြစ်တော့ဘူးပေါ့။ ဆိုတော့ အဲဒါကို ဝန်ကြီးချုပ်ကလည်း သဘောတူတယ်။ ဒါပေမယ့် တကယ်စွဲတဲ့အခါကျတော့ သူတို့က ဥပဒေကို နာမလည်သလိုပဲ သတင်းထဲမှာပါတဲ့ဟာကို သတင်းမီဒီယာကောင်စီကို တိုင်တယ်။ တစ်ပြိုင်နက်မှာပဲ အွန်လိုင်းမှာပါနေတဲ့ဟာကို ၆၆(ဃ) နဲ့ စွဲပစ်လိုက်တယ်။ သတင်းမီဒီယာဥပဒေမှာ ရှိနေတာက ၆၆(ဃ)နဲ့ စွဲလို့ တရားစွဲမှု စပြီဆိုလို့ရှိရင် ကျွန်တော်တို့ဆီမှာ ဘာမှမရှိတော့ဘူး။ ကျွန်တော်တို့ သတင်းမီဒီယာကောင်စီမှာ ပါဝင်ခွင့်ရှိတာက ဒီဟာ မစွဲဖြစ်အောင် တားဆီးဖို့ ကာကွယ်ဖို့ကျွန်တေ်ာတို့ ကိုယ်တိုင်က ပြီးခဲ့တဲ့ နှစ်နှစ်မှာဆိုရင် အမှု ၃ ခါလောက်ရှိတယ်။ သုံးခါလောက်မှာ ၉၀ ရာခိုင်နှုန်းလောက်က မဖြစ်အောင် ဖြေရှင်းပေးတာရှိတယ်။ တပ်မတော်လည်းပါတယ်။ တပ်မတော်ကလည်း တရားစွဲဖြစ်တာလည်းရှိတယ်။ တရားမစွဲဖြစ်အောင်လည်း ကျွန်တော်တို့ဘက်က တားဆီးခဲ့တာတွေရှိတယ်။

ဒါပေမယ့် နောက်ပြဿနာတစ်ခုက ဘာလဲဆိုတော့ သတင်းမီဒီယာကောင်စီကို ဦးစွာတိုင်ရမည်။ မတရားမစွဲမီပေါ့နော် တရားစွဲတဲ့အဆင့်ထိ မရောက်ခင် အဲသလို တိုင်ကြားရမည်လို့ ရေးတဲ့ဟာက အရင်အစိုးရလက်ထက်က လုပ်တဲ့ဥပဒေမို့ တိုင်ကြားနိုင်သည်လို့ ဖြစ်သွားတယ်။ အဲတော့ တရားမစွဲဆိုမီ သတင်းမီဒီယာကောင်စီကို တိုင်ကြားနိုင်သည်ပေါ့ အခုဟာက တိုင်ချင်တိုင်မယ် မတိုင်ချင်မတိုင်ဘူး ဖြစ်သွားရော။

အဲဒါကြောင့်မို့ ကျွန်တော်တို့ သတင်းမီဒီယာကောင်စီက ဆောင်ရွက်တဲ့အမှုတွေ အများကြီးရှိပေမယ့် သဘောကတော့ ရုံးမရောက် ဂတ်မရောက် ကာကွယ်ပေးတဲ့ အမှုတွေ အများကြီးရှိမယ်။ ကာကွယ်ပေးတာ သိပ်မသိဘူး။ ကာကွယ်ပေးလို့ မရလို့ အခုရောက်သွားတာ။ ဥပမာ ဦးကျော်ဝင်းစိန်လို အမှုဆိုရင် မတ်လကတည်းက စပြီးတော့ ကောင်စီကိုတိုင်တယ် တပ်မတော်က တိုင်တယ် တိုင်တဲ့အခါကျတော့ ကြားဝင်စေ့စပ်ပြီးတော့ အပြန်အလှန်ပြောဆို အပြန်အလှန် ညှိနှိုင်း တောင်းပန်တဲ့အဆင့်ကို လုပ်မလား မလုပ်ဘူးလား ပြောရင်းပြောရင်းနဲ့ နှစ်လခွဲသုံးလလောက်ကြာတယ်။ နှစ်လခွဲသုံးလလောက်ကြာတော့ ပြီးခါနီးပြီ ကိုကျော်ဝင်းစိန်တို့ဘက်ကလည်း တောင်းပန်တဲ့စာသားကို တပ်က လက်မခံဘူး။ တပ်က တောင်းပန်စေချင်တဲ့ စာသားကိုလည်း Voice က လက်မခံဘူး။ အဲလို ပြီးခါနီးအချိန်မှာ ကောက်ပြီးတော့ တရားစွဲပစ်လိုက်တယ်။ တရားစွဲလိုက်ပြီဆိုရင် ကျွန်တော်တို့ လုပ်ခွင့်မရှိတော့ဘူး။ ချက်ချင်းပြောပြီးတော့ ခင်ဗျားတို့ တရားစွဲမယ်ဆိုရင် တပ်မတော်အမှုကို ရုတ်သိမ်းနော်။ ကျွန်တော်တို့ ကောင်စီ မပါတော့ဘူး။ အဲလိုမျိုး ဆောင်ရွက်ပေးနိုင်တာတွေ ရှိပေမယ့် သတင်းမီဒီယာသမားဆိုရင်တော့ ကျွန်တော်တို့က ဖြစ်နိုင်လို့ရှိရင် သတင်းမီဒီယာသမားက လုပ်တဲ့အခါမှာ ကျင့်ဝတ်နဲ့ ညီမညီဆိုတာကို ဆုံးဖြတ်ဖို့အတွက် ကောင်စီကို တိုင်ကြားစေချင်တယ်။ ဒါဆိုရင် အများကြီး ရှင်းပေးလို့ရတယ်။ ဒါပေမယ့် သတင်းမီဒီယာ မဟုတ်ရင်ရော ဘယ်လိုလုပ်မလဲ။ သာမန်သူကတော့ရေးတယ် သာမန်လူတစ်ယောက်တင်တဲ့ Post ပေါ့။ အဲဒါမျိုးကျတော့ အဲဒီလူတွေမှာ ခုနကလို မီဒီယာအသုံးအနှုန်း မရှိဘူးပေါ့နော်။ အဲဒါမျိုးအတွက်ကိုက သီးခြား စဉ်းစားပေးဖို့ လိုမယ်လို့ထင်တယ်။

အမှန်ကတော့ သတင်းနဲ့ပတ်သက်လို့ရှိရင် အွန်လိုင်းဖြစ်ပါစေ Print ဖြစ်ပါစေ သတင်းမီဒီယာကောင်စီက တိုင်တွယ်ဆောင်ရွယ်မယ်ဆိုတာ ပါတယ်။ အဲဒါတွေကို ဥပဒေကို နားမလည်တာတွေကို   ရောထွေးတာတွေကြောင့် ပိုပြီးတော့ ရှုပ်ကုန်တယ်။ ဒါပေမယ့် လူတွေကတော့ သတိထားသင့်တာက ဒီ ၆၆(ဃ) က လွယ်လွယ်နဲ့ သုံးလို့ရတယ်။ သဘောကတော့ လွယ်လွယ်နဲ့ ရိုက်လို့ရတဲ့ တုတ်ပေါ့။ အဲလို သဘောထားပြီးတော့ သုံးနေတာရှိတယ်။ အဲဒီသဘောအတိုင်း ရှိနေတယ်ဆိုတာ သိလို့ရှိရင် ရှောင်ရင်ရှောင် မရှောင်ရင်လည်း ဘယ်လိုတုန့်ပြန်မလဲဆိုတာ စဉ်းစားထားပေါ့။ သဘောကတော့ အဲဒီ ၆၆(ဃ)ကို လွယ်လွယ်သုံးတဲ့ စရိုက်မျိုးကို ကျွန်တော် ပပျောက်စေချင်တယ်။

ဦးမျိုးသန့် (တာဝန်ခံ အယ်ဒီတာ)

Mizzima Media

ဟုတ်ကဲ့။ ကျေးဇူးတင်ပါတယ်။ ကိုမိုဃ်းသွေး အဲတော့ကျွန်တော်တို့က ဒီပြဿနာတွေ ခုနကပြောတဲ့ မကောင်းဘူးဆိုတဲ့ ၆၆(ဃ)က မကောင်းဘူးဆိုတာ ယေဘုယျ သုံးသပ်လို့ရတယ်။ ဆိုတော့ ကျွန်တော်တု့ိ တောင်းဆိုတယ်ပေါ့။ ဆရာတို့ဆိုရင်လည်း သွားပြီးတော့ စကားပြောဆိုတယ်ဆိုတော့ ဒီအရပ်ဖက် လူမှုအဖွဲ့အစည်းတွေအနေနဲ့ရော ပြင်ဖို့ ပြင်ဆင်ပေးဖို့ ပယ်ဖြတ်ပေးဖို့ ကိုမိုဃ်းသွေးတို့ ဘာတွေလုပ်နေတာတွေ ရှိလဲ။

ကိုမိုဃ်းသွေး (ဥက္ကဋ္ဌ)

Generation Wave

ကျွန်တော်တို့ကတော့ ခုနကပြောသလိုပေါ့ မောင်ဆောင်းခတို့က စခဲ့ပြီးတော့ ဆက်သွယ်ရေးဥပဒေ ပြင်ဆင်ရေး ပုဒ်မ ၆၆(ဃ) ဖျက်သိမ်းရေးဆိုပြိး လှုပ်ရှားနေတဲ့ လှုပ်ရှားမှုလေး တစ်ခုရှိတယ်။ အဲဒီမှာ ကျွန်တော်တို့ ပါဝင်နေတယ်။ ပြီးခဲ့တဲ့ တစ်ပတ်မှာဆိုရင်လည်း ကျွန်တော်တို့ ကာတွန်းပြပွဲလေးတွေ လုပ်တာရှိတယ်။ ပထမတစ်ခေါက် လွန်ခဲ့တဲ့ နှစ်ထဲမှာလည်း သူတို့ နေပြည်တော်မှာ သွားပြီးတော့ လွှတ်တော်မှာရှိတဲ့ သူတွေနဲ့ သွားပြီးတော့ တွေ့ခဲ့တာ ရှိတယ်ပေါ့။ အခု ထပ်ပြီးတော့လည်း ကျွန်တော်တို့ သွားပြီးတော့ ဆက်သွယ်ရေးဝန်ကြီးဌာနတို့ နောက်ပြီးတော့ သက်ဆိုင်ရာ ကော်မတီတွေကို သွားပြီးတော့မှ တိုက်တွန်းလှုပ်ရှားဖို့ရှိတယ်။ ဆိုတော့ တစ်ဖက်မှာလည်းပဲ ဒီရက်ပိုင်းမှာဆိုရင် မီဒီယာသမားတွေက လှုပ်ရှားနေတဲ့ သတင်းလွတ်လပ်ခွင့်ရှိရမည် ဒါမျိုးဆိုလို့ရှိရင် ကျွန်တော်တု့ိ Support လုပ်တယ်ပေါ့။ ဒီလိုမျိုး လွတ်လပ်စွာ ထုတ်ဖော်ခွင့်နဲ့ ပတ်သက်တဲ့ အခွင့်အရေး တောင်းဆိုတဲ့ လှုပ်ရှားမှုလေးတွေ ကျွန်တော်တို့ ဆက်ပြီးတော့ လုပ်သွားဖို့ရှိတယ်။

ဒါပေမယ့်လည်း တစ်ဖက်မှာလည်း ကျွန်တော်တို့ အဲဒီလို လှုပ်ရှားမှုတွေကို ကြီးကြီးမားမား ကျယ်ကျယ်ပြန့်ပြန့်ကြီးလည်း မဖြစ်ချင်ဘူး။ ဒါ ကျွန်တော်တို့ ပွင့်ပွင့်လင်းလင်းပြောတာပါ ဘာကြောင့်လဲဆိုတော့ လက်ရှိအစိုးရက ပြည်သူအများစုကနေပြီးတော့ တကယ့်ကို ဒီမိုကရေစီနည်းကျ ရွေးချယ်ထားတာ အပြောင်းအလဲလုပ်မယ်လို့ ရွေးချယ်ထားတဲ့ အစိုးရဖြစ်တယ်။ ဆိုတော့ အဲဒီကာလမှာ ကျွန်တော်တို့က ဆန္ဒပြမှုတွေ အစိုးရကို ဆန့်ကျင်မှုတွေပေါ့ ဒါမျိုးတွေ ဖြစ်သွားမှာကိုလည်း မလိုလားဘူး။ ဆိုတော့ တတ်နိုင်သလောက်ကို ညင်သာတဲ့နည်းလမ်းတွေနဲ့ ဒီဥပဒေ အပြောင်းအလဲဖြစ်အောင်တော့ ကျွန်တော်တို့ တိုက်တွန်း လှုပ်ရှားသွားဖို့ ရှိပါတယ်။

နောက်တစ်ခုက ဒီဥပဒေရဲ့ ဆိုးကျိုးကိုလည်း ကျွန်တော်တို့က မြင်စေချင်တယ်။ လက်ရှိ အစိုးရအဖွဲ့ကို ခေါင်းဆောင်နေတဲ့သူတွေ ဥပဒေပြုရေးအဖွဲ့တွေကို ခေါင်းဆောင်နေတဲ့သူတွေကို ဘာကြောင့်လဲဆိုတော့ ဒီ ရှေ့ကဆရာတွေ ပြောသလိုပေါ့ အခုဆိုလို့ရှိရင် ကျွန်တေ်ာတို့ The Voice ကို ဖမ်းတဲ့ကိစ္စပေါ့နော် အဲဒါက သရော်စာ သရော်စာဆိုလို့ရှိရင် ဒါက တကယ်တမ်းကျတော့ သတင်းမီဒီယာ ဂျာနယ်လစ်စင်ထဲမှာပါတယ်ဆိုပေမယ့် တကယ်တမ်းက သူက အချက်အလက်ကို အခြေခံထားတာမဟုတ်ဘူး။ အမြင်ပေါ့ ရေးတဲ့သူရဲ့ အမြင်ပေါ်မှာ အခြေခံထားပြီးတော့မှ အနုပညာဆန်ဆန် ဖေ်ာပြတဲ့သဘောတွေရှိတယ်။ သရော်တဲ့သဘောတွေရှိတယ်။ ဒါတွေကို အရေးယူလာတယ်ဆိုတော့ တော်တော်လေးကို အန္တရာယ်များတယ်။ အဲဒီကနေတစ်ဆင့် ဘာဖြစ်လာလဲဆိုတော့ ဥပမာ အရင်ခေတ်ကလိုပေါ့ဗျာ စစ်အစိုးရခေတ်ကလို မဆလခေတ်ကလို ကဗျာတစ်ပုဒ်ရေးပြီဆိုပါစို့ ကဗျာဆရာက သူ့ရဲ့ခံစားချက် ရသတွေအတိုင်း ဂရုဏာရသဖြစ်အောင်လည်း ရေးနိုင်တယ်။ ဒေါသရသဖြစ်အောင်လည်း ရေးနိုင်တယ်ပေါ့။ သူ ဒေါသရှိရင် ရှိသလို ပေါက်ကွဲတာတွေ ပါဝင်လာမယ်။ အဲဒီလိုဟာမျိုးကိုလည်း ဒီလိုမျိုး အရေးယူလာမယ်ဆိုလို့ရှိရင် ကျန်တဲ့ လွတ်လပ်စွာ ထုတ်ဖော်ခွင့်တွေတင်မကဘူး။ လွတ်လပ်စွာ အနုပညာဖန်တီးမှုတွေ စသည်ဖြင့်ပေါ့ လူတွေရဲ့ အသိ၊ လူတွေနဲ့ အနုပညာ၊ လူတွေရဲ့ လွတ်လပ်မှုကို တော်တော်ကြီးကို ကန့်သတ်တဲ့ အနေအထားကို ဖြစ်သွားနိုင်တယ်ပေါ့။ ဒါကိုလည်း လက်ရှိ လွှတ်တေ်ာတို့ အစိုးရတို့မှာ တာဝန်ရှိနေတဲ့ ပုဂ္ဂိုလ်တွေ မြင်စေချင်တယ်။

တကယ်တမ်း ကိုယ့်ရဲ့ အစိုးရကိုပဲဖြစ်ဖြစ် ဒါမှမဟုတ် အင်စတီကျူးရှင်း တစ်ခုခုကိုပဲဖြစ်ဖြစ် ထိခိုက်လာစေနိုင်မယ့် အပြုအမူမျိုး ပြောဆိုမှုတွေ လှုံ့ဆော်မှုတွေ နောက်ပြီးတော့ အကြမ်းဖက်မှုကို လှုံ့ဆော်မယ့်သူတွေ ဒါတွေကို အရေးယူချင်တယ်ဆိုရင် တခြားသော ဥပဒေတွေ ရှိပါတယ်။ ခုနကလိုပဲ သတင်းမီဒီယာနဲ့ပတ်သက်လို့ မှားယွင်းတဲ့အချက်အလက်တွေနဲ့ အဖွဲ့အစည်းတစ်ခုခုကို ဒါမှမဟုတ် ပုဂ္ဂိုလ်အချင်းချင်း တိုက်ခိုက်လာမယ်ဆိုရင် ခုနကပြောသလို သတင်းမီဒီယာကောင်စီရှိတယ်။ ဒါ ကျင့်ဝတ်နဲ့ မညီဘူးဆိုရင် သူတို့အချင်းချင်း အရေးယူလို့ရတယ်။ လူထုကြားထဲမှာဆိုရင် တစ်ယောက်နဲ့တစ်ယောက် ခြိမ်းခြောက်တယ်။ ဒါမှမဟုတ်ရင် အကြမ်းဖက်ဖို့ လှုံ့ဆော်တယ်။ ဒါမျိုးဆိုရင် တခြားသောဥပဒေတွေ ရှိတယ်။ ဒီဘုံပေါ့ အရမ်းကို ကျယ်ပြန့်တဲ့ ၆၆(ဃ)ကို ကိုင်ပြီးတော့ လုပ်နေတဲ့ ကိစ္စကတော့ ဒါ လူထုတစ်ခုလုံးအပေါ် အတွေးအခေါ်ဘက်ကပဲကြည့်ကြည့် ကျင့်ဝတ်ဘက်ကပဲကြည့်ကြည့် အန္တရာယ် ကျရောက်လာမယ်လို့ ကျွန်တော်တို့ မြင်ပါတယ်။ ကျွန်တော်တို့ဘက်ကလည်း တက်နိုင်သလောက် တစိုက်မတ်မတ် လုပ်သွားမှာပါ။

ဦးမျိုးသန့် (တာဝန်ခံ အယ်ဒီတာ)

Mizzima Media

ဟုတ်ကဲ့ ကျေးဇူးတင်ပါတယ်။ ဆရာဦးရောဘတ်ဆန်းအောင်ကို ကျွန်တော် မေးပါရစေခင်ဗျ။ အဲတော့ ဆရာဦးသီဟစောကလည်း ပြောခဲ့တယ် ရိုက်ကောင်းတဲ့ တုတ်တစ်ခုလို့ ပြောတယ်ဆိုတော့ ဆရာကရော ဒီအပေါ်မှာ ဘယ်လိုမြင်လဲ။

ဦးရောဘတ်ဆန်းအောင် (တရားလွှတ်တော်ရှေ့နေ)

ကျွန်တော်တို့ကလည်း တစ်လျှောက်လုံး အဆိုပြုတာက ဒါက လက်စားချေရေး ဥပဒေဖြစ်နေတယ်။ ကိုယ့်ကို နည်းနည်းလေး ဖြစ်လိုက်တာနဲ့ ကောက်ပြီေးတာ့ အချုပ်ထဲထည့် ဒုက္ခရောက်အောင် လုပ်ဖို့အတွက် အသုံးပြုတဲ့ တုတ်ပါပဲ။ အဲတော့ အဲတော့ ဆရာဦးသီဟစော ပြောတာက သူကတော့ စာရေးဆရာအမြင်နဲ့ပြောတာ။ ကျွန်တော်တို့ကတော့ ဥပဒေအပြင် အမြင်နဲ့ပြောရင်တော့ ပြည်သူရဲ့ Right to no ကို ကန့်သန့်ချုပ်ချယ်တဲ့ ဥပဒေမျိုး ဖြစ်နေတော့ လူ့အခွင့်အရေးကို ပိတ်ပင်တာလည်းဖြစ်တယ်။ ကျွန်တော်တို့ လက်မခံတာ အဲဒါကြောင့်ပါ။

ဦးမျိုးသန့် (တာဝန်ခံ အယ်ဒီတာ)

Mizzima Media

နောက်တစ်ခုက ဒီအမှုနဲ့ တရားစွဲခံပြီးတဲ့နောက်မှာ အာမခံကိစ္စပေါ့နော်။ အာမခံပေးတဲ့ကိစ္စမှာ သာမန်လူတွေမြင်တာက အာမခံ ရတဲ့လူတွေရတယ် မရတဲ့လူတွေက မရဘူး ဒီအပေါ်မှာရော ဆရာ ဘယ်လိုမြင်လဲ။

ဦးရောဘတ်ဆန်းအောင် (တရားလွှတ်တော်ရှေ့နေ)

ဟုတ်တယ် အဲဒါကတော့တရားသူကြီးတွေ ခြေထောက်အတိုအရှည်ပေါ်မှာ မူတည်သွားတာပေါ့။ အာဏာပိုင်ကနေ ဖိအားပေးပြီးတော့ ဖွင့်တဲ့အမှုဆိုရင် အာမခံမလွယ်ဘူး။ ကျန်တဲ့ သာမန်ဟာလေးတွေမှာတော့ အာမခံပေးတယ်။ ပေးတယ်ဆိုတာတောင်မှ စတိအနေနဲ့ ၁၄ ရက်တော့ အင်းစိန်ထောင်ကို သွားရတယ်။ အဲတော့ ဒါက ဥပဒေကို အဓိပ္ပာယ်ကောက်ယူတဲ့နေရာမှာ ကျယ်ပြန့်စွာ အဓိပ္ပာယ်ဖွင့်ပြီးတော့ ကျင့်သုံးလို့ ဒီဟာဖြစ်နေတာ။ တကယ်တမ်းအရ Narrow Definition  အရဆိုရင် လာတာနဲ့ ချက်ခြင်းပေးရမယ်။ လူ့ယဉ်ကျေးမှု အနိမ့်အမြင့်ပေါ်မှာ မူတည်တယ်။ လူ့ယဉ်ကျေးမှု မြင့်မားလာတာနဲ့အမျှ စဖမ်းတဲ့အချိန်က အာမခံပေးရမယ်။ ဒါက ကျွန်တော်တို့ ပြည်သူ့ တရားသူကြီးဥက္ကဋ္ဌ သူရဦးအောင်ဖေကလည်း ပြောခဲ့ဖူးပါတယ်။ ပထမအကြိမ် ကောင်စီ လွှတ်တော်သက်တမ်း စတုတ္ထအကြိမ် အစည်းအဝေးမှာ ပြောခဲ့တာက ဒါ ဥပဒေဆောင်ပုဒ်နဲ့ ကိုက်ညီပါတယ်။

အခုကတော့ စဖမ်းပြီဆိုတာနဲ့ သွားထောင်ထဲကို ဆိုတာ ဖြစ်နေပါတယ်။ ဒါကြောင့်မို့ ဒီဥပဒေကို ဥပဒေအတိုင်း ပြန်လုပ်ပေးပါ။ ဥပဒေအတိုင်းဆိုရင် ထက်မပိုသောကို ၁ နှစ်ကနေ ၃ နှစ်အထိဆိုတဲ့ အမျိုးအစားထဲမှာ သွင်းပြီးတော့ အာမခံပေးလိုက်ပါ။ နောက်မှ ချချင်သလောက်ချ။ အငြင်းအခုန် မဖြစ်နိုင်ပါဘူး။ အခုကတော့ မဟုတ်ဘူး စကတည်းက အချုပ်ထဲကို တန်းရောက်သွားရော။ အဲဒါခံနေရတာ။

အပိုင်း (၁)ကို အောက်ပါလင့်တွင် ကြည့်ရှု့နိုင်ပါသည်- http://www.mizzimaburmese.com/article/28615

အပိုင်း ( ၂ )ကို အောက်ပါလင့်တွင် ကြည့်ရှု့နိုင်ပါသည် - http://www.mizzimaburmese.com/article/28655

 

အပိုင်း (၁)ကို အောက်ပါလင့်တွင် ကြည့်ရှု့နိုင်ပါသည်- http://www.mizzimaburmese.com/article/28615
အပိုင်း (၁)ကို အောက်ပါလင့်တွင် ကြည့်ရှု့နိုင်ပါသည်- http://www.mizzimaburmese.com/article/28615
အပိုင်း (၁)ကို အောက်ပါလင့်တွင် ကြည့်ရှု့နိုင်ပါသည်- http://www.mizzimaburmese.com/article/28615

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly