ရန်ကုန်၊ဧပြီ ရ ။ ။ ၂၀၁၇ သင်္ကြန်ကာလအတွင်း သင်္ကြန်မဏ္ဍပ်အနေနှင့် လျှောက်ထားမှုများကို ရန်ကုန်မြို့တော် စည်ပင်သာယာရေးထံသို့ လာရောက်လျှောက်ထားနိုင်ပြီး Festival (ဖျော်ဖြေပွဲ)များကို ရန်ကုန်တိုင်းဒေသကြီး အစိုးရအဖွဲ့သို့ တိုက်ရိုက်လျှောက်ထား ရမည်ဖြစ်ကြောင်း ရန်ကုန်မြို့တော် စည်ပင်သာယာရေး အင်ဂျင်နီယာဌာန လမ်း/တံတားက ဌာနစုမှူး ဦးသန်းဟုတ်က ပြောသည်။
အဆိုပါ ဖျော်ဖြေပွဲများအတွက် လက်မှတ်ရောင်းချနိုင်ပြီး ကွင်းအတွင်းမှာ သီးသန့်ဖျော်ဖြေပွဲပုံစံ ပြုလုပ်မှုများကို ရန်ကုန်တိုင်းဒေသကြီးအစိုးရ၏ ခွင့်ပြုချက်ဖြင့် ပြုလုပ်နိုင်မည်ဖြစ်သည်။
"မဏ္ဍပ်နေရာချထားရေး ကော်မတီအနေနဲ့ အဲ့လို လက်မှတ်ရောင်းချပြီးတော့ ကွင်းအတွင်းမှာ ပွဲပါမစ်သဘောမျိုးနဲ့လုပ်မယ့်မဏ္ဍပ်တွေကျတော့ ဒီကနေပြီးတော့ ခွင့်မပြုဘူး။ တိုင်းဒေသကြီးကနေ ခွင့်ပြုပေးတယ်"ဟု ရန်ကုန်စည်ပင် အင်ဂျင်နီယာဌာန လမ်း/တံတားက ဌာနစုမှူး ဦးသန်းဟုတ်က ဆိုသည်။
ယခင်နှစ်တွင် မဏ္ဍပ်စုစုပေါင်း ၉၁ ခုရှိခဲ့ပြီး ယခုနှစ်တွင်မူ မဏ္ဍပ်စုစုပေါင်း ၈၂ခု ရှိမည်ဖြစ်ကာ မဏ္ဍပ်ကြီး အရေအတွက် လျော့နည်းမလာဘဲ မဏ္ဍပ်အသေးများ လျော့နည်းသွားကြောင်း သူက ဆက်ပြောသည်။
မဏ္ဍပ်တွေကို စီးပွားဖြစ်မဏ္ဍပ်ဖြစ်၊ မဖြစ် ခွဲခြားပုံနဲ့ ပတ်သတ်ပြီး ရန်ကုန်စည်ပင် အင်ဂျင်နီယာဌာန လမ်း/တံတားမှ ဒုဌာနမှူး ဦးစိုးသိန်းအောင်က "လက်မှတ်ရောင်းနေတဲ့ မှန်သမျှကတော့ ငါတို့သိတာကတော့ စီးပွားဖြစ်မဏ္ဍပ်ပဲပေါ့နော်" ဟု ဆိုသည်။
မဏ္ဍပ်နေရာချထားရေးနှင့် ကြံခိုင်မှုစစ်ဆေးရေး ကော်မတီအနေဖြင့် ရန်ကုန်မြို့ရှိ အဓိက လမ်းမများပေါ်တွင် စီးပွားဖြစ်မဏ္ဍပ်တွေကို ခွင့်မပြုပဲ ရန်ကုန်စည်ပင်က ထုတ်ပြန်ထားသော မဏ္ဍပ်ဆောက်လုပ်လိုသူများ လိုက်နာရန် အချက် ၄၅ ချက်နှင့် ကိုက်ညီသော မိသားစု ရေကစားမဏ္ဍပ်များကိုပဲ ခွင့်ပြုချက်ပေးထားသည်။
