Sony World Photography Award (Myanmar National Award) ဆုရှင် ကိုကျော်ဝင်းလှိုင်နှင့်တွေ့ဆုံခြင်း အပိုင်း ၂

Sony World Photography Award (Myanmar National Award) ဆုရှင် ကိုကျော်ဝင်းလှိုင်နှင့်တွေ့ဆုံခြင်း အပိုင်း ၂

မဇ္ဈိမ TV ကိုကြည့်ရှုနေကြတဲ့ ပရိသတ်များအားလုံးအားလုံး မင်္ဂလာပါခင်ဗျာ။ အခုဆိုရင်တော့ Sony World Photography Winner ဆုရှင် ကိုကျော်ဝင်းလှိုင်နဲ့ တွေ့ဆုံခဲ့တာတွေကို ဒုတိယပိုင်းအနေနဲ့ တင်ဆက်ပေးတော့မှာဖြစ်ပါတယ်။

အစ်ကို့အနေနဲ့ ဒီဓာတ်ပုံပညာလောကထဲကို စတင်ဝင်ရောက်ဖြစ်ပုံလေးကိုသိချင်ပါတယ်။

ကျွန်တော်ဒီဓာတ်ပုံလောကကို စတင်ဝင်ရောက်တာတော့ ၁၉၉၆-၉၇ ပေါ့။ ကျွန်တော် ကိုးတန်းကျောင်းသားဘဝမှာ ကျွန်တော့်ရဲ့လက်ဦးဆရာဖြစ်တဲ့ ဆရာမန်းတက္ကသိုလ်နေမျိုးဝင်း ရှုတိုင်းယဉ် ပုံရိပ်ပန်းရှိပါတယ်။ ဆရာ့ရဲ့ သွန်သင်ဆုံးမမှုအောက်မှာ ကျွန်တော်အခြေခံ ဓာတ်ပုံံပညာတွေကို စပြီးလေ့လာခဲ့တယ်ပေါ့။ ဆရာရဲ့ အခြေခံနည်းတွေကို စနစ်တကျ သင်ကြားတတ်မြောက်ပြီးတဲ့နောက် ၂၀၀၀ပြည့်နှစ်မှာ မြန်မာနိုင်ငံဓာတ်ပုံအသင်းကနေ ကြီးမှူးဖွင့်လှစ်တဲ့ အခြေခံဓာတ်ပုံံသင်တန်း အမှတ်စဉ် ၂၉ မှာ ဓာတ်ပုံပညာတွေကို ဆက်လက်လေ့လာတယ်။ သင်တန်းတွေလည်းတက်ရောက်ခဲ့တယ်။ ဒီကြားထဲမှာလည်း ပြည်တွင်းပြည်ပက ဖွင့်လှစ်တဲ့ ဓါတ်ပုံနဲ့ပတ်သက်တဲ့ Workshop တွေကို တက်ရောက်ပြီးတော့ ပညာဆည်းပူးမှုတွေလည်း လုပ်ပါတယ်။

နောက်တစ်ခုကတော့ အကိုက ယဉ်ကျေးမှုတက္ကသိုလ်ကျောင်းဆင်းဆိုတော့ ယဉ်ကျေးမှုတက္ကသိုလ်မှာ ဘယ်ဘာသာရပ်ကို အဓိကထားပြီး လေ့လာခဲ့လဲ။

ဟုတ်ကဲ့။ ကျွန်တော် ယဉ်ကျေးမှုတက္ကသိုလ်မှာ ပန်းချီမေဂျာကိုပဲ အဓိကထား သင်ကြားခဲ့တာပါ။ ကျွန်တော် ဒီပန်းချီပညာကို သင်ကြားခဲ့တဲ့အတွက် ဒီဓာတ်ပုံပိုင်းမှာ များစွာအထောက်အကူ ဖြစ်စေပါတယ်။ အဲဒီလိုဖြစ်ဖို့အတွက်လည်း ကျွန်တော့်ဆရာကပဲ ဒီလမ်းကြောင်းတွေကို ဂိုက်လိုင်းချပေးခဲ့တဲ့အတွက် ကျွန်တော်ခုလိုမျိုး ပံ့ပိုးမှုတွေ အများကြီးရခဲ့တာပါဗျ။

ဟုတ်ကဲ့။ ဒါဆိုရင် ပန်းချီနဲ့ဓါတ်ပုံနဲ့ ဘယ်လိုမျိုးဆက်စပ်မှုရှိလဲဆိုတာလည်း ပြောပြပေးပါဦး။

ကျွန်တော့်ရဲ့အတွေ့အကြုံအရကတော့ ပန်းချီနယ်ပယ်မှာ လေ့လာခဲ့ရတဲ့ ပန်းချီပညာရပ်ဆိုင်ရာတွေကို ဓာတ်ပုံမှာ အများဆုံးသုံးဖြစ်တဲ့ အခန်းကဏ္ဍဖြစ်တဲ့ ဓာတ်ပုံရဲ့ဖွဲ့စည်းမှု အရောင်အယူအဆတွေ ဒါတွေကို ပန်းချီပညာရပ်ပိုင်းကနေ အများဆုံးပြန်ပြီးအသုံးချပါတယ်။

ဓာတ်ပုံံတစ်ပုံကိုဖန်တီးတဲ့နေရာမှာ ဘယ်အပိုင်းတွေကများ အဓိက အရေးကြီးဆုံးဖြစ်မလဲဗျ။

ဟုတ်ကဲ့ ကျွန်တော်တို့ဆရာတွေ သင်ကြားပေးခဲ့တဲ့ ပုံစံအရဆိုရင် ဒီ Photography ဆိုတာ ဓာတ်ပုံအနုပညာပေါ့။ အနုပညာဖြစ်တဲ့အတွက် Art & Science ပေါ့။ ကျွန်တော်တို့အသုံးပြုနေတဲ့ ကင်မရာတွေ Lens တွေ စသည်ဖြင့်ပေါ့။ ဒီအထောက်အကူပြုပစ္စည်းတွေက Science ပေါ့။ သိပ္ပံပညာသဘောတရားအရ Physics သဘောတရားတွေက ဖွဲ့စည်းတည်ဆောက်ထားတဲ့ နည်းစနစ်ပိုင်းတွေပေါ့။ Art ကကျတော့ ကျွန်တော်တို့ ဓာတ်ပုံံတစ်ပုံပေါ်မှာ စိတ်ခံစားမှု ဒီဟာတွေက အများကြီးအခြေခံကျတယ်။ ကိုယ်ဒီပေါ်မှာ ဘယ်လောက်ထိခံစားလဲ။ ဒီပေါ်မှာ ဖြစ်ပေါ်လာတဲ့ အခြေအနေတစ်ခုအပေါ်မှာ ကိုယ်ဘယ်လိုသုံးသပ်လဲ။ ဒါတွေကအတွေ့အကြုံတွေနဲ့ ပြန်ပြီးတော့ပေါင်းစပ်ရတယ်။ နည်းပညာနဲ့ အနုပညာ ငါးဆယ်ငါးဆယ်ပေါ့။ အဲဒီလိုပဲ ကျွန်တော်ဆိုချင်ပါတယ်။

နောက်တစ်ခုက ကျတော့ ဒီကင်မရာပိုင်းပေါ့။ အရင်ကဆိုရင် မြန်မာနိုင်ငံကို ကင်မရာတွေအရမ်းမဝင်သေးဘူး။ အခုဆိုရင် ဒီဒစ်ဂျစ်တယ်နည်းပညာပိုင်းဆိုင်ရာ ကင်မရာတွေကအများကြီးပဲ အဲဒီအတွက် ဓာတ်ပုံံပညာအပေါ်မှာ လွယ်သွားတဲ့အပိုင်းရှိလား။ ခက်သွားတဲ့ အပိုင်းရှိလား။ အဲဒါလေးလည်းသိချင်ပါတယ်။

ဒီဒစ်ဂျစ်တယ်နည်းပညာကြီးဖွံ့ဖြိုးလာတာ ကောင်းတဲ့အချက်တွေလည်း အများကြီးရှိပါတယ်။ အရင်တုန်းကတော့ဓာတ်ပုံပညာကို ဝါသနာပါတယ်ဆိုပေမယ့် ဒီလောကထဲကိုဝင်ရောက်ဖို့ဆိုတာ အခက်အခဲတွေအများကြီးရှိတယ်။ ပစ္စည်းဝယ်ယူမှုအပိုင်းကအစပေါ့။ ဈေးကွက်မှာ လွယ်လင့်တကူ ဝယ်လို့မရတဲ့ အနေအထားမျိုးတွေရှိခဲ့ပါတယ်။ ဒစ်ဂျစ်တယ်ခေတ်မှာဆိုရင် ကျွန်တော်တို့လက်ရှိ ကင်မရာတွေရဲ့ကောင်းလာတဲ့နည်းပညာတွေပါသလို လူတိုင်းရဲ့လက်ထဲမှာ မိုဘိုင်းဖုန်းတွေ ရှိလာတဲ့အခါ ဓာတ်ပုံံပညာကို လူတွေပိုပြီးစိတ်ဝင်စားလာတယ်။ ဒါဒစ်ဂျစ်တယ်ရဲ့ ပြောင်းလဲလာတဲ့ နောက်ဆက်တွဲ ကောင်းကျိုးတွေပဲ။ ဒီဓါတ်ပုံပညာကို ဝါသနာပါပြီးတော့ လူအများ စိတ်ဝင်စားလာတဲ့ အခါမှာ ကျွန်တော်တို့လို ဓာတ်ပုံနဲ့ အသက်မွေးဝမ်းကြောင်းပြုရတဲ့သူတွေက ဓာတ်ပုံဆရာတွေ အတွက်ပေါ့ ။ ဓာတ်ပုံပညာကို ဖြန့်ဝေရေးပိုင်းရော ကိုယ်ကိုယ်တိုင်ခံစားပြီး တင်ပြမှုအပိုင်းတွေပါ လူတွေရဲ့ စိတ်ဝင်စားမှုကို ပိုရလာတဲ့အတွက် ကျွန်တော်ထင်ပါတယ်။  ဒစ်ဂျစ်တယ်ကြီးကတော့ လူတွေအားလုံးအတွက် ကောင်းကျိုးပြုပါတယ်။

နောက်တစ်ခုကတော့ အစ်ကို့အနေနဲ့ ဓာတ်ပုံပညာကို ဘယ်အချိန်လောက်ကတည်းက စိတ်ဝင်စားခဲ့တာလဲ။

တိတိကျကျဆိုရင်တော့ ကိုးတန်းကျောင်းသားဘဝပေါ့။ ကျွန်တော်ရဲ့ ဒီလက်ဦးဆရာက ဓာတ်ပုံရဲ့ Landscape Photography မှာတော့ Famous Photographer တစ်ဦးပေါ့။ ဆရာ့ရဲ့အရိပ်အာဝါသအောက်မှာ အတန်းပညာတွေသင်ယူရင်းနဲ့ လုပ်တာကိုင်တာတွေ ကိုယ့်မျက်စိအောက်မှာ နေ့စဉ်နဲ့အမျှကြုံတွေ့နေရတော့ ဒီပေါ်မှာ တစ်စတစ်စနဲ့ စိတ်ဝင်စားလာတယ်။ အဲဒီကနေစပြီးတော့ ဆရာက မင်းဝါသနာပါတယ်ဆိုရင်ဆိုပြီး စနစ်တကျပြုစုပျိုးထောင်ပေးတယ်။ လိုအပ်တဲ့ အရာတွေကိုလည်း ဆရာ့ရဲ့ လမ်းညွှန်မှုအောက်မှာပဲ ကျွန်တော် တောက်လျောက်ရပ်တည်ခဲ့တာပေါ့။

နောက်တစ်ခုက အဲဒီအချိန်လောက်ကဆိုရင် ဒီမှာ ဓာတ်ပုံံပညာက အရမ်းမထွန်းကားသေးဘူး။ အဲဒီအချိန်မှာ မိဘတွေရဲ့ ကူညီထောက်ပံ့မှုတွေဆိုရင်ရော ဘာတွေဖြစ်မလဲ။

အဓိကကတော့ ကျွန်တော်က ကျွန်တော့်ရဲ့ မွေးရပ်ဇာတိက နယ်မှာ။ မန္တလေးတိုင်း အမရပူရမြို့နယ် မုံတောကျေးရွာပေါ့။ နယ်ကနေ ရန်ကုန်မြို့ကိုတက်လာတဲ့အခါမှာ ကျွန်တော်တို့မိဘတွေက တောင်သူလယ်သမားတွေဆိုတော့ ထွေထွေထူးထူးတော့ ထောက်ပံ့မှုတွေ မပေးနိုင်ခဲ့ပါဘူး။ ဒါပေမယ့် ရန်ကုန်ကိုသွားဖို့အတွက် ရန်ကုန်မြို့ကြီးကိုရောက်ဖို့အတွက် မိဘနှစ်ပါးရဲ့ ခွင့်ပြုချက်ကတော့ အဓိကကျခဲ့ပါတယ်။ ကျွန်တော့်ကို စိတ်ဓာတ်ခွန်အားတွေ အများကြီး ပေးခဲ့ပါတယ်။ ဒီပညာရပ်တွေကို ခုလိုအနေအထားမျိုးထိရောက်အောင် အများကြီး ထောက်ပံ့ပေးခဲ့တာကတော့ ကျွန်တော့်ရဲ့လက်ဦးဆရာ ဆရာမန်းတက္ကသိုလ်နေမျိုးဝင်းပေါ့။ ဒီ အတန်းပညာတွေကိုလည်း လေ့လာခွင့်ပေးခဲ့တယ်။ ဘွဲ့ ဒီဂရီ တစ်ခုခုရအောင်လည်း အများကြီးထောက်ပံ့ပေးခဲ့တယ်။ ဒီဓာတ်ပုံံပညာရပ်ပိုင်းမှာဆိုလည်း ဆရာသိသမျှ တက်သမျှ မချွင်းမချန် ကျွန်တော်တို့ကို ပညာအမွေတွေပေးခဲ့တဲ့အတွက် ကျွန်တော် ဒီနေ့ဒီအချိန်ထိ ဒီနေရာလေးမှာ စကားပြောခွင့်ရတာပေါ့။

ဒီ အစ်ကို အခုအချိန်အထိ ဖြတ်သန်းလာခဲ့တဲ့ ဓာတ်ပုံံလောကထဲမှာ တွေ့ကြုံရတဲ့ အခက်အခဲတွေဆို ဘာတွေဖြစ်မလဲ။

အခက်အခဲဆိုတာကတော့ ကျွန်တော်တို့ ဒီဖလင်ခေတ်ပေါ့ ဒီဓာတ်ပုံံလောကကိုစရောက်တဲ့အချိန်မှာ ဓာတ်ပုံပညာရပ်က အခု ဒစ်ဂျစ်တယ်ခေတ်လိုတော့ ဖွံ့ဖြိုးမှုသိပ်မရှိသေးဘူး။ ဖွံ့ဖြိုးမှုမရှိသေးတဲ့အခါမှာ ကျွန်တော်တို့က ရလာတဲ့ ဒီလုပ်အားခကို ဓာတ်ပုံပေါ်မှာပဲ ပြန်ပြီး သုံးစွဲရတဲ့ အပိုင်းတွေရှိတယ်။ အဲဒီတော့ ကိုယ့်လုပ်အားနဲ့ ရလာတဲ့ အကျိုးအမြတ်က တစ်ခါတစ်ရံမှာ မညီမျှတာတွေရှိတယ်။ အဲဒီတော့ အခက်အခဲမျိုးစုံနဲ့ ဒီဓာတ်ပုံံလောကကိုတော့ ဖြတ်သန်းခဲ့ရပါတယ်။

နောက်တစ်ခုကတော့ အကိုအခု လက်ရှိဖြတ်သန်းနေတဲ့ ဓာတ်ပုံလောကထဲမှာ ဟိုးအရင်ကနေ အခုအချိန်ထိ ရရှိခဲ့တဲ့ ဆုတွေကိုလည်း သိချင်ပါတယ်။

ကျွန်တော်ပြည်တွင်းပြည်ပ ဆုပေါင်း အခုဆိုရင် ဆုပေါင်း ၂ဝဝကျော် ရရှိထားပါတယ်။ ဆုပေါင်း ၂ဝဝကျော်ထဲမှာမှ လွန်ခဲ့တဲ့ ၂ဝ၁၂လောက်က ဆိုရင်တော့ ဒီလို International Photo Contest ထူးထူးခြားခြားပေါ့ Asian Geographic မဂ္ဂဇင်းကလုပ်တဲ့ ဒီ International Photo Contest မှာလည်း ကျွန်တော် Grand Prize ဆုရရှိခဲ့ပါတယ်။ မြန်မာနိုင်ငံဓာတ်ပုံအသင်းက ကြီးမှူးဖွင့်လှစ်တဲ့ ဓာတ်ပုံသင်တန်းကို ကျွန်တော်စတင်တက်ရောက်ခဲ့တယ်။ သင်တန်းကနေကျင်းပတဲ့ ဓာတ်ပုံံပြိုင်ပွဲတွေရှိခဲ့တယ်။ အဲဒီမှာဆိုရင်လည်း The Best Photographer of the Year ကျွန်တော် မြန်မာနိုင်ငံဓာတ်ပုံအသင်းမှာ နှစ်ကြိမ်ရခဲ့ပါတယ်။ မန္တလေးမှာရှိတဲ့ မန္တလေးဓာတ်ပုံအသင်းက ကြီးမှူးကျင်းပတဲ့ မြန်မာနိုင်ငံလုံးဆိုင်ရာ ဓါတ်ပုံပြိုင်ပွဲမှာလည်း The Best Photographer of the Year နောက်တစ်ကြိမ်ရခဲ့ပါတယ်။ The Best Photographer of the Year ကိုပဲ ကျွန်တော် လေးကြိမ်ရရှိထားပါတယ်။ ဒါကတော့ ကျွန်တော်တို့ရဲ့ အထင်ကရဆုတံဆိပ်တွေပေါ့။

နောက်တစ်ခုကတော့ အစ်ကို့အနေနဲ့ ဓာတ်ပုံပညာလောကထဲမှာ ရှေ့ဆက်ပြီး ဘယ်လောက်ထိသွားဖို့ ရည်မှန်းထားလဲဗျ။

အခုလက်ရှိကျွန်တော်ရဲ့လှုပ်ရှားမှုတွေကတော့ ဒီ ဓာတ်ပုံပညာဖြန့်ဝေရေးအတွက် ကိုယ်ပိုင်ဓာတ်ပုံံပညာ သင်တန်းကျောင်းလေး KWH Photography Workshop ဆိုပြီးတော့ ဓာတ်ပုံံပညာရပ်ပိုင်းဆိုင်ရာ ဖြန့်ဝေမှုတွေ လုပ်ပါတယ်။ သင်တန်းတွေပေးပါတယ်။ အခါအားလျော်စွာ ဒီ မြန်မာနိုင်ငံဓာတ်ပုံအသင်းတို့ ၊ မန္တလေးဓာတ်ပုံအသင်းတို့ အထက်မြန်မာပြည်ဓာတ်ပုံအသင်းတို့ အသင်းအဖွဲ့တွေကနေလုပ်တဲ့ ဒီဓာတ်ပုံံနဲ့ ပတ်သက်တဲ့ Workshop တွေမှာလည်း ကျွန်တော်တို့ Knowledge Sharing တွေလုပ်ပေးပါတယ်။ ပြီးရင် ဓာတ်ပုံံပြိုင်ပွဲနဲ့ ပတ်သက်လို့ပဲဖြစ်ဖြစ် သိချင်တဲ့အကြောင်းအရာတွေကို Facebook ကနေပဲဖြစ်ဖြစ် မေးမြန်းတဲ့ အခါတွေဆိုရင်လည်း သူငယ်ချင်းတွေကို မျှဝေပေးပါတယ်။

နောက်တစ်ခုသိချင်တာကတော့ အစ်ကိုက Sony ရဲ့ Brand Ambassador တစ်ယောက်ဆိုတော့ Brand Ambassador တစ်ယောက်ဖြစ်လာပုံလေးကို သိချင်ပါတယ်ဗျ။

ကျွန်တော် Sony Alpha ရဲ့ Brand Ambassador တစ်ယောက်အနေနဲ့ လွန်ခဲ့တဲ့နှစ် ၂၀၁၆ ခုနှစ်မှာ စပြီးတော့ Sony နဲ့ Join ခဲ့ပါတယ်။ ဒီ ၂၀၁၇ခုနှစ်မှာလည်း Sony ရဲ့ Brand Ambassador အနေနဲ့ပဲ ဆက်လက်တာဝန်ယူပြီး Sony ရဲ့ လှုပ်ရှားမှုတွေမှာ ပါဝင်ပူးပေါင်းနေပါတယ်ခင်ဗျ။

နောက်တစ်ခုကတော့ အစ်ကိုခုထိရိုက်ခဲ့တဲ့ ဓာတ်ပုံံတွေထဲမှာ အမှတ်တရဖြစ်ခဲ့တဲ့ ဓာတ်ပုံံတွေ ရှိရင်လည်း ပြောပြပေးပါဦး။

ဟုတ်ကဲ့။ ကျွန်တော်ဒီလိုအလားသဏ္ဍန်တူဆု ပုံစံတူဆုကို လွန်ခဲ့တဲ့ ၂၀၁၂ ခုနှစ်ဝန်းကျင်က ဒီ Asian Geographic မဂ္ဂဇင်းလို့ခေါ်တဲ့ စင်ကာပူမှာရှိတဲ့ ဒီမဂ္ဂဇင်းက ကြီးမှူးကျင်းပတဲ့ Photo Contest မှာ ကျွန်တော် Grand Prize ဆုကိုရရှိခဲ့ပါတယ်။

အစ်ကို့ဆီမှာဆိုရင်လည်း ခုဆိုရင် တပည့်တွေအများကြီးရှိတယ်။ ဒါပေမယ့် ဓာတ်ပုံပညာကို စိတ်ဝင်စားတဲ့ လူငယ်တွေအတွက် ပြောချင်တာရှိရင် ပြောပြပေးပါဦး။

ဟုတ်ကဲ့။ အဓိကကတော့ ကိုယ်ချစ်မြတ်နိုးတဲ့ ဒီဓာတ်ပုံံအနုပညာပေါ်မှာ ခလုတ်နှိပ်တိုင်းမှာ ရိုးသားဖို့လိုပါတယ်။ ကျွန်တော်တို့ခလုတ်နှိပ်လိုက်တဲ့ပုံတစ်ပုံပေါ်မှာ ထွက်လာတဲ့ ရလဒ်တစ်ခုဟာ ကျွန်တော်တို့ရဲ့ ရိုးသားမှုတွေက ဒီပေါ်မှာ အများကြီးအခြေခံပါတယ်။ ရိုးသားမှုဆိုတာ ကျွန်တော်ပြောချင်တဲ့ အဓိပ္ပာယ်ကတော့ ဘာပဲလုပ်လုပ်ပေါ့ ကိုယ်လုပ်တဲ့ လုပ်ရပ်တစ်ခုပေါ်မှာ စေတနာပါရမယ်။ ဝါသနာပါရမယ်။ ရိုးသားရမယ်။ ဒီအကြောင်းအချက်တွေကို လက်ကိုင်ထားပြီးတော့ ကျွန်တော်တို့ စဉ်ဆက်မပြတ်ပေါ့ ။ ခုမှစရိုက်မယ့် ဓာတ်ပုံံဝါသနာပါတဲ့သူတွေအတွက်ကျတော့ သူများရိုက်ထားတဲ့ ပုံတွေများများကြည့်ပါ။ ကိုယ်ကိုယ်တိုင်များများရိုက်ပါ။ ပြီးတော့ ကိုယ်ကိုယ်တိုင်ဖန်တီးမှုတွေ များများလုပ်ပါ။ အဲဒါဆိုရင်တော့ ကျွန်တော်တို့ ဒီဝါသနာပါတဲ့ ဓာတ်ပုံပညာအပေါ်မှာ ပိုပြီးစိတ်ဝင်စားပြီးတော့ ပြိုင်ပွဲနဲ့ ပတ်သက်တဲ့ ထိုက်တန်တဲ့ ရလဒ်တွေလည်း ရလာမယ်လို့ ကျွန်တော်ထင်ပါတယ်။

အစ်ကို့အနေနဲ့ ကျွန်တော်တို့ မဇ္ဈိမ TV ပရိသတ်တွေကို ပြောချင်တဲ့ အကြောင်းလေးတွေရှိရင်လည်း ပြောပြပေးပါဦး။

ဟုတ်ကဲ့ခင်ဗျ။ အခုလိုမျိုးပေါ့နော် ရုပ်သံချန်နယ်တွေကနေပြီးတော့ ကျွန်တော်တို့ဓာတ်ပုံဆရာတွေရဲ့ ဘဝကို တစ်ဖက်တစ်လမ်းကနေ လူတွေစိတ်ဝင်စားလာအောင် ၊ ဒီဓာတ်ပုံပညာရပ်တွေကို ပိုပြီးလူတွေမြတ်နိုးလာအောင် တိုက်ရိုက်ထိတွေ့ခွင့်ရလာအောင် ဓာတ်ပုံံပညာရပ်တွေကို မြတ်နိုးခွင့်ရလာအောင် စီစဉ်တင်ဆက်ပေးတဲ့အတွက် ကျေးဇူးအများကြီးတင်ပါတယ်။ ဒီဓာတ်ပုံံအနုပညာဟာဆိုရင်ဖြင့် ကိုယ်တစ်ဦးတစ်ယောက်တည်း ခံစားမှုတစ်ရပ်အနေနဲ့ မဟုတ်ပဲနဲ့ အများပြည်သူတွေနဲ့အတူ ဓာတ်ပုံံကိုချစ်မြတ်နိုးတဲ့သူတွေနဲ့အတူ အတူတူခံစားခွင့်ရနိုင်တဲ့ ဓာတ်ပုံပညာရပ်ဖြစ်တဲ့အတွက် ကျွန်တော့်အနေနဲ့ ဒီဓာတ်ပုံံပညာကို စဉ်ဆက်မပြတ် ဓာတ်ပုံအနုပညာနဲ့ပဲ ဆက်လက်ပြီးတော့ ဓာတ်ပုံံပညာဖွံ့ဖြိုးတိုးတက်အောင် လေ့လာမှုတွေ Sharing လုပ်မှုတွေကို စဉ်ဆက်မပြတ် လုပ်သွားဖို့အစီအစဉ်တွေရှိပါတယ်။

 ဟုတ်ကဲ့ပါ။ အခုလိုဖြေကြားပေးလို့ ကျွန်တော်တို့ မဇ္ဈိမ TV အဖွဲ့သားတွေက ကျေးဇူးအထူးပဲတင်ရှိပါတယ်ဗျ။

ဟုတ်ကဲ့။ ကျွန်တော့်အနေနဲ့ကလည်း တစ်ကူးတစ်က အချိန်ပေးပြီးတော့ ဓာတ်ပုံပညာရပ်ပိုင်းဆိုင်ရာတွေ ၊ ဓာတ်ပုံလောကအကြောင်းတွေကို ပြည်သူတွေသိအောင် ပြည်သူတွေ ပိုစိတ်ဝင်စားလာအောင် အခုလိုအချိန်ပေးပြီး စီစဉ်တင်ဆက်ပေးတဲ့ မဇ္ဈိမ TV အဖွဲ့သားတွေအားလုံးကို ကျေးဇူးအထူးတင်ရှိပါတယ်ခင်ဗျာ။

ဟုတ်ကဲ့ပါ အခုဆိုရင်တော့ ပြီးခဲ့တဲ့ ဧပြီလတုန်းက လန်ဒန်မြို့မှာ ဆုချီးမြှင့်ပွဲလုပ်ခဲ့တဲ့ Sony World Photography Award ဆုရှင် ကိုကျော်ဝင်းလှိုင်နဲ့ တွေ့ဆုံမေးမြန်းခဲ့တာတွေကို တင်ဆက်ပေးခဲ့တာပဲဖြစ်ပါတယ်။ မဇ္ဈိမ TV ကိုကြည့်ရှုနေကြတဲ့ ပရိသတ်တစ်ယောက်ချင်းစီကို ကျေးဇူးအထူးပဲတင်ရှိပါတယ်ခင်ဗျာ။

အင်တာဗျူး အပိုင်း (၁) ကို အောက်ပါလင့်တွင် ဖတ်ရှု့နိုင်ပါသည်။ http://www.mizzimaburmese.com/article/27074

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly