ထိုင်း-မြန်မာကုန်သွယ်ရေးတွင် ဘတ်ငွေဖြင့် တိုက်ရိုက်ပေးချေနိုင်ရန် ထိုင်း ပို့ကုန်-သွင်းကုန်ဘဏ် လုပ်ကိုင်လို

ထိုင်း-မြန်မာကုန်သွယ်ရေးတွင် ဘတ်ငွေဖြင့် တိုက်ရိုက်ပေးချေနိုင်ရန် ထိုင်း ပို့ကုန်-သွင်းကုန်ဘဏ် လုပ်ကိုင်လို

ရန်ကုန်၊ ဇွန် ၁၀ ။            ။ မြန်မာနိုင်ငံတွင် ပထမဆုံးအနေဖြင့် နိုင်ငံခြားကိုယ်စားလှယ်ရုံးခွဲဖွင့်လှစ်ထားသော ထိုင်းဘဏ္ဍာရေးဝန်ကြီး ဌာနပိုင် ပို့ကုန်-သွင်းကုန်ဘဏ် (EXIM Bank) သည် ထိုင်း-မြန်မာနှစ်နိုင်ငံကြားကုန်သွယ်ရေးတွင် အမေရိကန်ဒေါ်လာကို အသုံးမပြုဘဲ ထိုင်းဘတ်ငွေနှင့် တိုက်ရိုက်ကုန်သွယ်လိုသည်ဟု ဘဏ်ဥက္ကဋ္ဌဖြစ်သူ ပီစစ်စရီဝတ္တန္နာက မဇ္ဈိမကို ပြောသည်။

“အမေရိကန်ဒေါ်လာကနေ ကျွန်တော်တို့ ငွေကြေးတွေကို ဘာကြောင့်လဲလှယ်နေရမှာလဲဗျ၊ ဘာဖြစ်လို့ နှစ်နိုင်ငံကြား တိုက်ရိုက်ငွေကြေးလဲလှယ်မှု မရှိတာလဲ၊ ဒီလိုသာ လုပ်နိုင်ရင် နှစ်နိုင်ငံစလုံးက လုပ်ငန်းရှင်တွေ ပိုပြီးကောင်းသွားလိမ့်မယ်” ဟု ဥက္ကဋ္ဌ ပီစစ်စရီဝတ္တန္နာက ဆိုသည်။

နှစ်နိုင်ငံကြား ငွေကြေးလဲလှယ်မှုပိုမိုကောင်းမွန်ရန်နှင့် ငွေဖြစ်လွယ်မှုများ ပိုမိုဖြစ်ထွန်းရန် ထိုင်းနှင့် မြန်မာဗဟိုဘဏ်တို့က ဆွေးနွေးနေကြသည်ကို သိရှိရသည်ဟု EXIM Bank ဥက္ကဋ္ဌက ပြောဆိုထားပြီး လာမည့် အချိန် ၂ နှစ်- ၃ နှစ်အတွင်း နှစ်နိုင်ငံကြားငွေကြေးလဲလှယ်မှုကွာဟချက်များ ပိုမိုနည်းပါးသွားဖို့ လုပ်ဆောင်နိုင်လိမ့်မည်ဟု ၎င်းက ဖြည့်စွက်ပြောဆိုထားသည်။

ထိုသို့ ထိုင်း EXIM Bank ၏ ဆန္ဒနှင့် ပတ်သတ်ပြီး မြန်မာ့နိုင်ငံခြားကုန်သွယ်မှုဘဏ်၏ ဦးဆောင်ညွှန်ကြားရေးမှူးဖြစ်သူ ဦးညီဖြူလှ “လောလောဆယ်ပြောဖို့ စောသေးတယ်၊ နှစ်နိုင်ငံက ကုန်သွယ်မှုအပေါ်မူတည်တာပေါ့၊ ဘယ်ဟာက ပိုများသလဲပေါ့နော်။ ဒါပေမယ့် အဲဒီလို လုပ်ဖို့ကြတော့လည်း မြန်မာနိုင်ငံတော်ဗဟိုဘဏ်ကပဲ စဉ်းစားသုံးသပ်ပြီး ညွှန်ကြားချက်ပေးမှာပေါ့နော်”ဟု ဆိုသည်။

ဆက်လက်ပြီး ဦးညီဖြူလှက သက်ဆိုင်ရာ ပို့ကုန်-သွင်းကုန်လုပ်ငန်းရှင်များ၏ ဆန္ဒလည်း အရေးကြီးသည်ဟု ဖြည့်စွက်ပြောဆိုထားသည်။

ထိုင်းက မြန်မာသို့ အဓိကတင်ပို့သော ကုန်ပစ္စည်းများအနေနှင့် အဖျော်ယမကာများ၊ သကြား၊ သန့်စင်မွမ်းမံပြီး လောင်စာဆီများ၊ စက်ပစ္စည်းများနှင့် ဆက်စပ်အသုံးအဆောင်များ၊ ဓာတုဗေဒပစ္စည်းများစသည့်တို့ ဖြစ်ပြီး မြန်မာက ထိုင်းဘက်သို့ သဘာဝဓာတ်ငွေ့၊ အသားများ၊ ကြက်၊ဝက်၊နွားစသည့် ခြံမွေးတိရစ္ဆာန်များ၊ ဓာတ်သတ္တုရိုင်းများ၊ ဟင်းသီးဟင်းရွက်နှင့် သစ်သီးဝလံစသည်တို့ကို တင်ပို့သည်။

ပြီးခဲ့သည့်ဘဏ္ဍာနှစ်ဖြစ်သည့် ၂၀၁၆-၁၇ ဘဏ္ဍာနှစ်တွင် ထိုင်း-မြန်မာကုန်သွယ်ရေးမှ အမေရိကန်ဒေါ်လာ ၄.၂ ဘီလီယံကျော်ရရှိထားသည်။ ယင်းဘဏ္ဍာနှစ်အတွက် ထိုင်းမှ မြန်မာကို အမေရိကန်ဒေါ်လာ ၂.၀၇ ဘီလီယံကျော် တင်ပို့ထားပြီး မြန်မာက ထိုင်းကို ၂.၂ ဘီလီယံကျော်တန်ဘိုးရှိသည့် ကုန်ပစ္စည်းများ တင်ပို့ထားသည်။

ထိုင်း-မြန်မာကုန်သွယ်ရေးတွင် ဘတ်ငွေဖြင့် တိုက်ရိုက်ငွေပေးချေမှုနှင့်ပတ်သက်၍ ပြည်တွင်းပုဂ္ဂလိကဘဏ်ဖြစ်သည့် ကမ္ဘာ့ရတနာဘဏ်၏ ဒုတိယဦးဆောင်ညွှန်ကြားရေးမှူးဖြစ်သူ ဒေါက်တာလှညွှန့်က “ကျွန်တော်တော့ သဘောမကျဘူး၊ ဘာဖြစ်လို့လဲဆိုတော့ ဘတ်ငွေက သိပ်ပြီးမခိုင်မာဘူး၊ ဒေါ်လာက ခိုင်မာတယ်လေ။ အခုသူတို့ နိုင်ငံရေးကလည်း သိပ်ပြီးမငြိမ်ဘူး၊ ရုတ်တရက် သူတို့ ငွေကြေး ပြုတ်ကျသွားရင် ရှုံးပြီ။ နိုင်ငံတော်က ရရှိမယ့် အရန်ငွေဆိုရင်လည်း ဒေါ်လာကိုပဲ ယူချင်မှာပဲ။ ဒီကိစ္စက သူတို့ အသာစီးယူချင်တာ”ဟု ပြောသည်။

မြန်မာပြည်တွင်းရင်းနှီးမြှုပ်နှံမှုများတွင် ထိုင်းနိုင်ငံသည် ကန်ဒေါ်လာ ၁၁ ဘီလီယံခန့် ရင်းနှီးမြှုပ်နှံထားပြီး တရုတ်နှင့် စင်ကာပူပြီးလျှင် တတိယမြောက် ရင်းနှီးမြှုပ်နှံမှုအများဆုံးနိုင်ငံအနေနှင့် ရပ်တည်နေသည်။

ထိုင်း EXIM Bank အနေနှင့် ဘဏ်စတင်တည်ထောင်ခဲ့သည့် နှစ်ပေါင်း ၂၃ နှစ်အတွင်း မြန်မာနိုင်ငံတွင်း ရင်းနှီးမြှုပ်နှံမှုပြုမည့်စီမံကိန်းများအတွက် ချေးငွေထုတ်ချေးနိုင်ရန် ခွင့်ပြုထားပြီးသော ပမာဏမှာ ထိုင်းဘတ်ငွေ သန်းပေါင်း ၂၆၀၀၀ ကျော်ရှိသည်ဟု ဘဏ်က အတည်ပြုထားသည်။

ထို့အပြင် လက်ရှိတွင် ထိုင်းက မြန်မာနိုင်ငံတွင်း ရင်းနှီးမြှုပ်နှံထားသည့် ပိုက်လိုင်းတည်ဆောက်မှုဆိုင်ရာ စီမံကိန်း ၁၈ ခုကျော်အတွက် ထိုင်း EXIM Bank က ဘတ်ငွေ ၇၀၀ ဘီလီယံနီးပါး မတည်ပေးနိုင်ခဲ့သည်ဟု ဆိုသည်။

ထိုင်းဘဏ္ဍာရေးဝန်ကြီးဌာနအနေနှင့် မြန်မာအပါအဝင် ဒေသတွင်း ဖွံ့ဖြိုးတိုးတက်မှုအနည်းဆုံးနိုင်ငံ များ(CLMV) ဖြစ်သည့် ကမ္ဘောဒီးယား၊ လာအိုနှင့် ဗီယက်နမ်နိုင်ငံတို့တွင် ၎င်းတို့၏ ကုန်သွယ်ရေးနှင့် ရင်းနှီးမြှုပ်နှံမှုများဆိုင်ရာ အခန်းကဏ္ဍကို ဆက်လက်ချဲ့ထွင်လိုသည်။

ထို့ကြောင့် ဝန်ကြီးဌာနပိုင်ဘဏ်ဖြစ်သည့် ပို့ကုန်-သွင်းကုန်ဘဏ်ကို တည်ထောင်ပြီးသည့် နှစ်ပေါင်း ၂၀ ကျော်အတွင်း CLMV နိုင်ငံဖြစ်သည့် မြန်မာပြည်တွင် ပထမဆုံးကိုယ်စားလှယ်ရုံးခွဲကို ဖွင့်လှစ်ပြီး နိုင်ငံရပ်ခြား ဘဏ်ခွဲတစ်ခုကိုလည်း မကြာခင်တွင် ဖွင့်လှစ်ဖို့ မျှော်လင့်ထားသည်ဟု သိရသည်။

“ကျွန်တော်တို့ ဘဏ္ဍာရေးဝန်ကြီးဌာန ပြောခဲ့သလိုပေါ့။ မြန်မာမှာ ဖွံ့ဖြိုးတိုးတက်ဖို့အတွက် အခွင့်အလမ်း အများကြီး တွေ့ရတယ်၊ အရေးကြီးတာက ကျွန်တော်တို့ရဲ့ ငွေကြေးအင်အား (Funds) ပိုပိုပြီး တိုးတက်သွားဖို့ လိုတယ်၊ တစ်ချို့ စည်းမျဉ်းပိုင်းဆိုင်ရာ ဖြေလျှော့မှုတွေကိုလည်း တွေ့မြင်ရပါတယ်”ဟု ထိုင်း EXIM Bank ၏ ဥက္ကဋ္ဌဖြစ်သူ ပီစစ် စရီဝတ္တန္နာကပြောဆိုထားသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly

Tags