ကမ္မ ၊ဧပြီ ၂၇ ။ ။ မကွေးတိုင်းဒေသကြီး ပခုက္ကူမြို့နယ် ၊ ကမ္မမြို့အနီးရှိတောင်သူများ မိုးဦးကျကာလတွင် မည်သည့်သီးနှံကို ရွေးချယ်၍စိုက်ပျိုးရမ ဝေခွဲမရဘဲ အခက်ကြံုနေကြောင်း ဒေသခံတောင်သူများထံက သိရသည်။
ယခုနှစ်တွင် စိုက်ပျိုးစရိတ်များတက်လာသော်လည်း သီးနှံစျေးနှုန်းများမှာ ထက်ဝက်ကျဆင်းနေကြောင်း အချို့တောင်သူများက ဆိုသည်။
ယခင်နှစ်က ယခုအချိန်ဆိုပါက ပဲစဉ်းငုံ တစ်တင်းလျှင် ၄၉၇၀၀ ကျပ် ပေါက်စျေးရှိသော်လည်း လက်ရှိချိန်၌ ၂၁၂၀၀ ကျပ်သာ ပေါက်စျေးရှိပြီး ပဲထောဖြူမှာမူ ယခင်နှစ်က ၁၁၇၀၀ ကျပ်မှ ယခုနှစ်လက်ရှိချိန်တွင် ၂၀၅၀၀ ကျပ်ထိ ပေါက်စျေးရှိကြောင်းဖောင်းကွဲကျေးရွာမှ ကိုဝင်းစိုးက မဇ္စျိမသို့ ပြောပြသည်။
"နှမ်းစျေးကတော့ ပဲစဉ်းငုံနဲ့စာရင်နှစ်တိုင်းအလွန်အမင်းကျတာမျိုးမရှိဘူး။ နှမ်းချည်းအားလုံးစိုက်ရင်ကျတော့ အလုပ်သမားများများ သုံးရတယ်။ ရိတ်သိမ်းချိန်ကြ အလုပ်သမားစျေးကြီးတယ်။ နှမ်းကျတော့ မိုးများလွန်းရင်လည်းအဆင်မပြေဘူး နည်းလွန်းရင်လည်း မရဘူး။ အဲတော့ ဘာစိုက်လို့စိုက်ရမှန်ကို မသိဘူး။ သို့ပေမယ့်လည်း မိုးကဝယ်မရဘူး ။ မျိုးကဝယ်ရတယ်လေ။ အချိန်ကျတော့ စိုက်ရတာပါဘဲဗျာ''ဟုဖောင်းကွဲကျေးရွာမှ တောင်သူဦးပြေသိန်းက ပြောသည်။
စိုက်ပျိုးရေးပညာရှင်များ မိုးလေဝသပညာရှင်များနှင် ပြည်တွင်းပြည်ပစျေးကွက်ကျွမ်းကျင်သူများက တောင်သူများအား ယခုနှစ်တွင် ဘယ်လိုသီးနှံမျိုးကိုစိုက်ပျိုးသင့်ကြောင်းကို လမ်းညွှန်အကြံပြုချက်များပေးမည့်ဆိုပါကပို၍အဆင်ပြေနိုင်ကြောင်း တောင်သူများထံမှသိရသည်။