ရန်ကုန်၊ ဧပြီ ၁ ။ ။ မသန်စွမ်းများမဲပေးရာတွင် အဆင်ပြေစေရန်ပြုလုပ်ထားသည့် ကြည့်မြင်တိုင်မြို့နယ်ရှိ မကျည်းတန်းတောင်အရှေ့ရပ်ကွက် မဲရုံတွင် မဲလာရောက်ပေးသူမှာ မဲစာရင်းရှိ လူဦးရေ၏ တစ်ဝက်ခန့်ရှိကြောင်း မဲရုံတွင် တာဝန်ကျနေသော ရပ်ကွက်နှင့်ကျေးရွာ ရွေးကောက်ပွဲကော်မရှင် ဥက္ကဌ ဦးစိန်မြ ကဆိုသည်။
"ကျောင်းသားက (၇၅)ယောက် ကျန်တာက ဆရာနဲ့ဆို (၈၆)ယောက်ပေါ့ မျက်မမြင်အနေနဲ့ မဲပေးနိုင်တာ ဒါပေမဲ့ ဒီနေ့ လေးဆယ် မျက်မမြင်ကျောင်းသား (၄၀)ပေးပြီးမှ ကျန်တဲ့ကျောင်းသားတွေက မိဘတွေ လာခေါ်သွားကြလို့ ပြန်သွားကြတယ်" ဟု ကြည်မြင်တိုင်ရှိ မကျည်းတန်းတောင်အရှေ့ရပ်ကွက် ရပ်ကျေးကော်မရှင်ဥက္ကဌ ဦးစိန်မြက ပြောသည်။
အဆိုပါ ကြည့်မြင်တိုင်မျက်မမြင်ကျောင်းတွင် မတ်လသည် ကျောင်းပိတ်ရက်ဖြစ်နေသည့်အတွက် ရပ်ဝေးမှာ နေထိုင်ကြသော ကျောင်းသားများကို မိဘတွေက လာပြန်ခေါ်သွားခြင်းဖြစ်၍ မဲပေးသူ တစ်ဝက်ခန့်သာရှိရကြောင်းကို သူက ရှင်းပြသည်။
၂၀၁၇ ကြားဖြတ်ရွေးကောက်ပွဲတွင် ပါဝင်လာသော စံပြမဲရုံများသည် မသန်စွမ်းများပါ လာရောက်မဲပေးရာတွင် အဆင်ပြေစေရန် ပြုလုပ်ပေးထားသည့် မဲရုံဖြစ်သည်။
ယင်းစံပြမဲရုံများကို ရန်ကုန်မြို့ လှိုင်သာယာမြို့နယ်တွင်(၂)ရုံ၊ ကြည့်မြင်တိုင်မြို့နယ်တွင်(၁)ရ၊ ကော့မှူးမြို့နယ်တွင်(၁)ရုံ၊ စစ်ကိုင်းတိုင်း မုံရွာမြို့နယ်တွင်(၁)ရုံနှင့် ချင်းပြည်နယ် ထန်တလန်မြို့နယ်တွင်(၁)ရုံ ထားရှိပေးထားသည်။
ကြည့်မြင်တိုင်မြို့နယ် မကျည်းတန်းတောင်အရှေ့ရပ်ကွက်ရှိ မဲဆန္ဒရုံ အမှတ်(၂)တွင် မဲပေးရန်စာရင်းရှိသူ မသန်စွမ်း (၈၆)ယောက် ရှိပြီး အမြင်အာရုံမသန်စွမ်း(၄၉)ယောက်နှင့် ကိုယ်လက်အင်္ဂါ မသန်စွမ်းသူ တစ်ဦး မဲလာရောက် ပေးခဲ့ကြသည်။