ကင်မရာနှစ်လုံးနည်းပညာမှာ တဆင့်တက်လှမ်းနိုင်ခဲ့တဲ့ HUAWEI P10

ကင်မရာနှစ်လုံးနည်းပညာမှာ တဆင့်တက်လှမ်းနိုင်ခဲ့တဲ့ HUAWEI P10

ကင်မရာနှစ်လုံးပါတာ ဘာအတွက်ကြောင့်လဲ။

ပရော်ဖက်ရှင်နယ်အဆင့် ဓာတ်ပုံပညာရပ်အတွက် SLR ဟု ခေါ်သည့် single-lens reflex ပါဝင်သော ကင်မရာများကို ဓာတ်ပုံဆရာများက မရှိမဖြစ် လိုအပ်သော စက်ကိရိယာတစ်ခုအဖြစ် စံထား လက်ခံအသုံးပြုကြပါသည်။ စမတ်ဖုန်းများသည် သာမန်ဒစ်ဂျစ်တယ် ကင်မရာများထက် ကြည်လင်ပြတ်သားသည့် ဓာတ်ပုံများကို ရိုက်ယူနိုင်ပြီး ဓာတ်ပုံရဲ့ pixel အရေအတွက် ပိုကောင်းလာအောင် လုပ်နိုင်သော်လည်း SLR ကင်မရာများနှင့် ရိုက်ကူးထားသည့် ဓာတ်ပုံအရည်အသွေးကို မီလာနိုင်မည် မဟုတ်ပါ။ အဆိုပါ အကြောင်းအရင်းမှာ စမတ်ဖုန်းများတွင်ပါဝင်သည့် ကင်မရာ၏ မှန်ဘီလူးများသည် SLR ကင်မရာများထဲမှ မှန်ဘီလူးများထက် ၂၀ စင်တီမီတာခန့် ပိုပြီးပါးလွှာနေသောကြောင့် ဖြစ်ပါသည်။ ယင်းအခက်အခဲကို စမတ်ဖုန်းများအနေဖြင့် မည်သို့မျှ ကျော်လွှားနိုင်မည် မဟုတ်ပါ။

ယခုလက်ရှိအခြေအနေတွင် စမတ်ဖုန်းများအနေဖြင့် ပိုကောင်းသည့် ဓာတ်ပုံအရည်အသွေး ရရှိစေမည့် နည်းလမ်းမှာ ကင်မရာနှစ်လုံးပါဝင်သည့် dual camera နည်းပညာသာဖြစ်ပါသည်။ ကင်မရာတစ်လုံးတည်းကို အသုံးပြုရာမှ ကင်မရာနှစ်လုံးကို အသုံးပြုသည့်နည်းပညာသည် အမှန်တကယ်မှာ သက်ရှိများ၏ မျက်လုံးတည်ဆောက်မှုကို တုပထားခြင်း ဖြစ်သည်။ သက်ရှိသတ္တဝါတို့၏ မျက်လုံးတည်ဆောက်မှုသည် နှစ်သန်းပေါင်းများစွာ ဆင့်ကဲပြောင်းလဲမှုကြောင့် အကောင်းဆုံး အခြေအနေတွင် ရှိပါသည်။ လူတို့၏ ဦးနှောက်ထဲတွင် အချက်အလက် ထုတ်လွှင့်သိုလှောင်မှု၏ ၉၀ ရာခိုင်နှုန်းသည် ရုပ်ပုံများဖြစ်ပါသည်။ လူ့မျက်လုံးမှ ရုပ်ပုံများကို ကြည်လင်ပြတ်သားစွာ ဖမ်းယူနိုင်မှု၊ အလင်းအမှောင်ချိန်ညှိမှု၊ မျက်လုံးအိမ်ထဲ အလင်းဝင်ရောက်မှုကို ထိန်းညှိမှု၊ ရုပ်ပုံကိုတည်ငြိမ်အောင် ဖမ်းယူနိုင်မှု နှင့် ရွှေ့လျားနေသောရုပ်ပုံများကို ဖမ်းယူနိုင်မှုတို့မှာ အံ့သြဖွယ် ကောင်းလောက်အောင် မြင့်မားကောင်းမွန်ပါသည်။

ကင်မရာနှစ်လုံးပါဝင်သည့် နည်းပညာကို အသုံးပြုနိုင်ရန် ဖုန်းထုတ်လုပ်သူများက ဖုန်း၏ CPU အပြင် အခြားနေရာ သုံးခုတွင်လည်း ရင်းနှီးမြှုပ်နှံမှုပြုရပါသည်။ ပထမဦးဆုံးအနေဖြင့် ကင်မရာတည်ဆောက်ရာတွင် ကျွမ်းကျင်သူများ ပါဝင်သည့်အဖွဲ့ကို ၅ မီလီမီတာရှိသည့် မှန်ဘီလူးကိုတည်ဆောက်စေပြီး ထိုအစိတ်အပိုင်းက pixel ကောင်းမွန်မြင့်မားစွာဖြင့် သိမ်းဆည်းနိုင်ခြင်း၊ အလင်းရောင်ဖမ်းယူမှု ကောင်းမွန်ခြင်း၊ ရုပ်ပုံကိုလျှင်မြန်စွာနှင့် ကြည်လင်စွာဖမ်းယူနိုင်ခြင်း၊ အရိပ်မထင်စေခြင်း နှင့် ပုံရိပ်ဖမ်းယူမှုတွင် အမှားမရှိစေခြင်း စသည့် လိုအပ်ချက်များ ပြည့်မီစေရန် ဆောင်ရွက်စေပါသည်။ ဒုတိယအဖွဲ့မှ ကင်မရာနှစ်လုံးကို ဟန်ချက်ညီစွာ ထိန်းညှိနိုင်သည့် နည်းပညာကို ကျွမ်းကျင်သော ဓာတ်ပုံဆရာတို့၏ လမ်းညွှန်မှုဖြင့် တည်ဆောက်ရပါသည်။ ထိုနည်းပညာက ကင်မရာနှစ်လုံးမှ တပြိုင်တည်း ရိုက်ယူလိုက်သော ပုံရိပ်တို့၏ အကွားအဝေးနှင့် အနေအထား၊ ကြည်လင်ပြတ်သားမှုနှင့် အရောင်ခွဲခြားမှုတို့ကို အကောင်းဆုံးဖြစ်အောင် ပေါင်းစပ်ပေးပါသည်။ ထို့နောက် တတိယအချက်နေဖြင့် ISP ဟုခေါ်သော image signal processor အဖွဲ့မှ ဓာတ်ပုံရိုက်ရန် ခလုတ်နှိပ်လိုက်သည့်အချိန်တွင် ကင်မရာနှစ်လုံးစလုံးမှ ရိုက်ယူလိုက်သည့် ရုပ်ပုံကို ဖမ်းယူခြင်း၊ တိုင်းတာခြင်း၊ ပေါင်းစပ်ခြင်းနှင့် သိမ်းဆည်းခြင်းတို့ကို တပြိုင်တည်း ဖြစ်ပေါ်နိုင်စေရန် လုပ်ဆောင်ရပါသည်။

လက်ရှိအခြေအနေတွင် Apple၊ Samsung နှင့် Huawei ကုမ္ပဏီသုံးခုသာ ဤကဲ့သို့ ရင်းနှီးမြှုပ်နှံမှုမျိုးကို တည်ဆောက်ထားပါသည်။ ဤကုမ္ပဏီသုံးခုသာ ၎င်းတို့ကိုယ်ပိုင် image signal processor (ISP) ရှိပါသည်။ Huawei ကုမ္ပဏီတွင် ကင်မရာနှစ်လုံးကို ဟန်ချက်ညီစွာ ထိန်းညှိနိုင်သည့် နည်းပညာကို ဖန်တီးတည်ဆောက်ရန် ကျွမ်းကျင်သူ ၁၀၀ ကျော်ရှိပါသည်။ ထို့ပြင် Huawei ကုမ္ပဏီ၏ ကုန်ပစ္စည်း လိုအပ်ချက်အတိုင်း အသေးစိတ် တည်ဆောက်သည့်အဖွဲ့ နှင့် ISP ဒီဇိုင်းအဖွဲ့တို့၏ လူ့အရင်းအမြစ် စွမ်းအားအပေါ်တွင် ရင်းနှီးမြုပ်နှံမှုသည် ဖုန်းထုတ်လုပ်သည့် ကုမ္ပဏီအများစု၏ သုတေသန နှင့် တည်ဆောက်ရေးအဖွဲ့ (R&D team) ထက် သာလွန်ကောင်းမွန်ပါသည်။ ဥပမာအားဖြင့် ပြင်သစ်နိုင်ငံရှိ Huawei သုတေသနစင်တာက ISP တည်ဆောက်မှုအတွက်သာ တာဝန်ယူရသည်။ ၎င်းတို့ထံမှ ရရှိလာသော ISP ဒီဇိုင်းကို HiSilicon ကုမ္ပဏီမှ ထုတ်လုပ်သော Kirin SoC တွင် ပေါင်းစပ်တည်ဆောက်စေသည်။ Leica ကင်မရာနှစ်လုံးအတွက် ဟန်ချက်ညီစွာ ထိန်းညှိနိုင်သည့် နည်းပညာ၏ နောက်ဆုံးပေါ်တွေ့ရှိချက်များကို ပြင်သစ်နိုင်ငံရှိ Huawei Mathematics သုတေသနစင်တာ နှင့် Max Berek ဖန်တီးမှုဆိုင်ရာ ဓါတ်ခွဲခန်း တို့၏ ပူးပေါင်း ဆောင်ရွက်မှုကြောင့် ရရှိလာခဲ့ခြင်း ဖြစ်သည်။ Huawei ကုမ္ပဏီသည် ဂျပန်နိုင်ငံတွင်လည်း ကင်မရာကို လိုအပ်ချက်ပေါ် မူတည်ပြီး စံချိန်မှီအောင် တည်ဆောက်ဖန်တီးသည့် တီထွင်သူများ အဖွဲ့ရှိပါသည်။

HUAWEI P9 က စမတ်ဖုန်း ဓာတ်ပုံပညာကို တခေတ်ဆန်းစေခြင်း
၂၀၁၆ ခုနစ်တွင် ထုတ်ဝေခဲ့သည့် HUAWEI P9 ဖုန်းသည် စမတ်ဖုန်းသမိုင်းတွင် မှတ်ကျောက်တင်နိုင်ခဲ့ပါသည်။ HUAWEI P9 မတိုင်မီအချိန်က စမတ်ဖုန်းဓာတ်ပုံဆိုင်ရာ တီထွင်မှုဆန်းသစ်မှုများသည် ဓာတ်ပုံ၏ ကြည်လင်ပြတ်သားမှုနှင့် ပုံရိပ်ဖမ်းယူနိုင်သည့် အမြန်နှုန်းအပေါ်တွင်သာ အဓိကထားသည်။ ယခုအခါ Leica မှန်ဘီလူးနှစ်ခုကြောင့် HUAWEI P9 က စမတ်ဖုန်းဓာတ်ပုံပညာကို တခေတ်ဆန်းစေခဲ့ပါသည်။ ဓာတ်ပုံ၏ ကြည်လင်ပြတ်သားမှုနှင့် အမြန်နှုန်းတို့အပြင် HUAWEI P9 ကင်မရာက SLR ကင်မရာနှင့် ရိုက်ယူမှသာ ရနိုင်သည့် ဘိုခေးလုပ်ဆောင်ချက် (bokeh effect -ဓာတ်ပုံ၏ ဗဟိုချက်မဟုတ်သည့် နေရာများကို ဝေဝါးနိုင်ခြင်း) နှင့် အရောင်ပါဝင်ပေါင်းစပ်မှုတို့ကို ဖန်တီးနိုင်ခဲ့ပါသည်။ HUAWEI P9 နှင့် ရိုက်ယူထားသော ဓာတ်ပုံများကို ဓာတ်ပုံပညာအရ ကွာခြားမှုကို မပြောနိုင်သည့်တိုင် ဓါတ်ပုံအရည်အသွေးကို သင်မလွှဲမသွေ ကြိုက်နှစ်သက်လိမ့်မည် ဖြစ်ပါသည်။

HUAWEI P9 တွင် ပါဝင်သည့် Leica ကင်မရာနှစ်လုံးနှင့် ရိုက်ယူသည့် ဘိုခေးလုပ်ဆောင်ချက် (bokeh effect) သည် ဓာတ်ပုံကို ပို၍ အသက်ဝင်စေပါသည်။ အခြားမည်သည့် ကုန်ပစ္စည်းများနှင့်မျှ မတူညီသည့် ဂျာမန် Leica ၏ အရောင်အသွေးက ဓာတ်ပုံတိုင်းတွင်ပါဝင်သော ရသနှင့်ခံစားချက်တို့ကိုပါ ဖမ်းယူနိုင်ပါသည်။

HUAWEI P9 ၏ ဤအားသာချက်ကြောင့် စတင်ရောင်းချသည့်အချိန်မှ ၁၀ လ အတွင်း ဖုန်းအရေအတွက် ၁၀ သန်းကျော်ကို တင်ပို့ရောင်းချနိုင်ခဲ့သည်။

အဆင့်မြှင့်တင်ထားသည့် Leica ကင်မရာနှစ်လုံးပါဝင်သော HUAWEI P10
(ကာလာနှင့် အဖြူအမည်းတို့ကို ပေါင်းစပ်ထားသည့် ကင်မရာနှစ်လုံး)

အရည်အသွေး ပိုမိုကောင်းမွန်သော ဓါတ်ပုံများ ရိုက်ကူးနိုင်ရန်အတွက် HUAWEI P9 တွင် ပါဝင်သော ကင်မရာကို အဆင့်မြှင့်တင်ထားပြီး HUAWEI P10 တွင် တပ်ဆင်ထားပါသည်။
HUAWEI P10၊ P10 Plus စမတ်ဖုန်းတို့၏ နောက်ကျောဘက်တွင် 12 MP RBG (ကာလာ) ကင်မရာနှင့် 20 MP monochrome (အဖြူအမည်း) ကင်မရာတို့ ပါဝင်ပါသည်။ လူ၏မျက်လုံးတွင် အရောင်ကို ခွဲခြားသည့် အစိတ်အပိုင်းနှင့် အလင်းရောင်ကို ဖမ်းယူသည့် အစိတ်အပိုင်းနှစ်ခုရှိပြီး ထိုလူ့မျက်လုံးတည်ဆောက်ပုံကို အတုယူပြီး တည်ဆောက်ထားသည့် ကင်မရာနှစ်လုံးနည်းပညာတွင်လည်း ကင်မရာတစ်လုံးက ပုံရိပ်၏အရောင်ကို ဖမ်းယူမည်ဖြစ်ပြီး အခြားတစ်လုံးက အလင်းရောင် နည်းပါးသည့် အချိန်တွင် အလင်းရောင်ကို ဖမ်းယူရန်ဖြစ်ပါသည်။

ကင်မရာတွင်ပါဝင်သော အလင်းရောင်ကိုဖမ်းယူသည့် အစိတ်အပိုင်းသည် အလင်းရောင်၏ သိပ်သည်းမှုကိုသာ ဖမ်းယူနိုင်ပြီး အရောင်ကွဲပြားမှုကို ခွဲခြားနိုင်စွမ်းမရှိပါ။ ကင်မရာ၏ အလင်းရောင်ဖမ်းယူသည့် ပစ္စည်းအပေါ်တွင်ပါရှိသော အစိတ်အပိုင်းက အနီ၊ အစိမ်း၊ အပြာစသည့် အရောင်များကို ဖမ်းယူသည်။ တနည်းအားဖြင့်ဆိုရသော် ရောင်စုံကင်မရာတို့က ရုပ်ပုံတွင်ပါရှိသော အလင်းရောင်ပမာဏ၏ သုံးပုံနှစ်ပုံကိုသာ ဖမ်းယူနိုင်သည့်အတွက် ရုပ်ပုံတွင် ပါဝင်သော အလင်းရောင်သိပ်သည်းမှုသည် အရောင်တမျိုးတည်းကိုသာ ဖမ်းယူသည့် အဖြူအမည်း (monochrome) ကင်မရာများ အလင်းရောင်ပါဝင်တိကျမှုကို မမီပါ။

P10 နှင့် P10 Plus တို့တွင်ပါဝင်သော ကင်မရာနှစ်လုံးတွင် ရောင်စုံကင်မရာက အရောင်များကို ဖမ်းယူပြီး ကျန်ရှိသော အဖြူအမည်း (monochrome) ကင်မရာက အလင်းရောင်သိပ်သည်းမှုကို ဖမ်းယူသည်။ ထိုကင်မရာနှစ်လုံးမှ ရရှိလာသော ပုံရိပ်နှစ်ခုကို ပေါင်းစပ်လိုက်သောအခါ ရောင်စုံကင်မရာတစ်လုံးတည်းဖြင့် ရိုက်ကူးသော ဓာတ်ပုံများထက် ပိုမို၍မှန်ကန်သည့် အရောင်ရောစပ်မှုနှင့် တိကျကောင်းမွန်သော အလင်းရောင်ပါဝင်မှုတို့ကို ရရှိပါသည်။ အလင်းရောင် နည်းပါးသည့်အချိန်တွင် ရိုက်ကူးသောဓာတ်ပုံများကိုလည်း ပိုမိုတိကျကြည်လင်စေပါသည်။ ကင်မရာနှစ်လုံးတွင် ပါဝင်သော အကွာအဝေးထိန်းညှိသည့် နည်းပညာက ဓာတ်ပုံထဲတွင်ပါဝင်သည့် အရာတိုင်း၏ အကွာအဝေးကို တိုင်းတာမှတ်ယူထားသဖြင့် ဓာတ်ပုံရိုက်ပြီးသည့်အခါမှ ဓာတ်ပုံ၏ focus ကို ပြန်လည်ပြောင်းလဲနိုင်ပါသည်။

အောက်ဖော်ပြပါ ဓာတ်ပုံများကို P10 စီးရီးဖုန်းများဖြင့် ရိုက်ယူထားခြင်းဖြစ်ပြီး ဓာတ်ပုံတိုင်းက ကာဗာပုံများအတိုင်း ရရှိနိုင်မည် ဖြစ်ပါသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly

Tags