ဇွန် ၁၆ ။ ။ လုပ်ငန်းစတင်တည်ထောင်သူများ (Start Up)လုပ်ငန်းများအားဈေးကွက်၊ အရင်းအနှီးနှင့် နည်းပညာ ချိတ်ဆက်ပံ့ပိုးပေးရန် ရည်ရွယ်သည့် ပထမအကြိမ် မြန်မာ့စွန့်ဦးတီထွင် ပွဲတော်ကို တပ်မတော်ခန်းမတွင် ဇွန်လ ၁၆ ရက်မှ ၁၈ ရက်အထိ ၃ ရက်ကြာကျင်းပသွားမည်ဖြစ်ကြောင်း သိရသည်။
မြန်မာနိုင်ငံ လူငယ်စွန့်ဦးတီထွင်လုပ်ငန်းရှင်များအသင်းမှ ဦးစီးကျင်းပသည့် ယင်းမြန်မာ့စွန့်ဦးတီထွင်ပွဲတွင် ကနဦးစတင် လုပ်ကိုင်သည့် လုပ်ငန်းများ၊ စွန့်ဦးလုပ်ငန်းများအား အပါအဝင် ပြခန်းပေါင်း၁၂၀ နီးပါး ပါဝင်ပြသလျက်ရှိကြောင်း သိရသည်။
" အခုမှစတဲ့ လူငယ်လုပ်ငန်းရှင်တွေအတွက်ကို အကျိုးကျေးဇူး အများကြီးရစေမှာဖြစ်ပါတယ်။ သူတို့အနေနဲ့ အစမှ စလုပ်ခဲ့တဲ့အတွက်ကြောင့် ဈေးကွက်ထဲကို မဝင်ရသေးဘူး။ ဈေးကွက်ဝင်မယ့် အကျိုးကျေးဇူးကို ရရှိတယ်။ ဒီမှာပါတဲ့ဘဏ်တွေနဲ့ တခြားငွေရေးကြေးရေဆိုင်ရာအဖွဲ့အစည်းတွေဆီကရင်းနှီးမြျှပ်နှံမှု အခွင့်အလမ်းတွေလည်း ရရှိနိုင်ပါတယ်"ဟု မြန်မာနိုင်ငံ လူငယ်စွန့်ဦးတီထွင် လုပ်ငန်းရှင်များအသင်း ဥက္ကဋ္ဌ ဦးထွန်းထွန်းနိုင်က ဆိုသည်။
မြန်မာနိုင်ငံ လူငယ်စွန့်ဦးတီထွင်လုပ်ငန်းရှင်များအသင်းအနေဖြင့် ယခင်က ပြုလုပ်ခဲ့သည့် အလုပ်အကိုင်အခွင့်အလမ်း ပြပွဲနေရာတွင် ပထမဆုံးအနေဖြင့် ပြောင်းလဲကာစွန့်ဦးတီထွင်ပွဲတော်အနေဖြင့် အနေဖြင့် ပြောင်းလဲပြုလုပ်ခြင်း ဖြစ်ကြောင်း သိရသည်။
ယင်းပြပွဲတွင် ပါဝင်ပြသနေသည့် YK Collections Myanmar မှ Founder ဒေါ်မင်းမင်းမြတ်က" ဒီပွဲကိုဘာဖြစ်လို့ လာပြရသလဲဆိုရင် ကျွန်မရဲ့ ထုတ်ကုန်တွေကို အင်နိုဘေးတစ် လုပ်တယ်။ Recycle နဲ့ ပတ်သက်ရင်လည်း ဆုရထားတယ်။ အဲဒါအပြင် ဒါကိုဆက်လုပ်ပြီးရောင်းနေတယ်။ ဒါပေမယ့် တစ်ချို့ဆိုလည်း သိပ်မသိဘူး။ မိတ်ဆွေတွေက ဝင်ပြသင့်တယ်ဆိုလို့ လာပြတာပါ "ဟုဆိုသည်။
အဆိုပါပြပွဲအတွင်း လုပ်ငန်းရှင်များအတွက် ဆွေးနွေးပွဲများ၊ ဟောပြောပို့ချမှုများ၊ အခမဲ့သင်တန်းများ၊ ကနဦးလုပ်ငန်းရှင်များအတွက် ပြခန်းများ၊ ရင်းနှီးမြှုပ်နှံသူများနှင့် ကနဦးလုပ်ငန်းသစ်များအား မိတ်ဆက်ပွဲများလည်း ပါဝင်ကြောင်း သိရသည်။
" ဒီစွန့်ဦးတီထွင်လုပ်ငန်းရှင်တွေက မညံကြပါဘူး။ တီထွင်လိုစိတ်တွေ ရှိပါတယ်။ တကယ် ဖန်တီးနိုင်စွမ်းတွေ ရှိပါတယ်။ အဓိကတော့ အခြေအနေကောင်းတစ်ခုကိုဖန်တီးပေးဖို့လိုပါတယ်။ အခြေအနေကောင်းဆိုတာက အစိုးရရော လူမှုပတ်ဝန်းကျင်အသိုက်အဝန်းရော စီးပွားရေး အသိုက်အဝန်းတခုကနေ လူငယ်တွေကိုဆွဲခေါ်မှ ရပါမယ်" ဟုဦးထွန်းထွန်းနိုင်က ဆက်လက်ပြောသည်။
ယခုနှစ်အတွင်း မြန်မာနိုင်ငံ လူငယ်စွန့်ဦးတီထွင်လုပ်ငန်းရှင်များအသင်း အနေဖြင့် ယခုနှစ်အတွင်း အလားတူပြပွဲတစ်ခုအား ထပ်မံကျင်းပသွားမည့်အပြင် နိုင်ငံတကာလုပ်ငန်းရှင်များအား ဖိတ်ခေါ်ကာစွန့် ဦးတီထွင်ဖိုရပ်တစ်ရပ်အားလည်းကျင်းပသွားရန် စီစဉ်ထားကြောင်းသိရသည်။
Myanmar Hand in Hand Marketing Service ကုမ္ပဏီမှ Managing Director ဒေါ်အေးမြတ်မြတ်သူက" ကနဦးလုပ်ငန်းရှင်အသစ်တွေ ပေါ်ထွက်လာမှပဲ တိုင်းပြည်ရဲ့ အသေးစားနဲ့ အလတ်စားစီးပွားရေးလုပ်ငန်းတွေ ဖွံ့ဖြိုးမယ်။ လက်ရှိနိုင်ငံရဲ့စီးပွားရေးမှာ ၉၀ ရာခိုင်နှုန်းလောက်ကအသေးစားနဲ့ အလတ်စားလုပ်ငန်းတွေ ဖြစ်တယ်။ ဒီလိုပွဲတွေရှိမှလည်း ရွက်ပုန်းသီး စီးပွားရေးလုပ်ငန်းရှင်လေးတွေက သူတို့မှာရှိတဲ့ အိုင်ဒီယာတွေ၊ စိတ်ကူးစိတ်သန်းတွေ အိမ်မက်တွေကို တင်ပြနိုင်မယ်။ အောင်မြင်ပြီးသားလုပ်ငန်းရှင်တွေကလည်း သူတို့မှာရှိတဲ့ငွေကိုင်ပြီး သူတို့လုပ်ချင်တဲ့ လုပ်ငန်းတွေမှာ ငွေကြေးရင်းနှီးမြှုပ်နှံနိုင်မှာပါမယ်။ သူတို့ရဲ့ အတွေ့အကြုံတွေကိုလုပ်ငန်းရှင်အသစ်တွေကို မျှဝေနိုင်မှာပါ " ဟုဆိုသည်။
