ဗြိတိန်အဆိုတော်အဒဲလ်သည် လန်ဒန်အနောက်ပိုင်းရှိ ဂရင်းဖဲလ်တာဝါ မီးလောင်ကျွမ်းမှုအတွင်း ထိခိုက်ဆုံးရှုံး ခဲ့ရသူများနှင့် သွားရောက်တွေ့ဆုံခဲ့သည်။

အဆိုပါမီးလောင်ကျွမ်းမှုအတွင်း သေဆုံးခဲ့သူ ၁၇ဦးအတွက် ဆုတောင်းမေတ္တာ ပို့သသည့်နေရာသို့ အဒဲလ်က သွားရောက်ခဲ့ခြင်းဖြစ်သည်။ ထိုမီးသည် ၂၄နာရီနီးပါးခန့် လောင်ကျွမ်းခဲ့ပြီး တာဝါအနီးသို့ အဒဲလ်ရောက်ရှိ သည့်အချိန်ထိ မီးလောင်ကျွမ်းနေဆဲဖြစ်ကြောင်း မျက်မြင်များက ပြောခဲ့သည်။

အဒဲလ်သည် ထိုမီးလောင်ရာနေရာသို့ သိုသိုသိပ်သိပ် သွားရောက်ခဲ့ကာ ထိခိုက်ဆုံးရှုံးခဲ့ရသူများကို အားပေးခဲ့ ခြင်းဖြစ်သောကြောင့် သူမ၏ ပရိသတ်အနည်းအကျဉ်းကသာ သူမကိုမြင်တွေ့ခဲ့ကြသည်။

ကမ္ဘာပေါ်တွင် တေးစီးရီး ရောင်းအားအကောင်းဆုံး အဆိုတော်တစ်ဦးဖြစ်သည့် အဒဲလ်သည် ထိုကဲ့သို့ သွားရောက်ခဲ့ခြင်းကို လူသိရှင်ကြား ကြေညာခဲ့ခြင်းမရှိဘဲ သူမကိုမြင်တွေ့သော ပရိသတ်များကသာ လျှက်တပြတ် ဓာတ်ပုံရိုက်ခဲ့ကြခြင်းဖြစ်သည်။

အဒဲလ်၏ ပရိသတ်များက သူမ၏ စာနာရိုင်းပင်းမှုနှင့် လိမ္မာသိုသိပ်မှုတို့အတွက် လူမှုမီဒီယာများပေါ်တွင် သူမအား ရေးသားချီးကျူးခဲ့ကြသည်။

ဂျရမီကလာ့ခ်ဆန်၊ လစ်လီအလန်၊ ဂျေမီအိုလီဗာ၊ ဖာနီကော်တွန်နှင့် အခြားသောအနုပညာရှင်များကလည်း မီးလောင်ကျွမ်းမှုကြောင့် ထိခိုက်ဆုံးရှုံးခဲ့ရသူများအတွက် အကူအညီများ ပေးခဲ့ကြသည်။

Ref: BBC