ဇွန် ၂၃ ။                 ။ အစားအစာမုန့်ပဲသရေစာတွေကို မစင်တုံးပုံစံနဲ့ တွေ့ရမယ်ဆိုရင် ချက်ချင်းအော့အန်ချင်လောက်အောင် ရွံရှာမိမှာအမှန်ဖြစ်ပေမယ့် ထိုင်းနိုင်ငံက မုန့်လုပ်ရောင်းသူတစ်ဦး ဖန်တီးလိုက်တဲ့ ခွေးချေးတုံး ပုံစံ ကိတ်မုန့်တွေကိုတော့ မှာယူသူ များပြားပြီး လူကြိုက်များနေတယ်လို့ သိရပါတယ်။

" ဒါက ထူးတော့ ထူးဆန်းပါတယ်၊ ဘယ်သူကမှ ဒီလိုမျိုး ခွေးချေးပုံစံ မုန့်မျိုး လုပ်ရောင်းမှာမဟုတ်ဘူးလေ၊ ခု ဒီလိုလုပ်ရောင်းတော့လည်း လူတွေကြိုက်ကြတာပဲ" လို့ ဘန်ကောက်မြို့က ယင်းကိတ်မုန့်မုန့်လုပ်ရောင်းသူ အမျိုးသမီး Wilaiwan Mee-Nguen က ပြောပါတယ်။

သူမဟာ ယခုဆိုရင် အုန်းနို့နဲ့ အခြားပါဝင်ပစ္စည်းတွေသုံးပြီး တမူထူးခြားတဲ့ မုန့်တွေကို ဖန်တီးရောင်းချပေးနေသူလည်း ဖြစ်ပါတယ်။

အသက် ၃၀ အရွယ် Wilaiwan ဟာ ခုလိုမျိုး သကြားပါ အချို့မုန့် တွေကို ရောင်းကောင်းအောင်လို့ဆိုပြီး ယခင်ကလည်း ပုံစံအမျိုးမျိုး စမ်းကြည့်ခဲ့ပါသေးတယ်လို့ ဆိုပါတယ်။

ဖောက်သည်တစ်ဦးက သူများနဲ့မတူတဲ့ ပုံစံလုပ်ကြည့်ပါလားလို့ တောင်းဆိုခဲ့လို့ ခုလို ပုံစံ လုပ်ရောင်းခဲ့တာဖြစ်တယ်လို့လည်း Wilaiwan က ပြောပါတယ်။

" စားသုံးသူတွေက ထူးထူးဆန်းဆန်းဆိုလို့ အများဆုံး ပန်းပွင့်ပုံ မုန့်တွေကိုပဲ မြင်ဖူးထားကြတာလေ၊ ခုဟာက ရယ်စရာတော့ဖြစ်နေတာပေါ့" လို့လည်း ၎င်းက ပြောပါတယ်။

ယခုလက်ရှိအချိန်မှာတော့ ယင်း ခွေးချေးတုံးပုံ ကိတ်မုန့် ဟာ သူမဆိုင်အတွက်တော့ နာမည်ကျော် မုန့်တစ်မျိုး ဖြစ်လာနေပြီး တစ်လကို ယင်းချေးတုံးပုံ ကိတ်မုန့်အခုပေါင်း  ၁၀၀၀ လောက် ရောင်းနေရပြီ ဖြစ်တယ်လို့လည်း သိရပါတယ်။