သာ/ယဉ်ဝန်ကြီးကို ဆန္ဒပြမည့်ကိစ္စတွင် နေပြည်တော်တိုင်း အမျိုးဘာသာ၊ သာသနာစောင့်ရှောက်ရေးအဖွဲ့ မပါဟု ထုတ်ပြန်

သာ/ယဉ်ဝန်ကြီးကို ဆန္ဒပြမည့်ကိစ္စတွင် နေပြည်တော်တိုင်း အမျိုးဘာသာ၊ သာသနာစောင့်ရှောက်ရေးအဖွဲ့ မပါဟု ထုတ်ပြန်

နေပြည်တော်ရှိ သာသနာရေး နှင့် ယဉ်ကျေးမှုဝန်ကြီး သူရဦးအောင်ကိုအား ကန့်ကွက်ဆန္ဒပြမည့်ကိစ္စတွင် နေပြည်တော်တိုင်း အမျိုးဘာသာ၊ သာသနာစောင့်ရှောက်ရေးအဖွဲ့ မပါဟု ၎င်းအဖွဲ့အစည်းက မေလ ၁၈ရက်က ထုတ်ပြန်လိုက်သည်။

အဆိုပါ ဆန္ဒပြမှုတွင် နေပြည်တော်တိုင်း အမျိုးဘာသာ၊ သာသနာစောင့်ရှောက်ရေးအဖွဲ့ အနေဖြင့် လူအင်အား၊ ငွေအင်အား လုံးဝ ကူညီမည် မဟုတ်ကြောင်း အဆိုပါအဖွဲ့ကြီး၏ ဥက္ကဋ္ဌဆရာတော် နှင့် အတွင်းရေးမှူးဆရာတော်တို့၏ လက်မှတ်များဖြင့် ထုတ်ပြန်လိုက်ခြင်းဖြစ်သည်။

"နေပြည်တော်နယ်မြေအတွင်းရှိ ဘုန်းတော်ကြီးကျောင်းများ၌ ဆန္ဒပြမည့်အဖွဲ့များ တည်းခိုမည်ဟု သတင်းများထွက်ပေါ်နေမှုသည် အဆိုပါကျောင်းတိုက်များ၏ ဆရာတော်များကိုယ်တိုင်လည်း မသိရှိသလို သဘောတူခွင့်ပြုထားခြင်းမရှိပါကြောင်း" ဟု ဆိုကာ ထုတ်ပြန်ချက်တွင် ရေးသားဖော်ပြထားသည်။

“ဗုဒ္ဓဘာသာနှင့် သံဃာတော်များကို ဖိနှိပ်မှု” ကြောင့်ဟုဆိုကာ သာသနာရေးနှင့်ယဉ်ကျေးမှုဝန်ကြီးအား ကရင်၊ မွန်ပြည်နယ်များနှင့် ရန်ကုန်၊ ဧရာဝတီ၊ မန္တလေးတိုင်းတို့မှ လူပုဂ္ဂိုလ်နှင့် သံဃာများက နေပြည်တော်၊ ဥတ္တရသီရိမြို့နယ်၊ ရွှေနံ့သာဘောလုံးကွင်းအတွင်း မေလ ၂၀ရက်တွင် လာရောက်ဆန္ဒပြကြမည်ဖြစ်သည်။

ယင်းဆန္ဒပြပွဲကို အင်အား သုံးသောင်းဖြင့် ကန့်ကွက်ဆန္ဒပြရန် ခွင့်ပြုချက်တင်သော်လည်း နေပြည်တော်တွင် ၂၁ရာစု ပင်လုံညီလာခံ ဒုတိယအကြိမ်အစည်းအဝေး ကျင်းပရန် ရှိခြင်း နှင့် အများပြည်သူ တည်ငြိမ်အေးချမ်းရေးအတွက် အကြောင်းပြကာ အာဏာပိုင်များက အင်အား ၃၀၀ကိုသာ ခွင့်ပြုခဲ့သည်ဟုလည်း ဆန္ဒပြပွဲ စီစဉ်သူတစ်ဦးဖြစ်သည့် ဦးတင့်လွင်ဦးက ပြောသည်။

ဆန္ဒပြသူများက မေလ ၂၀ရက် နံနက်တွင် နေပြည်တော်သို့ သွားရောက်သွားမည်ဖြစ်ပြီး သာသနာရေး နှင့် ယဉ်ကျေးမှုဝန်ကြီး ရာထူးမှ နှုတ်ထွက်ပေးရန် အပါအဝင်  “အမျိုးဘာသာ သာသနာ ကာကွယ်စောင့်ရှောက်ရေး”နှင့် ပတ်သက်သည့် ကြွေးကြော်သံများဖြင့် ဆန္ဒပြကြမည်ဟု သိရသည်။

Mizzima Weekly